وڭىردە اۋىل شارۋاشىلىعى سالاسىنا ارنالعان قاناتقاقتى جوبا ناتيجەسىندە 589 جاڭا جۇمىس ورنى اشىلعان. ال جۇمىسسىزدار سانى 194 ادامعا, اتاۋلى الەۋمەتتىك كومەك الۋشى وتباسىلار سانى 1 058-گە قىسقارعان. سونىمەن قاتار قاتىسۋشىلاردىڭ ورتاشا ايلىق تابىسى 44 مىڭ تەڭگەدەن 73 مىڭ تەڭگەگە دەيىن وسكەن. جوبانىڭ بەس باعىتى بويىنشا جۇمىس جالعاسادى. تاعى ءبىر ايتا كەتەرلىگى, اتالعان جوبا اياسىندا قايتارىلاتىن نەسيە قاراجاتى ەسەبىنەن تاعى 3 اۋىلدىق وكرۋگتىڭ تۇرعىندارىنا نەسيە بەرۋ جۇمىستارى جۇرگىزىلۋدە. پرەمەر-ءمينيستردىڭ ورىنباسارى ەرالى توعجانوۆ تا جۋىردا جامبىل وبلىسىنداعى اۋىل تۇرعىندارىنىڭ تابىسىن ارتتىرۋ بويىنشا جۇرگىزىلىپ جاتقان جۇمىستاردى جوعارى باعالاپ, ءوڭىر تاجىريبەسى وزگەلەرگە ۇلگى بولۋى كەرەكتىگىن ايتقان.
جالپى, بۇل ورايدا جامبىل وڭىرىنە جۇكتەلگەن جاۋاپكەرشىلىك ۇلكەن. اۋىل تۇرعىندارىنىڭ تابىسىن ارتتىرۋعا سالىنعان ءاربىر قاراجات – ينۆەستيتسيا. ەلدەگى قاراپايىم كوپشىلىك ءوزىن-ءوزى جۇمىسپەن قامتىپ وتىرسا, مول ءونىم ءتۇسىپ تۇرسا, ايماقتاعى ەكونوميكالىق جاعداي دا جامان بولماس ەدى. بۇل رەتتە «تاراز» الەۋمەتتىك-كاسىپكەرلىك كورپوراتسياسىنا ۇلكەن مىندەتتەر جۇكتەلىپ وتىر. مۇندا دا ينۆەستيتسيالىق جوبالارعا باسىمدىق بەرۋ باستى ماقسات. جامبىل وبلىسىنىڭ اكىمى نۇرجان نۇرجىگىتوۆ اتالعان مەكەمە باسشىسىنا شەتەلدەن ينۆەستور تارتۋدى ناتيجەلى جۇزەگە اسىرۋ ءۇشىن مامانداردىڭ بىلىكتىلىگىنە ءجىتى ءمان بەرگەن دۇرىس ەكەنىن ايتقان. سونداي-اق, بىرنەشە ءتىلدى مەڭگەرگەن ءارى ىسىنە تياناقتى ماماندارمەن جۇمىس ىستەۋ كەرەكتىگىن, پيلوتتىق جوبا اياسىندا مال شارۋاشىلىعىن باستاعان كاسىپكەرلەردىڭ قاتارى كوبەيىپ وتىرعانىن, ءسۇت تاپشىلىعى تۋىنداعان وڭىردەگى وڭدەۋ زاۋىتتارىنا جاقىن اۋدانداردان ءسۇت جەتكىزۋ ماسەلەلەرىن دە قاراستىرۋ قاجەتتىگىن, ەڭ باستىسى, ۇكىمەت تاراپىنان بەرىلگەن مۇمكىندىكتى بارىنشا پايدالانۋ كەرەكتىگىن تاپسىرعان ەدى. بۇگىندە بۇل ماسەلە ءوڭىر ءۇشىن وزەكتى بولىپ تۇر. بۇل رەتتە «تاراز» اكك» اق ديرەكتورلار كەڭەسىنىڭ مۇشەسى داۋلەت ابىلقايىروۆتىڭ ايتۋىنشا, كورپوراتسيانى دامىتۋدىڭ 2022-2026 جىلدارعا ارنالعان جۇمىس ستراتەگياسى بەكىتىلگەن. ول نەگىزگى التى باعىتتان تۇرادى. سونىڭ نەگىزگىسى – وڭىردە ينۆەستيتسيالىق جوبالاردى ءتيىمدى جۇزەگە اسىرۋ. بۇگىندە ايماقتا ينۆەستيتسيالىق جوباعا باسىمدىق بەرۋ ماسەلەسى قولداۋ تاۋىپ وتىر. ال «جامبىل وبلىسى تۇرعىندارىنىڭ تۇرمىستىق تابىسىن ارتتىرۋ» پيلوتتىق جوباسىنىڭ تيىمدىلىگى مول ەكەنى ەسكەرىلىپ, الداعى ۋاقىتتا اتالعان جوبا ءوز جالعاسىن تابادى. سونداي-اق, اتالعان جوبا اياسىندا قۇرىلعان وڭىردەگى 14 كووپەراتيۆكە اگرونوم ماماندارىن تارتۋ ماسەلەسى دە كوتەرىلۋدە. ول ءۇشىن ءبىرىنشى كەزەكتە ءتيىمدى جوبالار قاجەت. وبلىس اكىمى دە جاقسى جوبالار بولسا, قاراجات ءبولۋ ماسەلەسىنىڭ وڭ شەشىمىن تاباتىنىن مالىمدەدى. تەك ينۆەستيتسيا يگىلىگىن كورۋ ءۇشىن جۇيەلى جوبالار كەرەك.
بۇگىنگە دەيىن جامبىل وبلىسىنا تالاي ينۆەستيتسيا تارتىلدى. قازىر دە جالعاسىن تابۋدا. ماسەلەن, وڭىرگە «Great Production LTD» (Goknur Gida) تۇرىك كومپانياسى ينۆەستيتسيا تارتۋعا نيەتتى. وعان وبلىس باسشىلىعى دا قولداۋ كورسەتۋدە. الداعى ۋاقىتتا ءوڭىر اۋماعىندا ۇدەمەلى باۋ-باقشا شارۋاشىلىعىن دامىتۋ جانە جەمىس-جيدەك ونىمدەرىن قايتا وڭدەۋ جونىندەگى جوبا ىسكە اسىرىلادى دەپ جوسپارلانۋدا. جوبا اياسىندا 1 100 گەكتار باقشا سالۋ مەن قايتا وڭدەۋ زاۋىتىن سالۋ دا جوسپارلانعان. جوبا 2024 جىلعا دەيىن بىرنەشە كەزەڭمەن جۇزەگە اسىرىلادى. ينۆەستورلار وڭىردە وندىرىلگەن ءونىمدى ىشكى نارىققا جانە شەتەلگە ساتۋدى جوسپارلاۋدا. جوبانىڭ قۇنى 98,4 ملن دوللاردى قۇرايدى. بۇل بويىنشا 1 مىڭ جۇمىس ورنى اشىلادى. كومپانيا باسشىلىعى جۇمىسقا جەرگىلىكتى تۇرعىندار تارتىلاتىنىن ايتتى. مۇنداي جوبالار دا ءوڭىردىڭ دامىپ, الەۋەتىنىڭ ارتۋىنا وڭ اسەر ەتەدى.
جامبىل وبلىسى
