وزگەرىستەر ساياسي ينستيتۋتتارعا ايتارلىقتاي اسەر ەتەدى. نەگىزگى زاڭعا دەپۋتاتتاردى, ونىڭ ىشىندە ءبىر مانداتتى وكرۋگتەردەن سايلاۋدى كوزدەيتىن جاڭا سايلاۋ جۇيەسى ەنگىزىلەتىن بولادى. بۇل وزگەرىس جاس كادرلاردىڭ باسەكەگە قابىلەتتىلىگىن ارتتىرۋعا مۇمكىندىك بەرەدى. مەملەكەت باسشىسى جاڭا قازاقستان ءبىرىنشى كەزەكتە ادىلەتتى قازاقستان ەكەنىن اتاپ ءوتتى. سوندىقتان كونستيتۋتسياعا ەنگىزىلەتىن تۇزەتۋلەردە كوزدەلگەن ادام قۇقىقتارىن قورعاۋ ماسەلەسى قوعامنىڭ وزگەرۋىنە, جاڭا ساتىعا كوتەرىلۋىنە سەپ بولارى داۋسىز.
كونستيتۋتسيالىق وزگەرىستەر كونستيتۋتسيالىق سوت سياقتى جاڭا قۇرىلىمدار قۇرۋدى قاراستىرادى. بۇل جاڭاشىلدىق ازاماتتاردىڭ قۇقىقتارىن قورعاۋ قاعيداتتارىن ەداۋىر دارەجەدە كۇشەيتەدى. قاتارداعى ازاماتتار مەن ادام قۇقىقتارى جونىندەگى ۋاكىلدىڭ وعان جۇگىنۋ مۇمكىندىگى, بۇل قازاقستاندىقتاردىڭ مۇددەلەرىنىڭ, قۇقىقتارى مەن بوستاندىقتارىنىڭ ساقتالۋىن باقىلاۋدى قامتاماسىز ەتەدى.
سونىمەن قاتار قازاقستاننىڭ ءولىم جازاسىنان تولىعىمەن باس تارتقانىن, ەندى بۇل جازا نورماتيۆتىك-قۇقىقتىق دەڭگەيدە ايقىندالماعانىن اتاپ وتكەن ءلازىم. بۇل نورما وتە قاراپايىم بولىپ كورىنەدى. ويتكەنى مۇنداي جازا شەكتەۋلى ەكەنى راس. بىراق ونىڭ تولىق جويىلۋى ءبىزدىڭ قوعامدى ادام قۇقىقتارىن ساقتاۋ ىسىندە جاڭا بيىككە باستايدى.
ارقايسىمىز وزگەرىستەرگە تىكەلەي جاۋاپتى ەكەنىمىزدى ءتۇسىنۋىمىز كەرەك. ءبىز ءبارىمىز وسى ەلدە جانە وسى قوعامدا ءومىر سۇرەمىز, سوندىقتان جاڭا قازاقستان يدەياسى بارشامىزعا ورتاق. ءبىزدىڭ بولاشاقتى قالاي قۇراتىنىمىز, ادىلەتتى قوعامدى قالاي قالىپتاستىراتىنىمىز تىكەلەي وزىمىزگە بايلانىستى.
تيمۋر جۇمىرباەۆ,
قازاقستان حالقى اسسامبلەياسى
كەڭەسىنىڭ مۇشەسى,
«اسسامبلەيا جاستارى» قوعامدىق بىرلەستىگىنىڭ توراعاسى
