بۇل – دەموكراتيالاندىرۋدىڭ جولى, سۋپەرپرەزيدەنتتىكتەن كۇشتى پارلامەنتى بار پرەزيدەنتتىك باسقارۋ نىسانىنا كوشۋ, سايلاۋ جۇيەسىن جەتىلدىرۋ, ارالاس پروپورتسيونالدى-ماجوريتارلىق مودەلگە كوشۋ, ءماسليحاتتاردىڭ وكىلەتتىكتەرىن كۇشەيتۋ ارقىلى جەرگىلىكتى ءوزىن-ءوزى باسقارۋدى نىعايتۋ. بۇل – مەملەكەتتىك باسقارۋداعى جاڭا كەزەڭ.
ساياسي رەفورمالار سۋپەرپرەزيدەنتتىك كەزدەگى ولقىلىقتاردى جويۋعا باعىتتالعان. پرەزيدەنتتىڭ جاقىن تۋىستارىنا ساياسي مەملەكەتتىك قىزمەتتەر مەن كۆازيمەملەكەتتىك قۇرىلىمداردى باسقارۋعا تىيىم سالۋ الداعى ۋاقىتتا پرەزيدەنت ايتقان نەپوتيزمدى جويۋ جانە قانداي دا ءبىر وليگارحاتتىڭ پايدا بولۋىنىڭ الدىن الۋ ماقساتىندا جۇرگىزىلىپ وتىر. بۇعان دەيىن پرەزيدەنت بيزنەسمەندەرمەن كەزدەسۋ كەزىندە ەلىمىزدەگى بار بايلىقتىڭ قوماقتى ۇلەسى 162 ادامنىڭ عانا ەنشىسىندە ەكەنىن ايتىپ وتكەن بولاتىن. بۇل ەلىمىزدەگى قارجى رەسۋرستارىنىڭ, بايلىقتىڭ تەپە-تەڭ ۇلەستىرىلمەگەنىن كورسەتەدى. مۇنىڭ بارلىعى سۋپەرپرەزيدەنتتىك كەزدە بولعان ولقىلىقتاردى جويۋ ماقساتىندا جۇرگىزىلىپ وتىر.
ءماجىلىس ەندىگى كۇنى زاڭدى قابىلداۋشى ورگان بولادى, بۇعان دەيىن بۇل سەناتتىڭ قۇزىرەتىندە بولعان. ناتيجەسىندە, ءماجىلىستىڭ قۇزىرەتى كۇشەيەيىن دەپ تۇر. ودان كەيىن ءماسليحاتتاردىڭ ءرولىن كۇشەيتۋ, ساياسي پارتيالاردى تىركەۋدى كۇشەيتۋگە بايلانىستى نورمالارعا وزگەرىستەر ەنەتىن بولادى. جالپى, پرەزيدەنتتىك وكىلەتتىكتى شەكتەۋ, بىرىنشىدەن, ول وكىلەتتىكتى پارلامەنتكە كوبىرەك بەرۋ, ياعني پارلامەنتتى جانە جەرگىلىكتى ءوزىن-ءوزى باسقارۋدى نىعايتۋ ماقساتىندا جاسالىپ وتىر.
شىن مانىندە, كونستيتۋتسيا كەز كەلگەن ازاماتتىڭ قۇقىعىنىڭ ساقتالۋىن بىلدىرەدى. سونداي-اق ادام قۇقىقتارى جونىندەگى ۋاكىلدىڭ لاۋازىمى كونستيتۋتسيالىق دەڭگەيدە بەكىتىلەتىنىن اتاپ وتكەن ءجون. بۇل – ۋاكىلەتتى ورگاننىڭ قۇقىقتارى ناقتى بەلگىلەنگەن جاڭا نورما. ول ەسەپ بەرمەيدى, كەرىسىنشە بارلىق مەملەكەتتىك ورگاندار مەن لاۋازىمدى تۇلعالاردان تاۋەلسىز بولادى.
كونستيتۋتسياداعى وزگەرىستەردى زور وپتيميزممەن قابىلدايمىن جانە ولاردان قازاقستان قوعامى ءۇشىن ايتارلىقتاي وڭ ناتيجە كۇتەمىن.
قازبەك مايگەلدينوۆ,
قازاقستاندىق قوعامدىق دامۋ ينستيتۋتىنىڭ باسقارما توراعاسى
