پرەمەر-مينيستر ءاليحان سمايىلوۆ ەكونوميكانى دەمونوپوليزاتسيالاۋ جونىندەگى كوميسسيانىڭ كەزەكتى وتىرىسىن وتكىزدى. وتىرىس بارىسىندا قازىرگى تاڭدا الەۋمەتتىك-كاسىپكەرلىك كورپوراتسيالاردىڭ ينۆەستيتسيالىق جانە يننوۆاتسيالىق جوبالاردى جۇزەگە اسىرۋ ءۇشىن كونكۋرستان تىس نەگىزدە جەر تەلىمدەرىن بولەتىنىن اتاپ ءوتتى. بۇل رەتتە اكك-كە ولاردى يگەرۋدە ەشقانداي جاۋاپكەرشىلىك جۇكتەلمەيدى. الايدا بولىنگەن جەر تەلىمدەرى ءىس جۇزىندە كوپ پاتەرلى تۇرعىن ۇيلەر, مەيرامحانالار, كولىك جۋ ورىندارىن جانە ت.ب. سالۋ ءۇشىن پايدالانىلىپ جاتىر.
مىسال رەتىندە ەلىمىزدىڭ ءىرى قالالارىنىڭ بىرىندە اكك-گە 679 گا جەر بولىنگەنى ايتىلدى, ونىڭ 254 گا تۇرعىن ءۇي قۇرىلىسىنا, 96 گا كوممەرتسيالىق وبەكتىلەرگە جانە تەك 5 گا وندىرىستىك بازا مەن زاۋىت سالۋعا بەرىلگەن.
اتالعان ماسەلەنى شەشۋ ءۇشىن اكك ارقىلى جەر تەلىمدەرىن كونكۋرستان تىس بەرۋ مۇمكىندىگىن الىپ تاستاۋ ۇسىنىلدى, بۇل جەردى ءبولۋدىڭ اشىقتىعىن قامتاماسىز ەتۋگە جانە ونى ساتۋدان بيۋدجەتكە تۇسەتىن تۇسىمدەردىڭ كولەمىن ۇلعايتۋعا, نارىقتىڭ بارلىق سۋبەكتىسىنە جەرگە قولجەتىمدىلىكتى قامتاماسىز ەتۋ ءۇشىن تەڭ مۇمكىندىكتەر بەرۋگە جول اشادى.
سونداي-اق وتىرىستا ماگيسترالدىق تەمىرجول جەلىلەرىن جوندەۋ سالاسىندا بىرنەشە كومپانيا عانا قىزمەت كورسەتەتىنى اتاپ ءوتىلدى. بۇل ولارعا قويىلاتىن جوعارى بىلىكتىلىك تالاپتارىنا بايلانىستى بولىپ وتىر.
وسىعان بايلانىستى قر پرەمەر-ءمينيسترى «سامۇرىق-قازىنا» قورىنا وسى سالادا باسەكەلەستىككە قولايلى جاعداي جاساۋ ءۇشىن اتالعان تالاپتاردى جۇمسارتۋدى قاراستىرۋ تاپسىردى.
