مالىمدەمەنى قازاقستان مۇسىلماندارى ءدىني باسقارماسىنىڭ ءباسپاسوز حاتشىسى اعابەك قوڭارباي ۇلى ءوزىنىڭ Facebook-تەگى پاراقشاسىندا جاريالادى.
ول ءدىني باسقارمانىڭ ارىپتەستەرىمىزدەن تەك رەسمي اقپاراتقا جۇگىنۋدى سۇرايتىنىن, ءجۋرناليستىڭ ادەيى تاراتقان ماتەريالى كوپتىڭ ويىنا كۇماندى وي سالعانىن ايتىپ, «انۋاربەك جەكسەنعاليەۆ ءبىر جىلدارى «زەكەت» قورى استانا قالاسى وكىلدىگىنىڭ ديرەكتورى بولعان» دەگەن مالىمەتتىڭ قايدان شىققانى جانە ونى قايدان العانى باسقارماعا بەلگىسىز ەكەنىن ايتتى.
وسىعان بايلانىستى ول قازاقستان مۇسىلماندارى ءدىني باسقارماسىنىڭ انۋاربەك جەكسەنعاليەۆكە قاتىستى مالىمدەمەسىن جاريالادى.
«انۋاربەك جەكسەنعاليەۆ 2016, 2017 جىلدارى, ياعني 1 جىل كولەمىندە «زەكەت» قورىنىڭ جانىنداعى قايىرىمدى كاسىپكەرلەردەن قۇرالعان قامقورشىلار كەڭەسىنىڭ استانا قالاسى بويىنشا مۇشەسى بولدى. ەرىكتى تۇردە قوعامدىق نەگىزدە قوردىڭ ىزگى ءىس-شارالارىنا ۇلەس قوستى.
انۋاربەك جەكسەنعاليەۆتىڭ ەشقانداي زاڭدى وكىلەتتىگى بولعان جوق. ول قمدب جانىنداعى «زەكەت» قورىنىڭ ديرەكتورى بولعان ەمەس! ول 2017 جىلى نەگىزگى جۇمىسىندا, ياعني كاسىپكەرلىك قىزمەتىندە قالدى», دەدى ول.
سونداي-اق ءدىني باسقارمانىڭ وكىلى انۋاربەك جەكسەنعاليەۆتىڭ بيۋدجەت قارجىسىنا قاتىستى كۇدىككە ءىلىنۋىن «زەكەت» قورىنىڭ اقشاسىن «جىمقىرۋمەن» بايلانىستىرىپ جاتقانىن, بيۋدجەت قارجىسى مەن قوردىڭ ەسەبىندەگى قاراجاتتىڭ ماقساتى مەن باعىتى مۇلدەم بولەك ەكى نارسە ەكەنىن اتاپ ءوتتى.
«زەكەت» قورىنا مەملەكەتتىك بيۋدجەتتەن قارجى بولىنبەيدى. وسى ماسەلەنى, اتاپ ايتقاندا, اقپاراتتىڭ مازمۇنىن باسقا ارناعا بۇرۋ كاسىبي جۋرناليستەرگە ءتان ەمەس ارەكەت دەپ سانايمىز.
قارجىلىق مونيتورينگ اگەنتتىگى كاسىپكەر انۋاربەك بولات ۇلى جەكسەنعاليەۆكە قانداي نەگىزدە ىزدەۋ جاريالاعانى تۋرالى بىزدە رەسمي مالىمەت جوق», دەپ جازدى ول.
