وبلىستىق سوتتىڭ ءباسپاسوز قىزمەتىنەن ءمالىم ەتكەندەي, قۇرمانعازى اۋدانىندا اۋىلدىق وكرۋگ اكىمى سەرىكتەستىك ديرەكتورىنان 800 مىڭ تەڭگە پارا العان.
وسى دەرەككە بايلانىستى قىلمىستىق ءىس قوزعالعان.
قۇرمانعازى اۋداندىق سوتىندا وكرۋگ اكىمىنە قاتىستى قر قىلمىستىق كودەكسىنىڭ 366-بابىنىڭ 2-بولىگىمەن پارا الۋ, 369-باپتىڭ 1-بولىگىمەن قىزمەتتىك جالعاندىق جاساۋ دەرەگىمەن, ال, سەرىكتەستىك ديرەكتورىنا قر قىلمىستىق كودەكسىنىڭ 367-بابىنىڭ 2-بولىگىمەن پارا بەرۋ, 385-باپتىڭ 1-بولىگىمەن قۇجاتتاردى قولدان جاساۋ دەرەگىمەن ايىپتاۋ ۇكىمى شىعارىلدى.
«ح. اۋىلدىق وكرۋگ اكىمى لاۋازىمىن اتقارا وتىرىپ, اكىم اپپاراتىنا تيەسىلى عيماراتتى ساتۋعا جاردەمدەسكەنى جانە سوتتالۋشى ك. جالعان مالىمەتتەر ەنگىزگەن رەسمي قۇجاتتاردى تىركەۋشى ورگانعا بەرگەنى ءۇشىن جشس ديرەكتورى ك-دان 800 000 تەڭگە سوماسىندا پارا العان. سوتتالۋشىلاردىڭ كىناسى وزدەرىنىڭ مويىنداۋىمەن, جەدەل-ىزدەستىرۋ شارالارىنىڭ جانە جاسىرىن تەرگەۋ ارەكەتىنىڭ ناتيجەلەرىمەن, بەينەفونوگرافيالىق ساراپتامانىڭ قورىتىندىسىمەن, مەملەكەتتىك اۋديتوردىڭ قورىتىندىسىمەن, بانك قۇجاتتارىمەن دالەلدەندى. سوت جازا تاعايىنداۋ بارىسىندا ح-نىڭ اسىراۋىندا مۇگەدەك بالاسىنىڭ, ال, ك-نىڭ قارت اتا-اناسىنىڭ بارىن ەسكەردى. ەكى سوتتالۋشى دا ءوز كىناسىن تولىق مويىندادى», دەپ حابارلادى وبلىستىق سوتتىڭ ءباسپاسوز قىزمەتى.
قۇرمانعازى اۋداندىق سوتىنىڭ ۇكىمىمەن اۋىلدىق وكرۋگ اكىمى ح-عا 32 ملن تەڭگە, سەرىكتەستىك ديرەكتورى ك-عا 16 ملن تەڭگە مولشەرىندە ايىپپۇل تۇرىندەگى جازا تاعايىندالدى.
سوتتالعانداردىڭ ەكەۋى دە مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلدى.
سوت ۇكىمى زاڭدى كۇشىنە ەنگەن جوق.
ايانا توعانبەك
