«قاڭتار وقيعاسى بويىنشا جالپى 265 قىلمىستىق ءىس سوتقا جولدانىپ, 243 ادام سوتتالدى. قازىرگى ۋاقىتتا 585 كۇدىكتى قاماۋدا وتىر. اتالعان ادامدار قيراتۋ, عيماراتتاردى ورتەۋ, قارۋ جىمقىرۋ, مەملەكەتتىك جانە قۇقىق قورعاۋ ورگاندارى عيماراتتارىنا قارۋلى شابۋىل جانە باسقا قىلمىستارعا بەلسەندى تۇردە قاتىسقان. ءاربىر قامالعان كۇدىكتى بويىنشا ولاردىڭ وسى قىلمىستارعا قاتىسى بار ەكەنىن دالەلدەيتىن جەتكىلىكتى مالىمەت بار. بۇعان دەيىن ءبىز الماتى قالاسى اۋەجايىنا شابۋىل جاسالعانىن حابارلاعان بولاتىنبىز, مۇندا كەيبىر قىلمىسكەرلەردىڭ ءرولىن تۇسىندىرگىم كەلەدى», دەدى ە. قيلىمجانوۆ.
وسى ورايدا ول 5 قاڭتاردا ن. ەسىمدى ازامات ءبىر توپ اداممەن بىرگە الماتى قالاسى اۋەجايىنىڭ ۇشۋ-قونۋ جولاعىنىڭ جارىعىن وشىرگەنىن ايتتى.
«وسى رەتتە ن. ءوزىنىڭ ارەكەتتەرىمەن ستراتەگيالىق وبەكتىنىڭ قىزمەتىن توقتاتتى, سالدارىنان جولاۋشىلار مىنگەن ۇشاقتار ۇشىپ كەتە المادى جانە توقتان اجىراتىلعان ۇشۋ-قونۋ جولاعىندا 10 ساعاتتان ارتىق تۇرۋعا ءماجبۇر بولدى. وسى ۋاقىتتا قارۋلى توپ الماتى اۋەجايىنىڭ عيماراتىن قيراتىپ, تونادى. ن-ءنىڭ ءىس-ارەكەتتەرى تەرروريزم اكتىسى, ياعني قىلمىستىق كودەكستىڭ 255-بابىمەن سارالاندى. ونىڭ قىلمىستارعا قاتىسى بارى جينالعان دالەلدەمەلەرمەن راستالدى», دەدى باس پروكۋراتۋرا وكىلى.
