وليمپيادا جاڭا باعىتتاعى 30 جوبامەن ەرەكشە. تارتىستى دودانىڭ ءبىرىنشى كۇنى قاتىسۋشى كوماندالاردىڭ جالپى ەرەجە بويىنشا ءوز اتاۋىن, ۇرانىن, ەمبلەماسىن تانىستىرۋمەن باستالدى. ودان ءارى تاڭدالىنعان تاقىرىپ بويىنشا بەينەسيۋجەت كورسەتىلىپ, كوماندالار بالدىق جۇيەمەن باعالاندى. وليمپيادانىڭ ەكىنشى كەزەڭى Kahoot پلاتفورماسىندا نەگىزگى پاندەر مەن مەديا بويىنشا قۇرالعان لوگيكالىق سۇراقتاردان تەست تاپسىرۋمەن جالعاستى.
ەلىمىزدىڭ 16 جوعارعى وقۋ ورنىنان بىلىمدەرىن سىناۋعا كەلگەن كەلگەن 48 جاس جۋرناليست ءوزارا تارتىسقا ءتۇستى. وليمپيادانىڭ ەكىنشى كۇنىندە «گازەت جانرلارى» بويىنشا جازباشا جۇمىس ورىندالۋدا. مۇندا جازبانىڭ مازمۇنى مەن جاريالانۋ وپەراتيۆتىلىگى باستى ورىنعا شىقپاق. سايىس اياسىندا بولاشاق ارىپتەستەر ءبىر-بىرىمەن تانىسىپ, پىكىر الماسىپ, دوستىق قارىم-قاتىناس ورناتۋدا. وسىدان ءبىر جىل بۇرىن حالەل دوسمۇحامەدوۆ اتىنداعى اتىراۋ ۋنيۆەرسيتەتىندە ونلاين وليمپيادا ءوتتى. ول كەزدە حقتۋ ۋنيۆەرسيتەتى جەڭىمپاز اتانعان. بۇل ءبىلىم بايگەسىنىڭ ەرەكشەلىگى دە سول, ۇتقان كوماندا كەلەسى جىلى وسى ءداستۇردى وزدەرىنىڭ جوعارعى وقۋ ورىندارىندا وتكىزۋ مۇمكىندىگىنە يە بولادى. بۇل جاس جۋرناليستەردى كاسىبي شىڭداۋمەن قاتار, ولاردىڭ وقۋ ورىندارى ءۇشىن تاريح بەتتەرىندە جازىلاتىن ماڭىزدى كۇن بولماق.
ال بيىلعى كيەلى تۇركىستان شاھارىنداعى وليمديادا عاجاپ دەر ەدىم! ەر تۇرىكتىڭ بەسىگىنە اينالعان بۇل قالانىڭ ءار تۇرعىنى ءدال اۋا-رايىنىڭ جىلۋلىعىنداي جايدارلى ەكەن. تاۋلىكتىڭ قاي مەزگىلىنە قاراماي, ءار قالانىڭ تۇكپىر-تۇكپىرىنەن جينالعان كوماندالاردى ەرەكشە قارسى الىپ, جاتار ورىندارىنا دەيىن شىعارىپ سالىپ, قالانىڭ اسەم جەرلەرىن ارالاتىپ, كونتسەرتتىك باعدارلاما مەن اق داستارحانعا جايىلعان اۋىز اشاردىڭ قوناعى ەتتى. كونە قالانىڭ اسەمدىگىندە ءسوز جوق! تاپ ءبىر شەت ەل دەرسىز. الايدا, تۇركىستان ءۇشىن بۇل ءالى باستاماسى. سەبەبى, جوعارىدا ايتقان 30 جاڭا جوبا, ۋنيۆەرسيتەتتىڭ 30 جىلدىعىنا وراي بىلتىر قابىلدانىپ, قازىرگى تاڭدا جۇزەگە اسۋعا قادامدار جاسالۋدا. بۇل تەك ۋنيۆەرسيتەت مادەنيەتىن عانا ەمەس, شاھاردىڭ ماتەريالدىق ەمەس, مادەني مۇراسىن ارتتىراتىن تىڭ جوبا. مۇندا جاستاردى جۇمىسپەن قامتاماسىز ەتۋ, ولارعا جاڭاشا ءبىلىم بەرۋدىڭ بارلىق مۇمكىندىگى ءتىپتى, بىرنەشە شەت تىلدەرىن ەركىن مەڭگەرۋ جولدارى مەن قاتار, ەكولوگيا ماسەلەلەردىڭ ءبارى قاراستىرىلعان.
بيتاي اياۋلىم,
ل.ن. گۋميلەۆ اتىنداعى
ەۋرازيا ۇلتتىق ۋنيۆەرسيتەتى
جۋرناليستيكا جانە ساياساتتانۋ فاكۋلتەتىنىڭ 4 كۋرس ستۋدەنتى
