«قالانىڭ باس جوسپارىندا كولىكتىك دامۋ ءبولىمى بار. بىراق ۋاقىت تالابى مەن ۋربانيزاتسيانى, جاڭا سىن-تەگەۋرىندەردى ەسكەرە وتىرىپ, بۇرىلۋ الاڭدارى, جاياۋ جۇرگىنشىلەر, باعدارشامدار جانە باسقا دا ماسەلەلەردى جازىپ, كەشەندى كولىك سحەماسىنىڭ دامۋىن جەكە ءبولىپ كورسەتۋ قاجەت. الەمدىك تاجىريبەدە قالالىق جانە كولىكتىك جوسپارلاۋ – قالا قۇرىلىسىنىڭ ءوزارا بايلانىستى جانە ءوزارا تاۋەلدى ەلەمەنتتەرى», دەدى ب.يگەنبەردينوۆ.
سونىمەن قاتار كولىك كومپانياسىنىڭ باسشىسى قالالىق كولىكتى باسقاراتىن ۇيىمدار اراسىنداعى ۇيلەستىرۋ جۇمىستارىن كۇشەيتۋ قاجەت ەكەنىن اتاپ ءوتتى.
«بۇعان قوسا ماگيسترالدى كوشەلەر مەن وزەن ارقىلى وتەتىن كوپىرلەر سانىن ارتتىرۋ قاجەت. تۇرعىن ورامدارى قۇرىلىسىن كولىكتەر اۋقىمىن ەسكەرە وتىرىپ جوسپارلاۋ كەرەك. بۇل رەتتە قالالىق كولىكتى باسقارۋ سالاسىنداعى ستراتەگيالىق قۇجات – كەشەندى كولىك سحەماسىن جاساۋ ەڭ دۇرىس شەشىم بولادى», دەدى ب.يگەنبەردينوۆ.
كەشەندى كولىك سحەماسى (ككس) قالادا قالالىق كولىكتى ۇيىمداستىرۋ مەن باسقارۋعا قاتىستى قولدانىستاعى قۇقىقتىق جۇيەدەگى ولقىلىقتار مەن قايشىلىقتاردى انىقتايدى, جەر پايدالانۋ مەن قالالىق كولىكتى جوسپارلاۋدى, قالالىق كولىك سالاسىنا تارتىلعان ورگانداردىڭ فۋنكتسيالارى مەن وكىلەتتىكتەرىن بىرىكتىرەدى. سونداي-اق قوعامدىق كولىك, جول-كولىك ينفراقۇرىلىمى, جول قوزعالىسىن ۇيىمداستىرۋ, كولىك اعىندارىن باسقارۋ, تۇراق كەڭىستىگى جانە ت.ب. سالالارداعى پروبلەمالاردى شەشۋدى ۇسىنادى.
كەشەندى كولىك سحەماسىنىڭ تۇجىرىمداماسىن قالالىق ءماسليحات بەكىتتى. ۇكىمەتپەن, يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ قارجىلاندىرۋ كوزدەرى كەلىسىلەدى. بۇدان ءارى ككس-ءتى ىسكە اسىرۋ قولعا الىنادى. ككس ازىرلەۋمەن قاتار نۇر-سۇلتان قالاسىنىڭ اۋماعىن 2025 جىلعا دەيىن دامىتۋ باعدارلاماسىندا نىسانالى كورسەتكىشتەردى نازارعا الۋ قاجەت.
ايتا كەتۋ كەرەك, ەلوردا اكىمدىگى جول ينفراقۇرىلىمىن دامىتۋعا ەرەكشە كوڭىل بولەدى. وسى جىلى 100-گە جۋىق كوشە سالىنىپ, جوندەلەدى. كەيىنگى ەكى جىلدا 300-گە جۋىق كوشە جوندەلدى, ونىڭ جارتىسى – تۇرعىن ءۇي الاپتارىنداعى كوشەلەر.
سونىمەن قاتار ۇلى دالا داڭعىلىندا ەكى اۆتوكولىك كوپىرىنىڭ قۇرىلىسى ءجۇرىپ جاتىر. بۇل وسى جىلى اياقتالادى. ەسىل وزەنى ارقىلى تاۋەلسىزدىك داڭعىلىنداعى كوپىردىڭ قۇرىلىسى 2023 جىلى اياقتالادى. بۇل جۇمىستار اياقتالسا, جولداعى ترافيك ايتارلىقتاي جەڭىلدەيدى. سونداي-اق الاش تاس جولى بويىنداعى كوپىرگە («بۇكىر كوپىر») كۇردەلى جوندەۋ, جاڭا جولايىرىقتارىن جوبالاۋ جانە ت. ب. جۇمىستار جۇرگىزىلىپ جاتىر.
