بولجامعا سۇيەنسەك, الەمدىك ءوسىم 2021 جىلى باعالانعان 6,1 پايىزدان 2022 جانە 2023 جىلدارى 3,6 پايىزعا دەيىن تومەندەيدى. قور ساراپشىلارىنىڭ سوزىنە قاراعاندا, ۋكرايناداعى سوعىس اسا كۇردەلى گۋمانيتارلىق داعدارىستىڭ تۋىنداۋىنا سەبەپ بولدى. سوندىقتان ەكونوميكالىق شىعىن دا كۇرت كوبەيىپ, ءوسىم باياۋلايدى. بۇل ءوز كەزەگىندە ينفلياتسيانىڭ قارقىن الۋىنا جول اشىپ بەرەدى. قازىردىڭ وزىندە الەمنىڭ كوپتەگەن ەلىندە وتىن مەن ازىق-ت ۇلىك باعاسى قاتتى ءوسىپ جاتىر. مۇنداي قىمباتشىلىقتىڭ اسىرەسە, الەۋمەتتىك ءالسىز توپتارعا سوققى بولىپ تيەرى ءسوزسىز.
ورتا مەرزىمدى پەرسپەكتيۆادا كەلەر جىلى جاھان ەكونوميكاسى 3,3 پايىزعا تومەندەيدى دەپ كۇتىلەدى. سوعىس سالدارىنان تۋىنداعان باعا ءوسىمى قىمباتشىلىققا ودان سايىن جەل بەرىپ, ينفلياتسيا دەڭگەيى ەكونوميكاسى دامىعان ەلدەردە – 5-7, نارىعى ەندى ەڭسە تىكتەپ كەلە جاتقان ەلدەردە – 8-7, ال دامۋشى نارىقتاردا 9-10 پايىز مەجەسىندە قالىپتاسپاق. بۇل رەتتە گۋمانيتارلىق داعدارىستىڭ جولىن كەسۋ, ەكونوميكالىق قۇلدىراۋدىڭ الدىن الۋ, جاھاندىق وتىمدىلىكتى قولداۋ, قارىز داعدارىسىن ءساتتى باسقارا ءبىلۋ, كليماتتىڭ وزگەرۋىمەن كۇرەسۋ جانە پاندەميانى توقتاتۋ ەرەكشە ماڭىزعا يە بولماق.
سونداي-اق باتىس تاراپىنان ماسكەۋگە سالىنىپ جاتقان سانكتسيالار اعىنى كومىرسۋتەگى باعاسىنىڭ كەنەتتەن قىمباتتاپ كەتۋىنە اسەر ەتتى. بايانداماعا زەر سالساق, بىلتىرمەن سالىستىرعاندا بيىل مۇناي باعاسى 55, ال گاز باعاسى 147 پايىزعا قىمباتتايدى. بۇل رەتتە رەسەي گازى مەن مۇنايىنان تولىقتاي باس تارتۋ شاراسى ەۋروپادا جانە دامۋشى نارىقتاردا, سونىمەن قاتار اقش-تا پايىزدىق ستاۆكالاردىڭ جوعارىلاۋىنا, ينفلياتسيانىڭ جەدەلدەۋىنە سەبەپ بولاتىنىن ەسكەرتەدى.
بۇعان دەيىن دۇنيەجۇزىلىك بانكتىڭ باسشىسى دەۆيد ميلپاسس تا 2022 جىلى الەم ەكونوميكاسىنىڭ ءوسىمى 4,1-دەن 3,2 پايىزعا تومەندەيدى دەپ بولجام ايتقان ەدى. بۇعان سەبەپ بولاتىن باستى فاكتورلار – ۋكرايناداعى داعدارىس, قىتايداعى COVID-19-عا بايلانىستى پايدا بولعان لوكداۋن, ەنەرگيا تاسىمالداۋشىلار, تىڭايتقىش پەن ازىق-ت ۇلىك باعاسىنىڭ ءوسۋى.
