وتىرىسقا قاتىسقان پارلامەنت ءماجىلىسىنىڭ دەپۋتاتتارى, ساياساتتانۋشىلار مەن ساراپشىلار ۇلتتىق قۇرىلتايدىڭ ەرەكشەلىگى مەن ماڭىزىنا توقتالىپ, ءوز پىكىرلەرىن ورتاعا سالدى.
مەملەكەت باسشىسى حالىققا جولداۋىندا ۇلتتىق قوعامدىق سەنىم كەڭەسى ءوز مىندەتىن تابىستى اتقارعانىن ايتىپ, ونىڭ ورنىنا قۇرامى جاعىنان اۋقىمدى ۇلتتىق قۇرىلتاي قۇرۋدى ۇسىنعانى بەلگىلى.
جيىن مودەراتورى – قازاقستاندىق قوعامدىق دامۋ ينستيتۋتىنىڭ باسقارما توراعاسى قازبەك مايگەلدينوۆ جاڭا ينستيتۋتتىڭ ءرولى مەن مىندەتتەرى ەرەكشە ەكەنىن جانە جاڭا قازاقستاندى قۇرۋدا تاريحي ماڭىزعا يە دەپ اتاپ ءوتتى.
جاڭادان جاساقتالىپ جاتقان ۇيىمنىڭ ماڭىزى مەن قاجەتتىلىگى, باعىتى تۋرالى ءماجىلىس دەپۋتاتى, ۇلتتىق قوعامدىق سەنىم كەڭەسىنىڭ مۇشەسى ەدىل جاڭبىرشين ايتىپ بەردى.
«قوعامدا ۇلكەن ترانسفورماتسيا ءجۇرىپ جاتىر. قاڭتار وقيعاسىنان كەيىن حالىق ەلىمىزدىڭ دامۋىن سۇراپ وتىر. قاڭتار وقيعاسىندا الاڭعا شىققان جاندار قوعامدا قوردالانعان ساياسي, الەۋمەتتىك-ەكونوميكالىق ماسەلەلەردىڭ بارىن ايتتى. حالىقتىڭ ءۇنى بيلىككە جەتە بەرمەيدى, بيلىك حالىقتىڭ بارلىق ماسەلەسىن شەشە بەرمەيدى. سوندىقتان تىعىرىققا تىرەلدىك. قۇرىلتايدى قۇرماس بۇرىن ونىڭ ماقساتى, وزگە قۇرىلىمداردان ايىرماشىلىعى, مىندەتتەرى, سانى مەن ساپاسى قانداي دەگەن سۇراقتارعا جاۋاپ بەرىپ, كۇن تارتىبىنە شىعاتىن ماسەلەلەر مەن قاي ۋاقىتتا وتەتىنىن انىقتاپ الۋىمىز كەرەك. ماقساتى – قازاقستان حالقىن الاڭداتاتىن ماسەلەلەردى تالقىلاپ, سولاردى شەشۋى كەرەك دەپ ويلايمىن. ماسەلەن, پارتيا ارنايى ءبىر توپتىڭ مۇددەسىن قورعايدى, ماقساتى – بيلىككە كەلۋ. ال قۇرىلتاي ەل ىشىندە قوردالانىپ, ءسىڭىرى شىققان ماسەلەلەردى كوتەرۋگە يتەرمەلەيدى», دەدى ءماجىلىس دەپۋتاتى.
ۇلتتىق قۇرىلتاي قۇرامى تۋرالى ءماجىلىسىنىڭ دەپۋتاتى ەرلان سايروۆ تا ءسوز الدى. «ەڭ نەگىزگى ماسەلە – گەوساياسي احۋالدىڭ مەملەكەتتەردىڭ ىشكى ماسەلەسىنە اسەر ەتىپ جاتقانىن كورىپ وتىرمىز. دۇنيە جۇزىندە قۇندىلىقتار قاقتىعىسى بولىپ جاتىر. ۇلتتىق قۇرىلتاي سىرتقى وقيعالاردىڭ ەلىمىزدەگى احۋالعا اسەرىن ازايتىپ, ءارتۇرلى ساياسي كوزقاراستاعى جانداردىڭ باسىن قوسۋدى كوزدەۋى كەرەك. ءبىزدىڭ ۇستانىمىمىز, كەيبىر ماسەلەگە قاتىستى پىكىرىمىز باسقاشا بولعانىمەن, ورتاق قۇندىلىعىمىز – قازاقستاننىڭ تاۋەلسىزدىگىن ساقتاپ قالۋدا بىرىگۋىمىز كەرەك. ەڭ الدىمەن, الەۋمەتتىك ادىلەتسىزدىك, ەكونوميكاداعى مونوپوليا سەكىلدى وزەكتى ماسەلەلەردى شەشىپ الماي, قوعامدى تۇتاستاي بىرىكتىرۋ مۇمكىن ەمەس», دەدى ۇلتتىق قوعامدىق سەنىم كەڭەسىنىڭ مۇشەسى ە.سايروۆ.
ءماجىلىس دەپۋتاتى ساياسات نۇربەك ۇلتتىق قۇرىلتايدىڭ ەلىمىزدە جاڭا ساياسي مادەنيەت قالىپتاستىرۋدا ماڭىزدى ءرول وينايتىنىن اتاپ ءوتتى. «جاڭا قازاقستاندى جاڭا قاعيداتتار مەن جاڭا جۇمىس فورماتتارىنان باستاۋ كەرەك. ۇلتتىق قۇرىلتاي ينستيتۋتىن قۇرۋ بارلىق ۇلتتىق جوبا مەن ستراتەگيالىق قۇجاتتاردى اشىق تالقىلاۋدى قامتاماسىز ەتۋگە مۇمكىندىك بەرەدى. بۇل – مەملەكەت پەن جۇرتشىلىقتىڭ ەل دامۋىنىڭ نەعۇرلىم ءتيىمدى مودەلىن ازىرلەۋ بويىنشا ورتاق جۇمىسى», دەپ اتاپ ءوتتى س.نۇربەك.
ۇلتتىق سەنىم كەڭەسىنىڭ مۇشەسى, قازاقستان حالقى اسسامبلەياسى حاتشىلىعى مەڭگەرۋشىسىنىڭ ورىنباسارى ينديرا رىستينا حالىق پەن بيلىكتىڭ اراسىندا ديالوگ ورناتاتىن ينستيتۋتتار تۋرالى ماسەلە كوتەردى. «قوعام مەن حالىق اراسىندا وزدەرىن مەملەكەتتىڭ ازاماتى رەتىندە ەمەس, مەملەكەتتىك قىزمەتتى تۇتىنۋشى رەتىندە قاراپ وتىرعاندار بار. بۇل ەكى ۇعىمنىڭ ايىرماشىلىعى بار. ازامات مەملەكەتتىڭ دامۋى ءۇشىن ءوز ۇلەسىن قوسۋعا تىرىسسا, تۇتىنۋشى مەملەكەت ماعان نە بەرەدى دەگەن ويمەن ءومىر سۇرەدى. وسى وتپەلى كەزەڭدە اشىق ديالوگ ورناتۋعا تىرىساتىن دەموكراتيالىق ينستيتۋتتاردىڭ ماڭىزى زور. ۇلتتىق سەنىم كەڭەسى, ۇلتتىق قۇرىلتاي سەكىلدى قوعامدىق كەڭەستەر وسى ءرولدى اتقارادى», دەدى ول.
ساراپشىلار ۇلتتىق قۇرىلتاي قوعامدىق ديالوگتىڭ بىرىڭعاي مودەلىن قالىپتاستىرىپ, بيلىك پەن حالىق اراسىن بايلانىستىرۋشى كوپىرگە اينالۋعا ءتيىس, سونداي-اق ول جالپىۇلتتىق ديالوگتىڭ شەكاراسىن كەڭەيتەدى دەگەن پىكىر ءبىلدىردى.
