«ۇشاق بورتىندا قاۋىپتى دەپ جىكتەلگەن جۇك بولعان جوق. ۇشۋلاردى باقىلاۋ ينفراقۇرىلىمىنىڭ جۇمىسىندا جانە تەحنيكالىق اقاۋلار انىقتالمادى. قاۋىپتى اۋا رايى تۋرالى اقپارات تا جاريالانبادى», دەلىنگەن قۇجاتتا.
23 ناۋرىزدا قۇتقارۋشىلار ءبىرىنشى «قارا جاشىكتى» تاپتى, ول دىبىس جازۋ قۇرىلعىسى (CVR) بولىپ شىقتى. 27 ناۋرىزدا ەكىنشى ۇشۋ دەرەكتەرىن جازۋ قۇرىلعىسى (DFR) تابىلدى. حالىقارالىق ازاماتتىق اۆياتسيا تۋرالى كونۆەنتسياعا سايكەس, وقيعا بولعان كۇننەن باستاپ 30 كۇن ىشىندە تەرگەۋدى ۇيىمداستىراتىن مەملەكەت يكاو-عا الدىن الا تەرگەۋ ەسەبىن جىبەرۋگە مىندەتتى.
«ۇشاق كۋنمين قالاسىنداعى چانشۋي اۋەجايىنان جەرگىلىكتى ۋاقىت بويىنشا 13:16-دا كوتەرىلىپ, ساعات 13:27-دە 8900 م بيىكتىككە جەتىپ, 14:17-دە گۋانچجوۋ اۋە قوزعالىسىن باسقارۋ ايماعىنا كىردى. ساعات 14:20-دا گۋانچجوۋ ايماقتىق اۋە قوزعالىسىن باسقارۋ رادارىندا «كوماندالىق بيىكتىكتەن اۋىتقۋ» ەسكەرتۋى پايدا بولدى. ساعات 14:21-دە رادار سوڭعى رەت كەلەسى اقپاراتتى تىركەدى: بيىكتىگى - 3380 م, جەر ۇستىندەگى جىلدامدىعى - 1010 كم/ساع. سودان كەيىن ۇشاقتىڭ راديولوكاتسيالىق سيگنالى جوعالىپ كەتتى», دەلىنگەن حابارلامادا.
بۇعان دەيىن قحر ازاماتتىق اۆياتسيا باسقارماسى حابارلاعانداي, Boeing 737 اۋە كەمەسى 2015 جىلدىڭ ماۋسىم ايىندا پايدالانۋعا بەرىلگەن. اپاتقا دەيىن ۇشاق 8 986 ۇشۋدى ورىنداپ, جالپى ۇشۋ ۇزاقتىعى 18 239 ساعاتقا جەتكەن.
ەسكە سالا كەتەيىك, 21 ناۋرىزدا قىتايدىڭ وڭتۇستىگىندەگى گۋانسي-چجۋان اۆتونوميالىق اۋدانىندا (گچار) كۋنمين قالاسىنان گۋانچجوۋعا باعىت العان China Eastern Airlines اۋە كومپانياسىنىڭ Boeing 737 جولاۋشىلار ۇشاعى اپاتقا ۇشىراعان بولاتىن.
وقيعا ۋچجوۋ قالالىق وكرۋگىنە جاقىن تاۋلى ايماقتا بولدى. قىتاي حالىق رەسپۋبليكاسىنىڭ ازاماتتىق اۆياتسيا باسقارماسىنىڭ مالىمەتى بويىنشا, ۇشاق بورتىندا 132 ادام – 123 جولاۋشى (ولاردىڭ اراسىندا شەتەل ازاماتتارى بولعان جوق) جانە 9 ەكيپاج مۇشەسى بولعان.
