ارينە, 2021 جىلى پرەزيدەنتتىڭ «قازاقستان رەسپۋبليكاسىنىڭ ادام قۇقىقتارىن قورعاۋ سالاسىنداعى ودان ءارى شارالارى تۋرالى» جارلىعى مەملەكەتىمىز, ساياساتىمىز ءۇشىن وتە ماڭىزدى. بۇل گۋمانيزمگە جاسالعان سونى قادام دەپ ايتساق تا قاتەلەسپەيمىز.
جارلىقتى حالىقارالىق قاۋىمداستىق جاقسى قابىلدادى. قۇجاتقا كوپتەگەن وزگەرىس ەنگىزىلدى. اتاپ ايتساق, ءدىني زاڭنامانى ىرىقتاندىرۋ, ءولىم جازاسىن الىپ تاستاۋ, ايەلدەرگە قاتىستى ساياسات, قۇقىق قورعاۋ جانە سوت جۇيەلەرىن جەتىلدىرۋ, سونداي-اق مۇگەدەكتەرگە قاتىستى ساياسات پەن ادام ساۋداسىنا جول بەرمەۋ سالاسىندا جاسالعان جۇمىستار جوعارى باعالاندى.
سونداي-اق مۇگەدەكتەردىڭ ءومىر ءسۇرۋ ساپاسىن جاقسارتۋ ماقساتىندا زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ ماقساتىندا زاڭ جوبالارى ازىرلەندى. وسىلايشا, مۇمكىندىگى شەكتەۋلى ازاماتتاردىڭ قۇقىقتارى تۋرالى كونۆەنتسياعا فاكۋلتاتيۆتىك حاتتامانى راتيفيكاتسيالاۋ كوزدەلىپ وتىر. ازاماتتىق باستامالاردى قولداۋدى كەڭەيتۋ بولىگىندە كوممەرتسيالىق ەمەس ۇيىمداردىڭ قىزمەتىن گرانتتىق قارجىلاندىرۋ مەحانيزمى قايتا قۇرىلماق.
بۇدان بولەك, سوتتالعاندار مەن قاماۋعا الىنعان ادامداردى مەديتسينالىق قامتاماسىز ەتۋ فۋنكتسيالارىن ىشكى ىستەر مينيسترلىگىنەن دەنساۋلىق ساقتاۋ مينيسترلىگىنە كەزەڭ-كەزەڭىمەن بەرۋ كوزدەلىپ وتىر. بۇل شەشىمدى دە مەملەكەتتىك ساياساتتاعى گۋمانيستىك كوزقاراستىڭ بەلگىسى دەپ ساناساق بولادى. حالىقارالىق ارەنادا مۇنداي ارەكەتتى جوعارى باعالايتىنى بەلگىلى.
سونىمەن قاتار جارلىققا سايكەس, ۇكىمەتكە ادام قۇقىقتارى مەن زاڭدىلىقتى قامتاماسىز ەتۋ سالاسىنداعى ءىس-شارالار جوسپارىن بەكىتۋ تاپسىرىلدى. مۇنىڭ قاتارىندا ايەلدەرگە قاتىستى كەمسىتۋشىلىكتى جويۋ, ەرلەر مەن ايەلدەردىڭ قۇقىقتارى مەن مۇمكىندىكتەرىنىڭ تەڭدىگىن قامتاماسىز ەتۋ سەكىلدى ماسەلەلەر بار. ايەل قۇقىعى كەيىنگى كەزدە قوعامدا وزەكتى بولىپ تۇرعانى بەلگىلى. سوندىقتان جاڭا قۇجات وسى سالاداعى كەمشىلىكتەردى جويۋعا باعىتتالعان.
بىرلەستىكتەر بوستاندىعى قۇقىعى, مۇگەدەكتەرگە قاتىستى ادام قۇقىقتارى, قىلمىستىق سوت تورەلىگى, جازانى ورىنداۋ جانە ازاپتاۋ مەن قاتىگەزدىكتىڭ الدىن الۋ سالاسىنداعى ادام قۇقىقتارى دا قۇجاتتا ناقتى كورسەتىلدى. قاڭتار وقيعاسىنان كەيىن قاماۋدا وتىرعان, تەرگەۋ يزولياتورىنا تۇسكەن كوپتەگەن ازامات ازاپتاۋعا ۇشىراعانىن ەستىدىك. قۇقىق قورعاۋ ورگاندارىنىڭ قىزمەتىنە قاتىستى كوپتەگەن ارىز-شاعىم ءتۇستى. مەملەكەت باسشىسىنىڭ جارلىعىندا وسى ماسەلەلەر دە قامتىلعان.
ادام ساۋداسى قۇرباندارىنىڭ قۇقىقتارىن قامتاماسىز ەتۋ, ميگرانتتارعا, ازاماتتىعى جوق ادامدارعا جانە بوسقىندارعا قاتىستى ادام قۇقىقتارى دا باسىم باعىتتاردىڭ ءبىرى. سونداي-اق بۇۇ ورگاندارىمەن ءوزارا ءىس-قيمىل تەتىكتەرىن جەتىلدىرۋ دە ماڭىزعا يە. بىلايشا ايتقاندا, حالىقارالىق ۇيىممەن تىعىز جۇمىس ىستەۋ كوزدەلىپ وتىر.
بۇل قۇجات ەلىمىزدىڭ, مەملەكەتتىك ساياساتتىڭ دامۋىنا, ادام قۇقىقتارىنىڭ بۇزىلماۋىنا جانە ونىڭ الەمدىك دەڭگەيدە قورعالۋىنا ۇلەس قوساتىنى ءسوزسىز. مەملەكەت باسشىسى قاسىم-جومارت توقاەۆتىڭ جارلىعى ەلىمىزدەگى ادام قۇقىقتارىن قورعاۋ سالاسىنداعى كوپتەگەن ماسەلەلەردى شەشىپ, ەلىمىزدە ادام قۇقىقتارىنىڭ وركەندەۋىنە باستايتىنىنا سەنىمدىمىن.
ابزال بەكبوسىنوۆ,
نۇر-سۇلتان قالالىق ادۆوكاتتار القاسىنىڭ ادۆوكاتى,
پرەزيدەنت جانىنداعى ادام قۇقىقتارى جونىندەگى كوميسسيانىڭ عىلىمي-ساراپتامالىق كەڭەسىنىڭ مۇشەسى
