قاندى قاقتىعىسقا ۇلاسقان جاپپاي ەرەۋىل ەڭ الدىمەن ەل بىرلىگىنە سىنا قاقتى. تىنىشتىعىن بۇزىپ, قاۋىپسىزدىگىنە نۇقسان كەلتىردى. سالدارىنان كۇشتىك قۇرىلىمداردى قايتا قالىپتاستىرۋ, مەملەكەتتىك توڭكەرىس جاساماق بولعان تەرىس پيعىلدى توپتاردى دەرەۋ جازاعا تارتۋ, ازاماتتىق قوعام مەن قۇزىرلى ورگانداردىڭ ىنتىماقتاستىعىن ورناتۋ شارالارى مەزگىل ماسەلەسىنە اينالدى. بۇل تۋرالى مەملەكەت باسشىسى «جاڭا قازاقستان: جاڭارۋ مەن جاڭعىرۋ جولى» اتتى حالىققا جولداۋىندا جان-جاقتى بايانداپ, كەڭىنەن ءتۇسىندىردى.
پرەزيدەنت جاڭا سيپاتتاعى ساياسي وزگەرىستەردىڭ قارقىنىن ۇدەتىپ, ەلىمىزدەگى ورنىققان ساياسي جۇيەنى كەشەندى جاڭعىرتۋ ارقىلى قوعامداعى جاۋاپكەرشىلىك پەن سەنىمنىڭ ارتۋىنا جول اشاتىنىن, حالىققا كوزبەن كورىپ, قولمەن ۇستاۋعا بولاتىن ناقتى ناتيجە مەن وڭ وزگەرىس ۇسىناتىنىن مالىمدەدى. بۇعان قوسا ساياسي دامۋ مودەلىمىزدى جاڭا جاھاندىق احۋالعا بەيىمدەۋ ءۇشىن سۋپەرپرەزيدەنتتىك باسقارۋدى تاريح ەنشىسىنە قالدىرىپ, جاڭا كەزەڭدە كۇشتى پارلامەنتكە سۇيەنەتىن پرەزيدەنتتىك باسقارۋ جۇيەسىنە وتەتىنىن ايتتى.
قاسىم-جومارت توقاەۆ ساياساتتاعى مونوپوليا داعدارىس پەن الەۋمەتتىك كەسەلگە دۋشار ەتەتىنىن ايتىپ, بارلىق وكىلەتتىكتىڭ ءبىر قولعا شوعىرلانۋى كوپپوليۋستى پارتيالىق جۇيەنىڭ قالىپتاسۋىنا مۇمكىندىك بەرمەيتىنىن جەتكىزدى. مەملەكەت باسشىسى الداعى ۋاقىتتا مۇنداي كەلەڭسىزدىك جويىلاتىنىن, ءار بيلىك تارماعى ءوزىنىڭ قۇزىرەتىنە ساي قىزمەت ەتەتىنىن جاريالادى.
پرەزيدەنتتىڭ مەملەكەتتىك باسقارۋ جۇيەسىن قاعازباستىلىقتان ارىلتۋعا باعىتتالعان ارنايى جارلىعى جەدەل ساياسي شەشىم قابىلداۋعا, ءتيىمدى ءارى ناتيجەلى مەملەكەتتىك باسقارۋ جۇيەسىنە كوشۋگە جول اشپاق. ال ورتالىق سايلاۋ كوميسسياسى مەن ەسەپ كوميتەتىنىڭ, كونستيتۋتسيالىق كەڭەس توراعالارىنىڭ, وبلىس اكىمدەرى مەن ولاردىڭ ورىنباسارلارىنىڭ ەشبىر پارتيانىڭ قىزمەتىنە ارالاسپاۋى, پارتيالاردى تىركەۋ تالابىنىڭ جەڭىلدەتىلۋى سىندى باستامالارى ساياسي باسەكەلەستىكتىڭ كورىگىن قىزدىراتىنى ءسوزسىز.
پرەزيدەنتتىڭ باستاماسىمەن پارلامەنت ءماجىلىسىنىڭ ۇشتەن ءبىر بولىگىنىڭ ماجوريتارلىق سايلاۋ جۇيەسى بويىنشا سايلانۋى ازاماتتاردىڭ سايلاۋ كەزىندەگى بەلسەندىلىگىن ارتتىرىپ, سايلانبالى ورگاندارعا ءوزىن ءوزى ۇسىنۋعا مۇمكىندىك بەرەدى.
قاسىم-جومارت توقاەۆ ۇلتتىق قوعامدىق سەنىم كەڭەسىنىڭ ورنىنا ۇلتتىق قۇرىلتاي قۇرۋدى ۇسىندى. مەملەكەت باسشىسىنىڭ مالىمدەۋىنشە, ۇلتتىق قۇرىلتاي قوعامدىق ديالوگتىڭ ينستيتۋتسيونالدى مودەلىن قالىپتاستىرىپ, حالىق پەن بيلىك اراسىندا التىن كوپىرگە اينالادى.
پرەزيدەنتتىڭ بيىلعى جولداۋىن حالقىمىز ۇلكەن ۇمىتپەن كۇتتى, جاڭا جولداۋدا حالىقتىڭ مۇڭ-مۇقتاجى ەستىلىپ, تالاپ-تىلەگى ەسكەرىلدى. ەندىگى ماقسات – بۇكىل ەل بولىپ جۇمىلىپ, جولداۋدا كوتەرىلگەن يگى باستامالاردى ىسكە اسىرۋ.
قازاقستان حالىق پارتياسى ماڭعىستاۋ وبلىستىق فيليالى ەل پرەزيدەنتىنىڭ جولداۋىن كەڭىنەن ناسيحاتتاۋ ماقساتىندا حالىقپەن كەزدەسۋ ۇيىمداستىرىپ, ءوڭىردىڭ الەۋمەتتىك-ەكونوميكالىق سالاسىنداعى وزەكتى ماسەلەلەردى سۇحبات الاڭدارىندا ءجيى تالقىلايدى. سونىڭ ىشىندە وڭىردەگى اگروونەركاسىپ كەشەنىن دامىتۋ, شارۋا قوجالىقتارىنىڭ احۋالىنا مونيتورينگ جاساۋ, حالىقتىڭ ءومىر ءسۇرۋ ساپاسىن جاقسارتۋ, سايلاۋ جۇيەسىندەگى جاڭعىرتۋ ۇدەرىستەرىنە جاستاردىڭ بەلسەندى قاتىسۋىن قامتاماسىز ەتۋ سەكىلدى وزەكتى تاقىرىپتاردى كۇن تارتىبىنە قويادى. جۇمىسپەن قامتۋ, مەملەكەتتىك قىزمەتكەرلەردىڭ بىلىكتىلىگىن ارتتىرۋ, عىلىمدى دامىتۋ, ۇدەمەلى يندۋستريالىق-يننوۆاتسيالىق دامۋ باعدارلاماسىن ودان ءارى جۇزەگە اسىرۋ, سوت-قۇقىقتىق رەفورمانى جەتىلدىرۋ جانە مەملەكەتتىك ءتىلدى دامىتۋ ماسەلەلەرىنە دە ەرەكشە باسىمدىق بەرەدى.
«جۇمىلا كوتەرگەن جۇك جەڭىل» دەمەكشى, بارلىعىمىز كىرىسسەك, پرەزيدەنت جۇكتەگەن تاپسىرمالاردىڭ ورىندالاتىنى ءسوزسىز.
روزا ماحامبەتوۆا,
قازاقستان حالىق پارتياسى ماڭعىستاۋ وبلىستىق فيليالىنىڭ توراعاسى
