قاسىم-جومارت توقاەۆقا قازاقستان ەكونوميكاسىن مونوپوليادان ارىلتۋ جونىندەگى رەفورمالار اياسىندا اگەنتتىككە بەرىلگەن تاپسىرمالاردىڭ ورىندالۋى تۋرالى باياندالدى. س.جۇمانعاريننىڭ ايتۋىنشا, پروكۋراتۋرا ورگاندارى مەن اگەنتتىك سۇيىتىلعان مۇناي گازىن كوتەرمە ساۋدادا ساتاتىنداردىڭ قىزمەتىنە جۇرگىزىلگەن تەكسەرۋ ناتيجەلەرى بويىنشا 5,5 ميلليارد تەڭگە قارجىعا قاتىستى زاڭ بۇزۋشىلىقتاردى انىقتاعان. اۆتوموبيل گازىن بولشەك ساۋداعا شىعاراتىن 193 ساتۋشى مەكەمەگە سالىنعان ايىپپۇل كولەمى 103 ميلليون تەڭگەنى قۇرادى. اگەنتتىكتىڭ ۇسىنىسى بويىنشا ەنەرگەتيكا مينيسترلىگىنىڭ سۇيىتىلعان مۇناي گازىن, باعانىڭ 10 پايىزدىق شەگىن 3 پايىزعا دەيىن ءتۇسىرۋدى قوسا العاندا, ەلەكتروندى ساۋدا الاڭدارى ارقىلى ۇيىمداستىرۋ جانە ساتۋ تارتىبىنە وزگەرىستەر ەنگىزىلدى.
قازىرگى ۋاقىتتا «Eurotransit Nur Zholy», «قازفوسفات», «قازاقمىس» كورپوراتسياسى» جاۋاپكەرشىلىگى شەكتەۋلى سەرىكتەستىكتەرىنە جانە «كاسكور-ترانسسەرۆيس» اكتسيونەرلىك قوعامىنا قاتىستى تەرگەۋ امالدارى جۇرگىزىلۋدە. «قتج» ۇك», «قازاقتەلەكوم», «ايماق» قتا», «ترانستەلەكوم» سياقتى اكتسيونەرلىك قوعامداردا, سونداي-اق ازىق-ت ۇلىك تاۋارلارىن ساتاتىن ساۋدا ورىندارىن جالعا بەرۋ قىزمەتتەرىنە قاتىستى ساۋدا نارىقتارىندا مونوپولياعا قارسى زاڭنامانىڭ بۇزىلۋ بەلگىلەرىن انىقتاۋ ءۇشىن تالداۋ جۇرگىزىلۋدە.
پرەزيدەنتتىڭ مونوپوليالىق توپتارعا كەشەندى تالداۋ جۇرگىزۋ جونىندەگى تاپسىرمالارىن ورىنداۋ ءۇشىن باسەكەلەستىكتى قورعاۋ جانە دامىتۋ اگەنتتىگىنىڭ توراعاسى مۇناي جانە مۇناي ونىمدەرى, تابيعي گاز, ەلەكتر ەنەرگياسى نارىقتارىن, تەمىرجول كولىگى, ازاماتتىق اۆياتسيا قىزمەتتەرى, قوعامدىق كولىك, تەلەكوممۋنيكاتسيالار, قارجى نارىقتارىن مونوپوليادان ارىلتۋ جونىندە ۇسىنىس بەردى. س.جۇمانعارين نەگىزگى تاۋار نارىقتارىن مونوپوليادان ارىلتۋعا جانە بيزنەس ءۇشىن قولايلى باسەكەلەستىك ورتا قالىپتاستىرۋعا باعىتتالعان باسەكەلەستىكتى دامىتۋدىڭ 2022-2026 جىلدارعا ارنالعان تۇجىرىمداماسىنىڭ جوباسىن ازىرلەۋ بارىسى جونىندە دە باياندادى.
مەملەكەت باسشىسى قازاقستاننىڭ بولاشاعى ءۇشىن باسەكەلەستىكتى دامىتۋدىڭ ماڭىزى زور ەكەنىن اتاپ ءوتىپ, ەكونوميكانىڭ ماڭىزدى سالالارىن مونوپوليادان ارىلتۋ جونىندەگى جۇيەلى شارالاردى ىسكە اسىرۋ جۇمىستارىن جالعاستىرۋدى جانە ولاردىڭ ساپالى ورىندالۋىنا باقىلاۋدى قامتاماسىز ەتۋدى تاپسىردى.
