«بۇگىنگى كۇنى 4 پارتيانىڭ قۇجاتتارىن قاراستىرىپ جاتىرمىز. بۇل – «ەل تىرەگى», «حالىق دەربەستىگى», «نامىس» جانە «بايتەرەك» پارتيالارى. «حالىق دەربەستىگى» پارتياسى ەكىنشى كەزەڭگە ءوتتى جانە راستايتىن قۇجاتىن الىپ, سەزىن وتكىزدى. پارتيا قۇرىلتاي سەزىن وتكىزگەننەن كەيىن 20 000 كانديداتتىڭ ءتىزىمىن ۇسىنۋى كەرەك», دەدى ق. مۋسين.
ادىلەت ءمينيسترى قازىرگى تاڭدا زاڭ بويىنشا تىركەۋ مەرزىمى توقتاتىلىپ, پارتيا مۇشەلەرىنىڭ زاڭعا سايكەستىگى تەكسەرىلىپ جاتقانىن, ال قالعان «ەل تىرەگى», «نامىس» جانە «بايتەرەك» پارتيالارى ءالى ءبىرىنشى كەزەڭدە ەكەنىن ايتتى.
«قۇرامىندا كەمىندە 1 000 ادام بولۋى ءتيىس باستاماشىل توپ مۇشەلەرىنىڭ ىشىندە اتى-ءجونى, تەگى نەمەسە اكەسىنىڭ اتىمەن سايكەس كەلمەيتىن جسن-ى دۇرىس ەمەس تۇلعالار انىقتالعان. وكىنىشكە قاراي باسقا پارتيالاردىڭ مۇشەلەرىمەن قاتار قازا تاپقان ازاماتتار دا انىقتالدى. زاڭ بويىنشا قازاقستان ازاماتى تەك ءبىر ساياسي پارتيانىڭ مۇشەسى بولا الادى. سول سەبەپتى ول باسقا پارتيانىڭ قۇرىلۋىنا قاتىسا المايدى. بىراق بۇل بۇزۋشىلىقتاردى تۇزەتۋگە بولادى. ياعني بارلىق كەمشىلىكتى جويعاننان كەيىن تاراپتار قۇجاتتاردى قايتا تاپسىرىپ, كەلەسى كەزەڭدەردەن وتۋگە ءوتىنىش بەرە الادى», دەپ ءسوزىن تارقاتتى ادىلەت ءمينيسترى.
ايتا كەتەيىك, ۆەدومستۆو باسشىسى 2019 جىلدان بەرى ساياسي پارتيانى تىركەۋگە 10 باستاماشىل توپ ءوتىنىش بىلدىرگەنىن اتاپ ءوتتى.
