بۇگىنگى تاڭدا جوسپارلانعان 1 تريلليون تەڭگەنىڭ 534 ميلليارد تەڭگەسى بەرىلدى. دەمەك, «7-20-25» باعدارلاماسىنىڭ ءالى 466 ميلليارد تەڭگە رەزەرۆى بار.
«قازاقستاننىڭ تۇراقتى دامۋ قورى» اق ءباسپاسوز قىزمەتىنىڭ مالىمەتىنشە, «7-20-25» باعدارلاماسى باستاپقى, پايدالانۋعا بەرىلگەن تۇرعىن ءۇيدى ساتىپ الۋعا عانا نەسيە بەرەدى. ەڭ كوپ يپوتەكالىق قارىز نۇر-سۇلتان قالاسىندا بەرىلدى. 212,2 ملرد تەڭگە سوماسىنا 14 232 كرەديت. الماتىدا - 127,5 ملرد تەڭگە سوماسىنا 8 912 كرەديت, شىمكەنتتە – 33 ملرد تەڭگە سوماسىنا 2 843 كرەديت بەرىلدى.
الايدا, تاجىريبە كورسەتىپ وتىرعانداي, ازاماتتاردىڭ كوپشىلىگى اقشانى ۇنەمدەۋ ءۇشىن جانە تاڭداۋ كوپ بولعاندىقتان قۇرىلىسى اياقتالماعان تۇرعىن ءۇيدى برونداۋدى قالايدى.
«وسى تۇستا وتە مۇقيات بولۋ كەرەك. كەيبىر قۇرىلىس كومپانيالارى ساتىپ الۋشىلاردىڭ اقشاسىن جيناپ الۋ ماقساتىندا قازاقستان رەسپۋبليكاسىنىڭ «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭىنىڭ تالاپتارىنا سايكەس كەلمەيتىن تۇرعىن ءۇي ساتىپ الۋدىڭ ءارتۇرلى سحەمالارىن ۇسىنادى. تۇرعىن ءۇي ساتىپ الۋدىڭ بۇل جولىندا اقشا جوعالتۋ قاۋپى بار. وسىعان بايلانىستى, ازاماتتاردان ءار قادامىن تارازىلاپ بارىپ قانا, شەشىم قابىلداۋىن سۇرايمىز», دەلىنگەن حابارلامادا.
يپوتەكالىق باعدارلامانىڭ تالاپتارىندا باعا ءليميتى بەلگىلەنگەن. ساتىپ الىناتىن تۇرعىن ءۇيدىڭ باعاسى نۇر-سۇلتان, الماتى (قالا ماڭى ايماقتارىن قوسا العاندا), اقتاۋ, اتىراۋ جانە شىمكەنت قالالارىندا 25 ميلليون تەڭگەدەن, قاراعاندى قالاسىندا 20 ملن تەڭگەدەن جانە قالعان وڭىرلەردە 15 ملن تەڭگەدەن اسپاۋى ءتيىس.
«7-20-25» باعدارلاماسى حالىقتىڭ بارلىق ساناتتارىنا ارنالعان. اتىندا تۇرعىن ءۇيى جوق, باسقا يپوتەكالىق نەسيەلەرى جوق, ەڭبەك جانە/نەمەسە كاسىپكەرلىك قىزمەتتەن رەسمي تۇردە راستالعان كىرىسى بار ەلدىڭ كەز كەلگەن ازاماتى يپوتەكا الا الادى.
