دوستىق اۋىلدىق وكرۋگىندە ۇيىمداستىرىلعان جيىندا ن.ءابدىروۆ وتكەن جىلى سايلانعان اۋىل اكىمى نۇركەن جارلىكەنوۆ جانە شاقامان اۋىلىنىڭ تۇرعىندارىمەن كەزدەستى. باسقوسۋ كەزىندە اۋىل حالقى ەل پرەزيدەنتىنىڭ بيىلعى جولداۋدا كوتەرگەن سايلاۋ جۇيەسىن ودان ءارى دامىتۋ جونىندە باستامالارىن قولدايتىندىقتارىن ايتتى. تۇرعىندار اۋىل اكىمدەرىن سايلاۋدىڭ ماڭىزدى ەرەكشەلىكتەرىنىڭ ءبىرى رەتىندە سايلاۋشىلاردىڭ «بارىنە قارسىمىن» دەگەن داۋىس بەرۋ قۇقىعى ەنگىزىلگەنىن اتاپ كورسەتتى. «ازاماتتار وزدەرىنىڭ بالاما پوزيتسياسىن زاڭدى تۇردە بىلدىرۋگە مۇمكىندىك الىپ وتىر», دەيدى ولار.
شاكارىم اتىنداعى سەمەي مەملەكەتتىك ۋنيۆەرسيتەتىندە وسك توراعاسى ستۋدەنتتەرمەن كەزدەسىپ, جاستارمەن اشىق اڭگىمە فورماتىندا سۇحبات قۇردى. سەمەيلىك جاستار پارلامەنت جانە ءماسليحاتتار دەپۋتاتتىعىنا كانديداتتارعا قاتىستى سايلاۋ زاڭناماسىنىڭ تالاپتارى, شەتەلدە سايلاۋ ۋچاسكەلەرىن ۇيىمداستىرۋ ءتارتىبى, اسكەري قىزمەتشىلەردىڭ داۋىس بەرۋىنە بايلانىستى وزدەرىن قىزىقتىرعان سۇراقتاردى قويىپ, تولىققاندى جاۋاپ الدى. كەزدەسۋ بارىسىندا ەلەكتروندى, ونىڭ ىشىندە ستاتسيونارلىق جانە قاشىقتان داۋىس بەرۋ ماسەلەلەرى قوزعالدى.
جاستار ەلەكتروندى داۋىس بەرۋدىڭ باستى ارتىقشىلىعى – قولجەتىمدىلىگى, ال كەمشىلىگى اقپاراتتىق قاۋىپسىزدىككە قاتىستى قاۋىپ-قاتەرلەرمەن بايلانىستى ەكەنىن اتاپ ءوتتى. بەلسەندىلەردىڭ ءبىرى ەركەبۇلان ءنۇردىلدا قازىرگى جاستاردىڭ سايلاۋعا قاتىسۋعا قىزىعۋشىلىعى جوق ەكەنىن ايتا كەلىپ, وسىنداي كەزدەسۋلەر ستۋدەنتتەردىڭ بەلسەندىلىگىن ارتتىرۋعا ىقپال ەتەتىنىن جەتكىزدى. ال ستۋدەنت سۇلتان باقىتعاليدىڭ پىكىرىنشە, سايلانبالى قىزمەتكە كانديدات مىندەتتى تۇردە مەملەكەتتىك ءتىلدى مەڭگەرۋى بويىنشا لينگۆيستيكالىق ەمتيحان تاپسىرۋعا ءتيىس.
كەزدەسۋدە سايلاۋ پروتسەسىنىڭ وزەكتى تاقىرىپتارىنا قاتىستى ءداستۇرلى ونلاين ساۋالداما جۇرگىزىلدى. ناتيجەسىندە رەسپوندەنتتەردىڭ 39,6 پايىزى ەلەكتروندى داۋىس بەرۋدى قولداسا, 74,7 پايىزى پرەزيدەنتتىككە كانديدات مەملەكەتتىك ءتىلدى بىلۋگە ءتيىس جانە لينگۆيستيكالىق ەمتيحان تاپسىرۋ مىندەتتى دەپ سانايدى. ال جاۋاپ بەرۋشىلەردىڭ 40,7%-ى سوتتىلىعى بار ازاماتتى پرەزيدەنت, دەپۋتات, اكىم سياقتى سايلانبالى لاۋازىمدارعا ۇسىنۋعا جول بەرۋگە بولمايدى دەپ كورسەتكەن. سونداي-اق رەسپوندەنتتەردىڭ 33 پايىزدان استامى پارتيالىق ءتىزىم بويىنشا سايلانعان دەپۋتات سول سايلانعان پارتياسىنان باسقا پارتياعا اۋىسىپ كەتۋىنە بولمايدى دەپ جاۋاپ بەردى.
ال اباي تەاترىندا وتكەن جيىندا ن.ءابدىروۆ ساياسي پارتيالار, ۇكىمەتتىك ەمەس ۇيىمدار, باق وكىلدەرى, قوعام بەلسەندىلەرى, بلوگەرلەر, سەمەي قالاسى سايلاۋ كوميسسياسىنىڭ مۇشەلەرىمەن كەزدەسىپ, سايلاۋ جۇيەسىن رەفورمالاۋ, سايلاۋ پروتسەستەرىن جاڭعىرتۋ, ازاماتتاردىڭ سايلاۋ ينستيتۋتىنا دەگەن سەنىمىن ارتتىرۋ ماسەلەلەرىن تالقىعا سالدى.
كەزدەسۋگە قاتىسۋشىلار سايلاۋشىلار ءتىزىمىن جاساۋ بويىنشا ناقتى ۇسىنىستارىن ورتاعا سالىپ, سايلاۋشىلار ءتىزىمىن «ازاماتتارعا ارنالعان ۇكىمەت» كورپوراتسياسىنىڭ دەرەكتەر بازاسىمەن بىرىزدەندىرۋدى قامتاماسىز ەتۋ قاجەتتىگىن العا تارتتى. ماسەلەن, قالا تۇرعىنى كەڭەس وتەگەن ۇلى ەسەپتەن شىعارۋ كۋالىكتەرىن بەرۋدى ەلەكتروندى فورماتقا اۋىستىرۋدى ۇسىندى. «ەسەپتەن شىعارۋ كۋالىگىن الۋ ءۇشىن سايلاۋشى ۋچاسكەلىك سايلاۋ كوميسسياسىنا بارىپ, ءوتىنىش بەرۋگە ءتيىس. باسقا قالادا تۇراتىن ازاماتتار ءۇشىن بۇل قولايسىز. ونلاين ءوتىنىم جۇيەسى ەنگىزىلسە, تىركەلگەن جەرىنەن تىس جەردە داۋىس بەرگىسى كەلەتىن سايلاۋشىلار ۇيدەن شىقپاي-اق ءوتىنىش بەرۋگە مۇمكىندىك الار ەدى», دەدى ول.
كەزدەسۋلەردە اۋماقتىق جانە ۋچاسكەلىك سايلاۋ كوميسسيالارىنىڭ اشىقتىعى مەن جاريالىلىعىن قامتاماسىز ەتۋ, ەلەكتروندى داۋىس بەرۋ مۇمكىندىگىنىڭ پەرسپەكتيۆالارى, سايلاۋ پروتسەسىنە قاتىسۋشىلاردىڭ, باق وكىلدەرىنىڭ قۇقىقتىق ساۋاتتىلىعىن ارتتىرۋ ماسەلەلەرى قوزعالدى.
