مەن ولاردى ەرتىپ باس رەداكتورعا اپاردىم. الدەنەگە شۇقشيىپ وتىرعان ول كىسى ء«بارىن شاقىر, جينالىس بولادى», دەدى. جينالىس باستالاردا التى ستۋدەنتتىڭ بۇيىمتايىن سۇراعان باسەكەڭ قولىنا گازەتتىڭ جاڭا ءنومىرىن الىپ: «مىنا ءبىرىنشى بەتتەگى كىسى كىم, تانيسىڭدار ما؟ سەندەر جۋرناليستيكانىڭ ءتورتىنشى كۋرسىن اياقتاعالى جاتىرسىڭدار, بۇل كىسىنى تانىماساڭدار ۇيات ءارى سىن», دەدى. توتەسىنەن كەلەر سىناقتى كۇتپەگەن ستۋدەنتتەر قاپەلىمدە نە دەرىن بىلمەي ساسىپ قالدى. سوسىن مەن تىنىشتىقتى بۇزىپ, «قازىرگى جاستار قايتىس بولىپ كەتكەن قالامگەرلەردى تانىمايدى عوي» دەپ ەم, الگى ستۋدەنتتەر مەنى قوستاپ الا جونەلدى. ءتىپتى ءبىرى «اپايلار بىزگە ءتىرى ادامدار تۋرالى ايتىپ بەرەتىن, ءبىز شىنىمەن بۇرىن قايتىس بولعان كىسىلەردى تانىمايمىز» دەمەسى بار ما؟ ءجۇزى سۇرلانىپ كەتكەن باس رەداكتور باسىن شايقاپ, الدىندا تۇرعان ورىمدەي جاستارعا, بولاشاق «جۋرناليستەرگە» نە دەرىن بىلمەي داعدارىپ قالدى. سوسىن ول: «مىنا جىگىت سەندەردى ادەيى شاتىستىرىپ, جاڭاعى كىسىنى قايتىس بولعان دەپ وتىر, ال ول كىسى ومىردە بار, قالاساڭدار, وسىندا شاقىرايىن, جاقسىلاپ تانىسىپ الىڭدار» دەپ ءسوزىن كوڭىلسىز اياقتادى.
ماعان بۇل التى ستۋدەنتپەن جۇمىس ىستەۋ تاپسىرىلدى. التاۋىنا التى شاعىن ماقالا جازىپ كەلسىن دەپ ايتتىم. ارينە, وزدەرى جازا الاتىن الۋان تاقىرىپتا. ەكى كۇننەن كەيىن الگىلەردەن «ماقالالار» كەلە باستادى. ءبىرىنشىسى بىلاي دەپ باستاپتى. قاز-قالپىندا حاتقا ءتۇسىرىپ وتىرمىن:
«وتكەندە اۋىلعا بارعاندا, اپامنىڭ تاپسىرۋىمەن سيىر ساۋدى ۇيرەندىم. قيىن ەكەن. قازىرگى اۋىل ادامدارىنا جانىم اشيدى. قايتىپ شىداپ ءجۇر دەپ ويلادىم». مىنە, وسىلاي. كۇلەسىز بە, جىلايسىز با؟ ال ەكىنشىسىنىڭ «ماقالاسىنىڭ» تاقىرىبى «كولىكتى بايقاپ جۇرگىزەيىك» دەپ قويىلىپتى. وقۋعا ءداتىم شىدامادى. سولاي دا سولاي, ەكى اي ۋاقىتى بىتكەن ولار «ۇلكەن گازەتتە پراكتيكا كورىپ قايتتىق, كۇشتى بولدى» دەپ بادىرايتىپ تاقىرىپ قويىپ, الەۋمەتتىك جەلىگە ءبىر-ءبىر سۋرەت سالدى دا, تايىپ تۇردى.
بۇل قازىرگى ءبىزدىڭ قوعامداعى كەي جاستاردىڭ كورىنىسى دەۋگە ابدەن بولادى. بىراق ءبىز جاستاردان ءۇمىت كۇتىپ ەدىك قوي, تانىماستىق وزىڭنەن باستالاتىنى وزەكتى قاريتىنىن سەزە باستادىق. اندا-ساندا گازەت بەتىنە سۋرەتى باسىلعان الگى اقىن اعانى ۇلكەن جينالىستاردان, باس قوسۋلاردان كەزدەستىرىپ قالامىن, سوندا الگى التى ستۋدەنتتىڭ تانىماستىعى ويىما ساپ ەتە تۇسەدى. تانىماستىق, ءاي, اتىڭ وشكىر تانىماستىق.
