بۇگىن قازاقستان پرەمەر-ءمينيسترى ءاليحان سمايىلوۆ «ەكو-كۋلتۋرا» اگروونەركاسىپ حولدينگىنىڭ پرەزيدەنتى الەكساندر رۋداكوۆپەن كەزدەستى. كاسىپكەر تۇركىستان وبلىسىنداعى اۋدانى 500 گا بولاتىن جىلىجاي كەشەنى قۇرىلىسىنىڭ جوباسىن تانىستىردى. ينۆەستيتسيالىق جوبا 8 مىڭنان استام جۇمىس ورنىن قۇرۋدى كوزدەيدى. بەس جىلدا ىسكە اسىرۋ جوسپارلانعان. ۇكىمەت باسشىسى تمد كەڭىستىگى اياسىنداعى جوبانىڭ بىرەگەيلىگىن اتاپ ءوتتى.
«اگروونەركاسىپتىك كەشەن – اۋىل شارۋاشىلىعى ونىمدەرىنە سۇرانىس پەن باعانىڭ ءوسۋىن ەسەپكە الساق, ودان ءارى دامۋ الەۋەتى زور ماڭىزدى سالا. وسىنداي ءىرى جوبانى جۇزەگە اسىرۋ ءبىز ءۇشىن ەرەكشە ماڭىزعا يە», دەدى ءاليحان سمايىلوۆ.
ايتا كەتەيىك, «ەكو-كۋلتۋرا» اگروونەركاسىپ حولدينگى 2012 جىلدان بەرى جۇمىس ىستەيدى. كومپانيا قىزمەتىنىڭ نەگىزگى ءتۇرى — وندىرىستىك تسيكلى جىل بويى جالعاساتىن جابىق توپىراقتا كوكونىس ءوسىرۋ. ءاوح قۇرامىنا رەسەيدىڭ بىرنەشە وبلىسىنداعى جۇمىس ىستەپ تۇرعان جىلىجاي كەشەندەرى كىرەدى.
«وڭتۇستىك قازاقستان – كليماتتىق جاعدايلارى مەن ەڭبەك رەسۋرستارى بويىنشا تاپتىرماس جەر. بۇل جوبانى جۇزەگە اسىرۋ ءۇشىن ءبىز تۇركىستان وبلىسىنا كەزدەيسوق نازار اۋدارعان جوقپىز. مۇندا اۋا رايى قولايلى, سونىڭ ارقاسىندا قىس مەزگىلىن پلەنكالى جىلىجايلاردا وتكىزۋگە بولادى. بۇل 500 گا جىلىجاي كلاستەرى بولادى, وندا كوكونىستەردى عانا ەمەس, كوك ءشوپتى, جيدەكتەردى دە وسىرەتىن بولامىز», دەدى ا. رۋداكوۆ.
سونداي-اق اگروحولدينگ باسشىسى جوعارى سينەرگەتيكالىق ناتيجە ءۇشىن جەرگىلىكتى فەرمەرلەرگە اگرونوميالىق قولداۋ كورسەتۋگە, سونداي-اق ءتيىستى كادرلاردى دايارلاۋ بويىنشا وقۋ ورتالىعىن قۇرۋعا نيەت ءبىلدىردى. كەزدەسۋ قورىتىندىسى بويىنشا تاراپتار ينجەنەرلىك ينفراقۇرىلىمدى جۇرگىزۋ, ينۆەستيتسيالىق سۋبسيديالار جانە جوبانى قارجىلاندىرۋعا قاتىستى ماسەلەلەردى مۇقيات پىسىقتاۋعا كەلىستى.
