قوعام • 15 ءساۋىر, 2022

قانداي ءموبيلدى اۋدارىمدار تابىس رەتىندە سانالادى؟

514 رەت

كورسەتىلدى

2 مين

وقۋ ءۇشىن

بۇگىننەن باستاپ قارجى مينيسترلىگىنىڭ مەملەكەتتىك كىرىستەر كوميتەتى جەكە تۇلعالاردىڭ بانك شوتتارىنىڭ اراسىنداعى ءموبيلدى اقشا اۋدارىمدارىنا مونيتورينگ جۇرگىزەدى, دەپ حابارلايدى Egemen.kz.

ارمان ماناربەك ۇلى

قانداي ءموبيلدى اۋدارىمدار تابىس رەتىندە سانالادى؟

قۇجاتقا سايكەس, ءبىر جەكە تۇلعانىڭ كاسىپكەرلىك قىزمەتكە ارنالماعان بانك شوتىنا قاتارىنان كۇنتىزبەلىك ءۇش اي ىشىندە 100 جانە ودان دا كوپ ءارتۇرلى تۇلعادان اقشا تۇسسە, وندا بۇل وپەراتسيالار كاسىپكەرلىك قىزمەتتەن كىرىس الۋ بەلگىلەرى بار وپەراتسيالار قاتارىنا جاتقىزىلادى.

سالىق كودەكسى اياسىندا بانكتەر كەزەڭ-كەزەڭمەن مەملەكەتتىك كىرىستەر ورگاندارىنا قازاقستاندىقتاردىڭ تابىسى تۋرالى اقپارات بەرەدى. بۇل پروتسەسس جالپىعا بىردەي دەكلاراتسيالاۋعا كوشۋ جوسپارىمەن قاتار جۇرگىزىلەدى:

1-ءشى كەزەڭدە (2022 جىلعى 1 قاڭتاردان 2023 جىلعى 1 قاڭتارعا دەيىن) –مەملەكەتتىك قىزمەتكەرلەر مەن ولارعا تەڭەستىرىلگەندەر جانە ولاردىڭ جۇبايى بويىنشا;

2-ءشى كەزەڭ (2023 جىلعى 1 قاڭتاردان 2024 جىلعى 1 قاڭتارعا دەيىن) – بيۋدجەتتىك مەكەمەلەردىڭ قىزمەتكەرلەرى جانە ولاردىڭ جۇبايى, كۆازيمەملەكەتتىك سەكتور سۋبەكتىلەرىنىڭ قىزمەتكەرلەرى جانە ولاردىڭ جۇبايى;

3-ءشى كەزەڭدە (2024 جىلعى 1 قاڭتاردان 2025 جىلعى 1 قاڭتارعا دەيىن) – زاڭدى تۇلعالاردىڭ باسشىلارى, قۇرىلتايشىلارى جانە ولاردىڭ جۇبايى, جەكە كاسىپكەرلەر (يپ) جانە ولاردىڭ جۇبايى;

4-ءشى كەزەڭدە (2025 جىلعى 1 قاڭتاردان باستاپ) – حالىقتىڭ قالعان ساناتى بويىنشا اقپارات بەرىلەدى.

«2023 جىلى ەكىنشى دەڭگەيلى بانكتەر مەن بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار 1-كەزەڭنىڭ تۇلعالارى بويىنشا مالىمەت بەرۋدى جوسپارلاپ وتىر», دەپ ناقتىلادى مەملەكەتتىك كىرىستەر كوميتەتىنىڭ ءباسپاسوز قىزمەتى.

اتالعان بۇيرىقتىڭ جەكە تۇلعالار مەن ادال سالىق تولەۋشىلەردىڭ جەكە اۋدارىمدارىنا ەش قاتىسى جوق. قاراپايىم قازاقستاندىقتاردىڭ كاسىپكەرلىك قىزمەت بەلگىلەرى بار ءموبيلدى اۋدارىمدارى بويىنشا مالىمەت الماسۋ تەك 2025 جىلدان باستاپ ەنگىزىلەدى.