ءبىلىم • 14 ءساۋىر، 2022

ورتالىق قازاقستان اكادەمياسىنىڭ جۇمىسى توقتاتىلدى

بۇل تۋرالى Egemen.kz ءبىلىم جانە عىلىم مينيسترلىگىنە سىلتەمە جاساپ حابارلايدى.

فوتو: www.alem-edu.kz

مينيسترلىك ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى تەكسەرۋ جۇرگىزىپ، كوپتەگەن زاڭ بۇزۋشىلىقتى انىقتادى.

«ورتالىق قازاقستان اكادەمياسىندا ساباقتار تولىق كولەمدە جۇرگىزىلمەدى، وقىتۋشىلار قويىلعان تالاپتارعا سايكەس كەلمەدى. اتاپ ايتقاندا وقىتۋشىلاردىڭ ءبىلىمى مەن عىلىمي دارەجەسى وقىتىلاتىن پاندەرگە سايكەس ەمەس. وقۋ پروتسەسى پراكتيكالىق وقىتۋشىلارمەن، قاجەتتى وقۋ ادەبيەتتەرىمەن قامتاماسىز ەتىلمەگەن. سونىمەن قاتار ۋنيۆەرسيتەتتە ساپانى قامتاماسىز ەتۋدىڭ ىشكى جۇيەسى بولماعان، سونىڭ سالدارىنان ءبىلىم ءبولىمىنىڭ قورىتىندىسى بويىنشا اكادەميانىڭ كادرلاردى دايارلاۋدىڭ التى باعىتىنىڭ ستۋدەنتتەرى شەكتى بالل جيناي الماعان. ودان بولەك ءتيىستى ءبىلىم بەرۋ باعدارلاماسىن مەڭگەرۋ ءۇشىن قاجەتتى پاندەردى قايتا تاپسىرۋدا بۇزۋشىلىقتار انىقتالدى. ارالىق باقىلاۋدى تاپسىرۋ كەزىندە ۋنيۆەرسيتەت پروكتورينگ جۇيەسىن قولدانباعان»، دەپ ايتتى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ باسقارما باسشىسى ەلۆيرا ساپاربەكوۆا.

سونىمەن قاتار جۇمىس بەرۋشىلەردىڭ ءبىلىم بەرۋ باعدارلامالارىنىڭ رەيتينگىن تالداۋ ورتالىق قازاقستان اكادەمياسىنىڭ وقۋ باعدارلامالارىنىڭ باسىم بولىگى جاڭارتىلماعانىن جانە ەڭبەك نارىعى مەن جۇمىس بەرۋشىلەردىڭ سۇرانىسىنا ساي كەلمەيتىنىن كورسەتتى. سول سەبەپتى ماماندىقتىڭ كوپشىلىگى ستۋدەنتتەر اراسىندا سۇرانىسقا يە بولماي، تەك 1-دەن 5 ادامعا دەيىن عانا وقىدى.

اپەللياتسيالىق قۇقىقتى پايدالانا وتىرىپ، ۋنيۆەرسيتەت سوت ورگاندارىنا جۇگىندى. ءبىرىنشى ساتىداعى سوتتار اكادەميانىڭ تالاپتارىن قاناعاتتاندىرۋسىز قالدىرىپ، كوميتەتتىڭ شەشىمدەرىن زاڭدى دەپ تانىدى.

ايتا كەتسەك، جوو قىزمەتىنىڭ ەرەجەسىنە سايكەس ستۋدەنتتەر ۋنيۆەرسيتەت ليتسەنزياسىنىڭ قولدانىلۋى توقتاتىلعان نەمەسە قايتارىپ الىنعان ساتتەن باستاپ وقۋىن جالعاستىرۋ ءۇشىن باسقا جوو-عا اۋىسۋعا قۇقىلى.

«ديپلومنىڭ جارامسىزدىعىنا بايلانىستى قيىندىقتاردى بولدىرماۋ ءۇشىن ستۋدەنتتەر قازىردەن باستاپ باسقا جوو-عا اۋىسا الادى. وقىتۋدىڭ بىرقاتار باعىتى بويىنشا كەيبىر ستۋدەنتتەر قىسقى سەسسيا كەزىندە باسقا ۋنيۆەرسيتەتتەرگە اۋىستى»، دەپ تولىقتىردى ە. ساپاربەكوۆا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز