مۇحتار قۇل-مۇحاممەد ءوز سوزىندە قازاقستان ءداستۇرلى تۇردە ەقىۇ-مەن ءىس جۇزىندەگى ىنتىماقتاستىققا زور ءمان بەرەتىنىن اتاپ ءوتتى. ول مەملەكەت باسشىسى قاسىم-جومارت توقاەۆتىڭ باستاماسى بويىنشا ازاماتتاردىڭ نەگىزگى قۇقىقتارىن قورعاۋ مەن كونستيتۋتسيا ەرەجەلەرىنىڭ قاتاڭ ساقتالۋىنا ەرەكشە نازار اۋدارىلىپ وتىرعانىن اتاپ ءوتتى.
«پرەزيدەنت تاياۋ بولاشاقتا ەكىنشى رەسپۋبليكانى قۇرۋ جونىندەگى جاڭا ماقسات بەلگىلەدى. بۇل قوعامدى تۇلەتۋدىڭ اۋقىمدى ءۇردىسى. مەملەكەتتى باسقارۋعا ازاماتتاردىڭ قاتىسۋىن كەڭەيتۋگە, جاڭا ساياسي مادەنيەتتى قالىپتاستىرۋعا باسا نازار اۋدارىلىپ وتىر. ءبىز قازاقستاننىڭ ورنىقتى دامۋدى ىلگەرىلەتۋ, قولايلى ينۆەستيتسيالىق احۋال جانە زاڭ ۇستەمدىگىن, ادام قۇقىقتارىن نىعايتۋ جونىندەگى باستامالارىن قولداعانى ءۇشىن ەقىۇ-نىڭ نۇر-سۇلتانداعى باعدارلامالار كەڭسەسىنە العىسىمىزدى بىلدىرەمىز», دەدى سەناتور قۇل-مۇحاممەد.
فولكەر فروبارت ءوز كەزەگىندە قازاقستاننىڭ ەقىۇ-عا دەگەن سەنىمىن جوعارى باعالادى, سونداي-اق بۇۇ-نىڭ ورنىقتى دامۋ ماقساتتارىنا قول جەتكىزۋگە وراي جەرگىلىكتى مەملەكەتتىك باسقارۋ مەن ءوزىن-ءوزى باسقارۋدى دامىتۋ جونىندە زاڭنامالىق اكتىلەردى ازىرلەۋگە جاردەم كورسەتۋگە دايىن ەكەنىن ءبىلدىردى.
تاراپتار ورنىقتى دامۋ ماقساتتارى مەن دەپۋتاتتىق كورپۋستىڭ بەلسەندى تۇردە اتسالىسۋىنا قاتىستى تاقىرىپتاردى تالقىلادى. مۇحتار قۇل-مۇحاممەد قازاقستان ەقىۇ پارلامەنتتىك اسسامبلەياسى قارارىنىڭ جوباسىن ازىرلەۋدى جوسپارلاپ وتىرعانىن, وندا ەقىۇ-عا مۇشە ەلدەردىڭ 2030 جىلعا دەيىنگى كەزەڭگە دامۋ سالاسىنداعى مىندەتتەمەلەردى ورىنداۋى جانە ودم ىسكە اسىرۋدىڭ ماڭىزىنا باسا نازار اۋدارىلاتىنىن اتاپ ءوتتى.
قاتىسۋشىلار كەزدەسۋ قورىتىندىسى بويىنشا قاۋىپسىزدىك سەكتورىن رەفورمالاۋدى, كوشى-قوندى باسقارۋدى, ەنەرگيانىڭ تازا تۇرلەرىنە كوشۋدى جانە كليماتتىق, ەكولوگيالىق داعدارىستارمەن كۇرەسكە قوسا ورنىقتى دامۋ ماقساتتارىنا قول جەتكىزۋدى جاقسارتۋعا ىقپال ەتەتىن قۇجاتتى بىرلەسىپ ازىرلەۋ جونىندە ۋاعدالاستى.
