پاندەميانىڭ كەسىرىنەن ۇلان-اسىر توي جاساپ, ارقا-جارقا بولماعالى ەكى جىلدىڭ ءجۇزى بولىپتى. مەرەكەلىك ءىس-شارانى ساعىنىسقان جۇرت اۋدان ورتالىعى – قاسىم قايسەنوۆ كەنتىنە اعىلدى. ۇلان اۋدانىنىڭ 14 اۋىلدىق وكرۋگ وكىلدەرى كيىز ۇيلەرىن قۇرىپ, اق داستارحان جايدى. بۇرق-سارق ساماۋىر قايناپ, ناۋرىزكوجە ساپىرىلدى.
بوزانباي اۋىلدىق وكرۋگى قۇرعان كيىز ءۇيدى قاراڭىز, تابيعي, ەش جاساندىلىق جوق. كىرەبەرىسىندە ساڭقىلداپ, بۇركىت وتىرسا, اۋلاسىندا ەسىكپەن توردەي بولىپ, قۇماي تازى جاتىر. تورىندە تۇلكى مەن كىرپىنىڭ تەرىسى ءىلۋلى تۇر. اۋەلەتە ءان شىرقاپ, كۇمبىرلەتە كۇي توگەمىن دەسەڭىز, ۇكىلى دومبىراڭىز انەكي. زەرگەردىڭ قولىنان شىققان ساندىق ۇستىنە قىزدىڭ جۇگىندەي قۇراق كورپە جينالعان. داستارحاندا ۇلتتىق تاعامدار استا-توك. ءۇي يەسى شاكەرمان وشان كەلىمدى-كەتىمدى قوناقتارعا ناۋرىز كوجە ۇسىنىپ, قوناقجايلىق تانىتۋدا.
– وسى كيىز ۇيمەن ەتنو ءتۋريزمدى قولعا الىپ وتىرمىز. كۇن جىلىنعان سوڭ اۋلامىزعا تىگىپ قويامىز. قوناقتار كەلىپ, قازاقتىڭ ۇمىت بولىپ بارا جاتقان داستۇرلەرىن كورە الادى. قىزىعۋشىلىق تانىتسا, كيىز باسىپ, سىرماق سىرىپ كورسەتەمىز. كەيىن دۇنيە-م ۇلىكتى تۇيەگە تەڭدەپ, قازاقتىڭ كوشىن كورسەتكىمىز كەلەدى, – دەيدى بوزانباي اۋىلىنان كەلگەن شاكەرمان وشان.
سونداي-اق بۇل كۇنى ۇلتتىق سپورت تۇرلەرىنەن جارىستار ۇيىمداستىرىلدى. قىز-جىگىتتەر التىباقان تەۋىپ, ءماز-مەيرام بولىپ جاتسا, بوزكىلەمدە بالۋاندار بەلدەسىپ, كۇش سىناستى. ادەتتەگىدەي قوي كوتەرىپ سايىسقانىمەن, جۇلدە ەرەكشە بولدى. ءبىرىنشى ورىن العان سۇلتان امانتاي قويدى ەنشىلەسە, ەكىنشى ورىنعا ءبىر قاپ قانت, ءۇشىنشى ورىن العان جىگىتكە ءبىر قاپ كارتوپ بەرىلدى. مەرەكەلىك شارالارعا سۋساپ قالعان جۇرت, ءاي ءبىر سەرپىلدى.
شىعىس قازاقستان وبلىسى
ۇلان اۋدانى
