الەۋمەتتىك جوبانىڭ ماقساتى – ينكليۋزيۆتى قوعامدى دامىتۋ, مۇمكىندىگى شەكتەۋلى جاندارعا تولەرانتتى قارىم-قاتىناستى قالىپتاستىرۋ, قوعامدا ءالسىز توپتارداعى ازاماتتاردى كەمسىتى دەڭگەيىن تومەندەتۋ, مۇگەدەكتىگى بار قازاقستاندىقتاردىڭ تەڭدىگى, مۇمكىندىكتەرى بويىنشا ديالوگتى ۇيىمداستىرۋ
«قازىردىڭ وزىندە ءبىز مۇگەدەكتىگى بار ەرەسەك ادامداردىڭ بالا كەزىندە كەمسىتۋشىلىك فاكتىلەرىن باستان كەشىرگەنىن ءجيى بايقايمىز. ولار قوعامنان وقشاۋلانادى, ولاردىڭ الەۋمەتتىك بايلانىستارى بۇزىلادى. الەۋمەتتىك وقشاۋلاۋ پروتسەسى جۇرەدى. ءيا, ولار مەملەكەتتىك جاردەماقى العانىمەن, ۇيدە وتىرادى, قارىم-قاتىناس ورناتقان ورتاسى كىشكەنتاي», دەدى «قورعان-م» قب ءتورايىمى ديانا قىرعىزباەۆا جوبانى تانىستىرۋ بارىسىندا.
سپيكەردىڭ ايتۋىنشا, بيىل ولار ينكليۋزيۆتى قوعام قۇرۋ ماسەلەلەرى بويىنشا جۇمىس ىستەيتىن ماماندارعا ارنايى سەمينار - ترەنينگتەر وتكىزەدى. سونداي-اق, ەموتسيونالدى قيىندىقتاردى جەڭۋدە مۇمكىندىگى شەكتەۋلى ادامدارعا كاسىبي قولداۋ كورسەتەتىن پسيحولوگتار ءبىلىم الادى.
قوعام بەلسەندىلەرىنىڭ پىكىرىنشە, ەگەر اتا-انالار بالالارىنا جاناشىرلىق تانىتۋدى ۇيرەتسە, مۇگەدەكتىگى بار ادامدارعا قاتىستى كەمسىتۋ وقيعالارىنىڭ ورىن الۋىن توقتاتۋعا بولادى.
«بارلىعى وتباسىنان باستالادى. سوندىقتان ينكليۋزيۆتىك تاربيەگە ەرتە جاستان ەرەكشە نازار اۋدارۋ كەرەك. اتاپ ايتقاندا, ءبىزدىڭ ۇيىمنىڭ قىزمەتكەرلەرى بالاباقشالار مەن جالپى ءبىلىم بەرەتىن مەكتەپتەردىڭ تومەنگى سىنىپ وقۋشىلارى ءۇشىن ينكليۋزيۆتى ءبىلىم بەرۋمەن اينالىسادى. مۇنداي بالالار وسكەن كەزدە مۇگەدەك ادامدارعا قاتىستى كەمسىتۋشىلىك ارەكەتتەرگە جول بەرمەيتىنىنە سەنىمدىمىن», دەدى ديانا قىرعىزباەۆا.
بيىل ۇيىمداستىرۋشىلار وزەكتى ماسەلەلەردى تالقىلاۋ ماقساتىندا, سونداي-اق, ديالوگ الاڭىن وتكىزۋدى جوسپارلاپ وتىر.
سونىمەن قاتار جوبا اياسىندا جاس قازاقستاندىقتار ءۇشىن سەمينارلار وتكىزىلىپ, وندا «تەڭ-تەڭىمەن» قاعيداتى بويىنشا ينكليۋزيۆتى قوعام قۇرۋ تۋرالى ايتىلادى.
گرانتتىق جوبا قر اقپارات جانە قوعامدىق دامۋ مينيسترلىگىنىڭ تاپسىرىسى بويىنشا جۇزەگە اسىرىلادى.
