زارەچنىي اۋىلىنىڭ تۇرعىنى ەسىل وزەنىنىڭ قارسى جاعاسىندا ادام جاتقانىن كورىپ, بۇل تۋرالى «102» ارناسىنا حابارلاعان. كەيىن اقپارات جاقىن ماڭداعى قۇرامىندا ينسپەكتور ەرىك جەتۋباەۆ پەن پەتروپاۆل پاترۋلدىك پوليتسيا باتالونىنىڭ اعا ينسپەكتورى تولەگەن الدابەرگەنوۆ بار اۆتوپاترۋلگە بەرىلگەن. وقيعا ورنىنا جەتكەن پوليتسيا قىزمەتكەرلەرىنە تۇرعىن كومەكتەسكەن.
«بىرنەشە مينۋت ىشىندە ءبىز 30 مەترلىك تىك جاردان تومەن تۇستىك. جاعادا جاتقان 18 جاستاعى قىز بولىپ شىقتى. قاتتى توڭىپ قالماۋى ءۇشىن كيىمىمىزدى كيگىزىپ, ونى كوتەرە باستادىق. الايدا جاعاداعى ساز كوتەرىلۋگە كەدەرگى بولدى. جاعدايدى راديو ارقىلى جەدەل باسقارۋ ورتالىعىنا حابارلاپ, قۇتقارۋشىلار مەن جەدەل جاردەم شاقىرۋدى وتىندىك», دەدى ت. الدابەرگەنوۆ.
قۇتقارۋشىلارمەن بىرگە قىز قاۋىپسىز جەرگە شىعارىلعان. مەديتسينا قىزمەتكەرلەرى دەر كەزىندە كەلىپ, قاجەتتى كومەك كورسەتكەن. 18 جاستاعى قىزدىڭ جەڭىس ساياباعى ماڭىندا جاردان قۇلاپ كەتكەنى انىقتالدى. قازىر قىزدىڭ ومىرىنە قاۋىپ جوق. ول وتباسىنا امان-ەسەن ورالدى.
