ءىس-شارانىڭ كۇن تارتىبىندە ەكىجاقتى قارىم-قاتىناستىڭ وزەكتى ماسەلەلەرى, ونىڭ ىشىندە ازاماتتىق قوعامنىڭ دامۋى, ءدىني سەنىم بوستاندىعى, قازاقستانداعى ساياسي رەفورمالار, ايەلدەردىڭ قۇقىقتارى, بوستاندىقتارى مەن مۇمكىندىكتەرىن كەڭەيتۋ قامتىلدى. تاراپتار سونداي-اق وڭىرلىك جانە كوپجاقتى فورماتتارداعى ىقپالداستىق ماسەلەلەرىن تالقىلادى.
اقش مەملەكەتتىك حاتشىسىنىڭ ورىنباسارى ۋزرا زەيا پرەزيدەنت قاسىم-جومارت توقاەۆتىڭ قازاقستاننىڭ قوعامدىق-ساياسي جۇيەسىن ودان ءارى دەموكراتيالاندىرۋعا جانە «جاڭا قازاقستان» قۇرۋعا باعىتتالعان ساياسي رەفورمالارىن قولدايتىنىن جانە اقش-تىڭ ەلىمىزدەگى جاڭعىرتۋ ارەكەتتەرىنە مەيلىنشە قولعابىس جاساۋعا دايىن ەكەنىن راستادى.
اقش دەلەگاتسياسىنىڭ نۇر-سۇلتانعا ساپارى شەڭبەرىندە امەريكالىق قوناقتى قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى قابىلداپ, ەكى مەملەكەت اراسىنداعى كەڭەيتىلگەن ستراتەگيالىق سەرىكتەستىكتىڭ نەگىزگى ماسەلەلەرىن تالقىلادى.
وتىرىستان كەيىن ۋزرا زەيا مەن سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين بۇقارالىق اقپارات قۇرالدارىنا كەزدەسۋدىڭ قورىتىندىسى تۋرالى اڭگىمەلەپ بەردى.
«اقش مەملەكەتتىك حاتشىسىنىڭ ازاماتتىق قاۋىپسىزدىك, دەموكراتيا جانە ادام قۇقىقتارى جونىندەگى ورىنباسارى ۋزرا زەيانىڭ ساپارى اياسىندا قر پرەزيدەنتى اكىمشىلىگى باسشىسىنىڭ ورىنباسارى – قازاقستان پرەزيدەنتىنىڭ حالىقارالىق ىنتىماقتاستىق جونىندەگى ارنايى وكىلى ەرجان قازىحاننىڭ تەڭ توراعالىعىمەن قازاقستان مەن اقش اراسىنداعى ادام قۇقىقتارى مەن دەموكراتيالىق رەفورمالار جونىندەگى جوعارى دەڭگەيدەگى ديالوگتىڭ ءبىرىنشى وتىرىسى ءوتتى. بۇل تەتىك ەكىجاقتى قارىم-قاتىناسقا قوسىمشا سەرپىن بەرەدى جانە قازاقستاننىڭ دەموكراتيالىق كۇن ءتارتىبىن ىلگەرىلەتۋگە باعىتتالعان», دەدى ا.راحمەتۋللين.
ۆيتسە-ءمينيستردىڭ ايتۋىنشا, ءىس-شارا بارىسىندا تاراپتار بۇۇ-نىڭ ادام قۇقىقتارى جونىندەگى كەڭەسىندەگى ىنتىماقتاستىق, ءدىني سەنىم بوستاندىعى, قازاقستانداعى ساياسي رەفورمالار, حالىقتىڭ ءالجۋاز توبىنىڭ قۇقىعىن قورعاۋ جانە ىقپالداستىرۋ, ادام ساۋداسىنا قارسى ءىس-قيمىل ماسەلەلەرى تالقىلانعان. سونىمەن قاتار ايەلدەردىڭ, مۇمكىندىگى شەكتەۋلى ادامداردىڭ قۇقىقتارى مەن مۇمكىنشىلىكتەرىن كەڭەيتۋ, قاۋىپسىزدىك, قۇقىق قورعاۋ سالالارىنداعى ىنتىماقتاستىق, جەمقورلىقپەن كۇرەس ماسەلەلەرى قوزعالدى.
«پرەزيدەنت قاسىم-جومارت توقاەۆ باستاماشىلىق جاساعان ەلدى ودان ارى دەموكراتيالاندىرۋعا, ادام قۇقىقتارىنىڭ ساقتالۋىن قامتاماسىز ەتۋگە باعىتتالعان ساياسي رەفورمالارعا باسا ءمان بەرىلدى. امەريكالىق تاراپ مەملەكەت باسشىسىنىڭ ساياسي جانە الەۋمەتتىك-ەكونوميكالىق سالالارداعى, مەملەكەتتىك ينستيتۋتتارداعى ساياساتىن ودان ارى جۇزەگە اسىرۋعا قولداۋ ءبىلدىردى. قازاقستان مەن اقش سىندارلى ىنتىماقتاستىقتى ودان ارى قولداۋعا جانە جوعارعى دەڭگەيدەگى ستراتەگيالىق سەرىكتەستىكتى كەڭەيتۋگە نيەتتى», دەدى اقان راحمەتۋللين.
اقش مەملەكەتتىك حاتشىسىنىڭ ازاماتتىق قاۋىپسىزدىك, دەموكراتيا جانە ادام قۇقىقتارى جونىندەگى ورىنباسارى ۋزرا زەيا ەلىمىزدە بولعان قاڭتار قاسىرەتىن تەرگەۋ بارىسىنا قاتىستى پىكىر ءبىلدىردى.
«قازاقستاندا بولعان وقيعالارعا قاتتى الاڭدادىق. ۇكىمەتتىڭ وسى وقيعالارعا قاتىسقانداردىڭ بارلىعىن انىقتاپ, جاۋاپقا تارتۋعا قاتىستى بۇكپەسىز جاۋابىن قولدايمىز. بىراق, سونىمەن قاتار مۇنىڭ بارلىعى زاڭناماعا ساي بولۋعا ءتيىس. قازاقستاندا ادام قۇقىعىن ىلگەرىلەتۋگە قولداۋ بىلدىرەمىز», دەدى ۋ.زەيا.
سونداي-اق ول ەكىجاقتى قارىم-قاتىناستىڭ 30 جىلدىعى اتاپ ءوتىلىپ جاتقانىن, قازاقستانمەن ءوزارا بايلانىستى تەرەڭدەتۋگە مۇددەلى ەكەنىمىزدى راستادى. اقش تاراپى قاسىم-جومارت توقاەۆتىڭ 16 ناۋرىزدا جاريالاعان ساياسي كۇنتارتىبىن قولدايتىنىن اتاپ ءوتتى.
«پرەزيدەنت باستامالارى جۇزەگە اسسا, ول قازاقستاننىڭ بارشا قازاقستاندىقتار ءۇشىن ءادىل ءارى ينكليۋزيۆتى ورىنعا اينالۋىنا كومەكتەسەدى. ورتالىق ازياداعى تۇراقتىلىق پەن وركەندەۋدى ىلگەرىلەتۋ ماقساتىمىزدا قازاقستاننىڭ ورنى ەرەكشە», دەدىۋزرا زەيا. ساپار اياسىندا اقش دەلەگاتسياسى قازاقستانداعى بىرقاتار باسقا دا رەسمي تۇلعا جانە ازاماتتىق قوعام وكىلىمەن كەزدەسۋدى جوسپارلاپ وتىر.
