قالعان تۇرعىندار كەزەڭ-كەزەڭىمەن كۇزگە دەيىن قوسىلادى.
ەندى الداعى 2 جىلدا قالاعا قاراستى قالعان 4 اۋىلعا تابيعي گاز تارتىلادى دەپ كۇتىلۋدە. سونداي-اق كەنتاۋ قالاسىنداعى «Turkistan» ارنايى ەكونوميكالىق ايماقتا ورنالاسقان «تۇركىستان تەمىربەتون» زاۋىتى ءوز جۇمىسىن باستادى. ءوندىرىس ورنى تۇرعىن ۇيگە ارنالعان 10-عا جۋىق ءتۇرلى تەمىربەتون ونىمدەرىن شىعارادى.
ايتا كەتەيىك, ينۆەستيتسيانىڭ جالپى كولەمى – 1,2 ملرد تەڭگە, وسى ساتكە دەيىن 700 ملن تەڭگە ورىندالعان. جاڭا 60 جۇمىس ورنىن اشۋ جوسپارلانعان. زاۋىتتا جابىندىلار, ريگەل, ۇيلەردىڭ ىرگە تاسىن قالاۋعا ارنالعان بلوكتار, باعانالار, جول بويىنا قويىلاتىن بورديۋرلار شىعارىلماق. زاۋىتتىڭ جوبالىق قۋاتتىلىعى – جىلىنا شامامەن 80 مىڭ شارشى مەتر تەمىربەتون. شيكىزاتتىڭ باسىم بولىگى كەنتاۋ قالاسىنان الىنادى. شىعارىلعان ونىمدەرمەن تۇركىستان وبلىسىن قامتۋ جوسپارلانۋدا.
جاڭا زاۋىتتىڭ جۇمىسىنا ساتتىلىك تىلەگەن وبلىس اكىمى ومىرزاق شوكەەۆ ءوندىرىستى دامىتۋ باعىتىندا جۇمىس كۇشەيەتىنىن ايتتى. سونداي-اق وبلىس اكىمى ش.قالداياقوۆ اتىنداعى مادەنيەت سارايىندا تۇرعىندارمەن كەزدەستى.
«كەنتاۋ تۇركىستانمەن قاتار دامىپ, الەۋەتى كوتەرىلەدى. مونوقالانىڭ باسەكەگە قابىلەتتىلىگى جوعارىلايدى. وعان تولىق مۇمكىندىك بار. جالپى وبلىس ورتالىعىنىڭ تۇركىستان قالاسىنا اۋىسۋى كەنتاۋدىڭ دامۋىنا ۇلكەن سەرپىن بەردى. بۇل شاھار مەن ءۇشىن وتە ىستىق. ماسەلەلەرىن دە جاقسى بىلەمىن. سوندىقتان ونى دامىتۋ – ازاماتتىق پارىزىم. وتكەن جىلى كەنتاۋ قالاسىن دامىتۋعا 1,3 ملرد تەڭگە قارجى ءبولىندى. كوپقاباتتى ۇيلەر مودەرنيزاتسيالاۋدان ءوتتى. «قىزىلاسكەر» اۆتوماتتاندىرىلعان گاز ستاتسياسىن ىسكە قوسۋ جۇمىستارى اياقتالىپ, قالا تۇرعىندارىن تابيعي گازعا قوسۋ مۇمكىندىگى پايدا بولدى. شاحتانىڭ سۋىن تومەندەتۋ جۇمىستارى جۇرگىزىلۋدە. بيىل قالانى دامىتۋعا 1,6 ملرد تەڭگە باعىتتالىپ وتىر. كەنتاۋ قالاسى اۋماعىنداعى الەۋمەتتىك-ينفراقۇرىلىمدىق ماسەلەلەردى جۇيەلى تۇردە كەزەڭىمەن شەشەتىن بولامىز», دەدى ومىرزاق شوكەەۆ.
كەزدەسۋدە تۇرعىندار ينفراقۇرىلىم, قالانى گازبەن قامتۋ, ونوماستيكا, جۇمىس ورىندارىن كوبەيتۋ, جول, باسپانامەن قامتۋ, بالالار ويىن الاڭشالارىن سالۋ, جاستاردى «سەرپىن» باعدارلاماسىنا ەنگىزۋگە ىقپال ەتۋ جانە وزگە دە ماسەلەلەردى كوتەردى. ومىرزاق شوكەەۆ تۇرعىنداردىڭ وتىنىشتەرى مەن سۇراقتارىن تىڭداپ, زاڭ اياسىندا كەڭەس بەردى. بىرقاتار تۇيتكىلدەردى شەشۋ بويىنشا جاۋاپتى باسقارما باسشىلارى مەن كەنتاۋ قالاسىنىڭ اكىمى راشيد ايۋپوۆقا مىندەتتەر جۇكتەدى.
