سوڭعى جىلدارى سۇيەكتەن ساندىك نەمەسە گەرالديكالىق بۇيىم جاساۋ ونەرى ايتارلىقتاي دامىپ كەلەدى. وسىنداي سۇيەكتەن بۇيىم جاساۋشىلاردىڭ ءبىرى – استانالىق ۇستاز, ەۋرازيا ديزاينەرلەر وداعىنىڭ مۇشەسى – اسىلبەك بەگزان ۇلى. بۇل ازامات حالقىمىزدىڭ سۇيەكتەن بۇيىم جاساۋ ءداستۇرىن دامىتۋمەن قاتار, ەلوردالىق مەكتەپ وقۋشىلارىنا اتالعان ونەردى ۇيرەتۋدە.
«ەرتەدە ەل اراسىندا جاۋىرىن سۇيەككە قاراپ بال اشاتىندار بولعانىن جاقسى بىلەمىز. ويتكەنى بۇل سۇيەك باسقا مۇشەلەرگە قاراعاندا, كومپوزيتسيالىق قۇرىلىمى مەن فورمالىق ۇيلەسىمى كەڭ ءارى ادامنىڭ شىعارماشىلىق قيالىن ۇشتايتىن مانگە يە. دەسەك تە, سۇيەكتەن بۇيىم جاساۋ وڭاي ەمەس. ونىڭ وزىندىك ايلا-ءتاسىلى تەحنولوگياسى بار. شەبەردىڭ قيالى مەن ءىسى ۇيلەسكەندە عانا تولىققاندى تۋىندى تۋارى حاق. سۇيەكتەن سۇلۋلىق تۋدىرۋ – قاعازعا نەمەسە ماتاعا سۋرەت سالۋ ەمەس», دەيدى شەبەر.
سۇيەكشىلىك ونەرىمەن اينالىسقانىنا ونشاقتى جىلدىڭ ءجۇزى بولعان شەبەر 2018 جىلى ەڭبەك ءپانى ۇستازدارى اراسىندا وتكەن قالالىق بايقاۋدا «ورمان بۇعىسى» اتتى جۇمىسىمەن باس جۇلدە السا, «بەيبىتشىلىك قۇسى» اتتى تۋىندىسى تۇركيادا وتكەن حالىقارالىق كورمەدە «ۇزدىك ونەر» نوميناتسياسىنا يە بولىپتى. سونداي-اق وتكەن جىلدارى ابايدىڭ 175 جانە ءال-ءفارابيدىڭ 1150 جىلدىعىنا وراي رەسپۋبليكالىق ەڭبەك ءپانى ۇستازدارى اراسىندا ۇيىمداستىرىلعان «عاسىر تولعاۋى» اتتى كورمە كەزىندە, ىرىكتەلىپ الىنىپ, قۇراستىرىلعان «بابالار اماناتى» اتتى البومعا تۋىندىلارى جاريالانىپتى.
قازىرگى تاڭدا شەبەر نۇر-سۇلتان قالاسىنداعى سماعۇل سادۋاقاس ۇلى اتىنداعى № 78 مەكتەپ گيمنازياسىندا ۇستازدىق ەتۋمەن قاتار, ۇلتتىق مۇرامىزدى دارىپتەپ, ساندىك-قولدانبالى ونەردىڭ قىر-سىرىن بولاشاق ۇرپاقتىڭ ساناسىنا ءسىڭىرىپ, اعاشتان, تەرىدەن, سۇيەكتەن ءتۇرلى بۇيىمدار, كادەسىيلار جاساۋ ءىسىن شاكىرتتەرىنە ۇيرەتىپ ءجۇر.
