وبلىستىڭ ءبىلىم باسقارماسىنىڭ قولداۋىمەن جۇزەگە اسىرىلىپ جاتقان اۋقىمدى جوبا بويىنشا شقتۋ الاڭىندا وڭىردەگى 27 مەكتەپتىڭ 9-11 سىنىپ وقۋشىلارىنا ءبىلىم بەرىلەدى. بۇل جوبانىڭ قولعا الىنۋىنا تاعى ءبىر سەبەپ – سوڭعى جىلدارى ۇلتتىق بىرىڭعاي تەستىلەۋدى تاپسىرۋ كەزىندە بەيىندى پاندەر رەتىندە فيزيكا مەن ماتەماتيكانى تاڭدايتىن تالاپكەرلەر سانى تىم تومەندەپ كەتكەن. مۇنىڭ ءوزى تەحنيكالىق مامانداردىڭ ازايۋىنا اكەلىپ سوعۋى مۇمكىن.
وسى ماسەلەنى شەشۋ ءۇشىن ۋنيۆەرسيتەت رەكتورى جاسۇلان شايماردانوۆتىڭ باستاۋىمەن بىرنەشە جىلدان بەرى وبلىس مەكتەپتەرىندە ينجەنەرلىك سىنىپتار قۇرۋ جۇمىسى جۇرگىزىلىپ كەلەدى. دەمالىس كەزىندە بالالار ۋنيۆەرسيتەت بازاسىندا فيزيكا مەن ماتەماتيكا پاندەرىن تەرەڭدەتە وقيدى. ناتيجە جامان ەمەس, ءبىلىم بەرۋ ساپاسى جاڭا دەڭگەيگە كوتەرىلدى. جەلىلىك ينجەنەرلىك مەكتەپتىڭ اشىلۋىنا وراي جوعارى وقۋ ورنى شاڭىراعىندا وبلىس مەكتەپتەرى ديرەكتورلارىنىڭ قاتىسۋىمەن «دوڭگەلەك ۇستەل» ءوتتى. بۇل ءىس-شاراعا ولاردىڭ رەسەيلىك ارىپتەستەرى دە ونلاين رەجىمدە قوسىلدى.
– EKTU Educational Academy جەلىلىك ينجەنەرلىك مەكتەبى د.سەرىكباەۆ اتىنداعى ۋنيۆەرسيتەتتىڭ الەۋەتىن پايدالانا وتىرىپ, وقۋشىلارعا تەرەڭدەتىلگەن ءبىلىم بەرىپ جاتىر. ماقساتىمىز دا ايقىن: فيزيكا-ماتەماتيكاعا قابىلەتى بار وقۋشىلاردىڭ ءبىلىمىن تەرەڭدەتۋ. ساباقتىڭ 50 پايىزى وفلاين رەجىمدە وتسە, 50 پايىزى – ونلاين, – دەيدى اتالعان ۋنيۆەرسيتەتتىڭ اكادەميالىق قىزمەت بويىنشا پرورەكتورى جادىرا تۇسىپحانقىزى.
ايتا كەتسەك, جەلىلىك ينجەنەرلىك مەكتەپتە كەز كەلگەن بالا وقي المايدى. ول ءۇشىن شاكىرتتەر ارنايى سىناقتان وتۋگە ءتيىس. ماسەلەن, وقۋشى تەستىلەۋدە 70 ۇپايدان جوعارى السا, تەگىن وقىتىلادى. ال 50 مەن 69 ارالىعىندا ۇپاي جيناسا, اقىلى تۇردە وقيدى. ەڭ ءتيىمدىسى, ينجەنەرلىك جەلىلىك مەكتەپتە ءبىلىم العان تۇلەك ۋنيۆەرسيتەتكە وقۋعا اۆتوماتتى تۇردە قابىلدانادى. جوبا 2025 جىلعا دەيىن جوسپارلانعان.
ۋنيۆەرسيتەتتە جەلىلىك مەكتەپ بازاسىندا ساباق بەرەتىن مۇعالىمدەرگە ارنالعان كۋرستار دا ۇيىمداستىرىلعان. بىلىكتىلىكتى ارتتىرۋ كۋرسى اقىلى تۇردە بولعانىمەن, ناتيجەلى جۇمىس اتقارعان مۇعالىمدەرگە سىياقى دا قاراستىرىلعان.
بۇگىندەرى EKTU Educational Academy جۇمىس جوسپارلارى كەلىسىلىپ, مەكتەپ قۇرامىنا وقۋشىلاردى جانە مۇعالىمدەردى ىرىكتەۋ باستالادى. جەلىلىك ينجەنەرلىك مەكتەپ اياسىندا وقۋشىلار ينجەنەرلىك ماتەماتيكا, فيزيكا بويىنشا كۇشەيتىلگەن دايارلىقتان وتەدى, قولدانبالى عىلىمي جوبالاردى ىسكە اسىرادى, وليمپيادالارعا قاتىسادى, دەمالىس كەزىندە ولارعا ۋنيۆەرسيتەتتىڭ عىلىمي-زەرتتەۋ جانە زەرتحانالىق بازاسى ۇسىنىلادى. سونىمەن قاتار جوعارى سىنىپ وقۋشىلارى جازعى مەكتەپ اياسىندا بۇقتىرما سۋ قويماسىنىڭ جاعالاۋىنداعى «پروستور» جازعى لاگەرىندە دايىندىقتان وتەدى.
جەلىلىك ينجەنەرلىك مەكتەپتىڭ اشىلۋى ەرەكشە فورماتتا ءوتتى. سەبەبى ادەتتەگىدەي لەنتا قيۋ, ۇزىن-سونار باياندامالار بولعان جوق. اركىم ءوز تىلەگىن قىسقا دا نۇسقا ءبىلدىردى. سوناۋ ماسكەۋدەگى جوعارى وقۋ ورىندارىنىڭ ۇستازدارىنا دەيىن جىلى لەبىزدەرىن ءبىلدىرىپ, كومەككە ارقاشان ءازىر ەكەندەرىن جەتكىزدى.
جيىن سوڭىندا تارباعاتاي, كاتونقاراعاي, زايسان اۋداندارى مەن كۋرچاتوۆ, ريددەر قالالارىنان كەلگەن ۇستازدار, مەكتەپ ديرەكتورلارى ۋنيۆەرسيتەت ءىشىن ارالاپ, اتقارىلىپ جاتقان جۇمىستارمەن تانىستى.
شىعىس قازاقستان وبلىسى
