وسىدان 30 جىل بۇرىن, 1992 جىلى ساۋىردە قازاقستان رەسپۋبليكاسى مەن شۆەتسيا كورولدىگى رەسمي تۇردە ديپلوماتيالىق قارىم-قاتىناس ورناتتى. اتاۋلى كۇنگە وراي ەكى ەلدىڭ سىرتقى ساياسي ۆەدومستۆولارىنىڭ باسشىلارى مۇحتار تىلەۋبەردى مەن انن ليندە قۇتتىقتاۋ حاتتارىمەن الماستى. قازاقستان ءمينيسترى ءوز حاتىندا قورشاعان ورتانى قورعاۋ, اۋىل شارۋاشىلىعى, كولىك جانە لوگيستيكا سالاسىنداعى ىنتىماقتاستىقتىڭ جوعارى الەۋەتىن اتاپ ءوتىپ, ارىپتەسىن مەرەيلى كۇنمەن قۇتتىقتادى. ءوز كەزەگىندە, شۆەد ءمينيسترى ەكى ەل اراسىنداعى دوستىق پەن ىنتىماقتاستىق ءۇشىن, ونىڭ ىشىندە شۆەتسيانىڭ 2021 جىلعى ەقىۇ توراعالىعى كەزىندەگى قولداۋعا زور ريزاشىلىعىن ءبىلدىردى.
شۆەتسيا – قازاقستاننىڭ ەۋروپالىق وداقتاعى ماڭىزدى ساياسي سەرىكتەسى. قازاقستان پرەزيدەنتىنىڭ 2004 جىلعى شۆەتسياعا جاساعان العاشقى رەسمي ساپارىنان بەرى ەكى ەل ءتۇرلى دەڭگەيدە ونداعان ساپار جاساپ, كوپتەگەن بىرلەسكەن ءىس-شارا وتكىزدى.
بۇل تۇرعىدا پارلامەنتارالىق ىنتىماقتاستىقتى دامىتۋعا ەرەكشە كوڭىل ءبولىندى. بىلتىر مامىر ايىندا قازاقستان پارلامەنتىنىڭ ءماجىلىسى مەن سەناتىنىڭ دەپۋتاتتارى شۆەتسيا پارلامەنتىنىڭ ورتالىق ازيا ەلدەرىمەن دوستىق قاۋىمداستىعى وكىلدەرىمەن العاش رەت ونلاين كەزدەسۋ وتكىزدى.
ەكى ەلدىڭ وزەكتى حالىقارالىق ماسەلەلەر بويىنشا ۇستانىمدارى ۇقساس, بۇۇ, ەقىۇ جانە باسقا دا حالىقارالىق قۇرىلىمدار شەڭبەرىندە ءوزارا تىعىز بايلانىس ورناتقان. 2021 جىلى شۆەتسيانىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىعى كەزىندە قازاقستان مەن شۆەتسيانىڭ سىرتقى ساياسي ۆەدومستۆولارىنىڭ باسشىلارى نۇر-سۇلتان, مادريد جانە ستوكگولم قالالارىندا دەموكراتيالىق وزگەرىستەردى ودان ءارى دامىتۋ, ادام قۇقىقتارىن ساقتاۋ جانە «ستوكگولم باستاماسى» اياسىندا يادرولىق قاۋىپسىزدىكتى قامتاماسىز ەتۋ ماسەلەلەرى بويىنشا بىرقاتار كەلىسسوزدەر جۇرگىزدى.
شۆەد بيزنەسى قازاقستانمەن ينۆەستيتسيالىق جانە ساۋدا-ەكونوميكالىق ىنتىماقتاستىقتى كەڭەيتۋگە ەرەكشە قىزىعۋشىلىق تانىتادى. پاندەميانىڭ سالدارىنا قاراماستان, ءوزارا تاۋار اينالىمى ءوستى. 2021 جىلدىڭ قورىتىندىسى بويىنشا قازاقستان مەن شۆەتسيا اراسىنداعى تاۋار اينالىمى 231,3 ملن دوللار بولدى (ەكسپورت – 59 ملن, يمپورت – 172,3 ملن), بۇل 2020 جىلمەن سالىستىرعاندا 18% جوعارى (191,3 ملن دوللار). شۆەتسيادان قازاقستانعا سالىنعان تىكەلەي ينۆەستيتسيالار كولەمى دە ءوسىپ كەلەدى. رەسمي ستاتيستيكا بويىنشا 2005-2021 جىلدارى قازاقستان ەكونوميكاسىنا 450 ملن دوللار كولەمىندە ينۆەستيتسيا قۇيىلعان.
بۇگىندە قازاقستان نارىعىندا 50-دەن استام شۆەد كومپانياسى جۇمىس ىستەيدى, ولاردىڭ ىشىندە الەمگە تانىمال Ericsson, Volvo, Scania, Atlas Copco, Electrolux, Oriflame جانە H&M برەندتەرى بار. ماڭعىستاۋ وبلىسىندا جاسىل سۋتەگى ءوندىرىسى بويىنشا Svevind نەمىس-شۆەد كونتسەرنى ءىرى ينۆەستيتسيالىق جوبانى جۇزەگە اسىرىپ جاتىر.
ەكى ەل سونداي-اق مادەني-گۋمانيتارلىق سالادا ىنتىماقتاستىقتى دامىتۋدى جالعاستىردى. شۆەتسيانىڭ ءبىلىم بەرۋ جۇيەسى الەمدە جوعارى ساپاسىمەن تانىمال, ال قازاقستاننىڭ جوعارى وقۋ ورىندارى, اسىرەسە تەحنيكالىق ماماندىقتار بويىنشا ىنتىماقتاستىقتى كەڭەيتۋگە مۇددەلى. وسى ۋاقىت ارالىعىندا شۆەتسيادا «بولاشاق» حالىقارالىق ستيپەندياسى بويىنشا 130-دان استام قازاقستان ستۋدەنتى ءبىلىم الدى.
ءۇش ونجىلدىقتىڭ قورىتىندىسى كورسەتكەندەي, قازاقستان مەن شۆەتسيا بىرقاتار باعىت بويىنشا تابىستى بايلانىس ورناتىپ ۇلگەرگەن جانە وسى ىنتىماقتاستىقتى ودان ءارى نىعايتۋعا دايىن.
