وقىس وقيعا 3 ءساۋىر كۇنى كۇمىستاۋ تەمىرجول كوپىرىندە ورىن العان. مامانداردىڭ ايتۋىنشا, پويىز ساعاتىنا 37 شاقىرىم جىلدامدىقپەن جىلجىپ بارا جاتقان ەكەن. ۆاگوندار ەرتىس وزەنىندەگى كوپىرلەردىڭ بىرىنە تاياعاندا, شويىن جولدان شىعىپ كەتكەن. ەڭ باستىسى, ادام امان, زارداپ شەككەندەر جوق. ۇلتتىق كومپانيا وكىلدەرىنىڭ مالىمەتتەرى بويىنشا, جولاۋشى جانە جۇك پويىزدارىنىڭ كىدىرىسى بولعان جوق. قازىرگى ۋاقىتتا قالپىنا كەلتىرۋ جۇمىستارى ءجۇرىپ جاتىر. بولعان جاعدايدىڭ سەبەپ-سالدارىن تەكسەرىپ, انىقتاۋ ءۇشىن «قتج» ۇك» اق باسشىلارىنان كوميسسيا قۇرىلدى. ترانسپورتتىق پوليتسيا دەپارتامەنتى تاراپىنان دا بىرقاتار تەكسەرۋ جۇمىستارى باستالعان.
ال شىعارىندى قوج بەن رۋدا توگىلگەن ەرتىس وزەنىنە قاۋىپ تونگەن جوق پا؟ وسى سۇراقتى ارنايى وتكەن ءباسپاسوز كونفەرەنتسياسىندا وبلىستىق ەكولوگيا دەپارتامەنتىنىڭ باستىعى دانيار اليەۆكە قويعانبىز.
– وسكەمەننەن التاي ستانساسىنا باعىت العان پويىز كۇمىستاۋ تەمىرجول كوپىرىنە جەتە بەرە ۆاگوندارى رەلستەن شىعىپ كەتكەن. بەلگىلى بولعانداي, ءبىر ۆاگون رۋدا مەن بەس ۆاگون قوج ەرتىسكە توگىلگەن. شىعارىندى قوجدى كەنشىلەر ينەرتتى ماتەريال رەتىندە شاحتاداعى ۇڭگىگەن ورىنداردى جابۋ ءۇشىن نەمەسە قۇرىلىس ماتەريالى رەتىندە پايدالانادى. بولعان جاعدايدى ەستي سالا ەكولوگيا دەپارتامەنتىنىڭ ماماندارى وقيعا ورنىنا شىعىپ, سۋدان سىناما الدى. الىنعان سىناما سۋدىڭ حيميالىق قۇرامىن اۋىر مەتالدارعا تەكسەردى. ونىڭ ىشىندە مىس, قورعاسىن, تسينك بار, – دەدى دەپارتامەنت باستىعى.
ايتا كەتەرلىگى, سىناما ناتيجەسى ءبىر كۇننەن كەيىن دايىن بولدى. بەلگىلى بولعانى, ۆاگوندار قۇلاعان تۇستاعى سۋ سىناماسىندا مىرىشتىڭ شەكتى رۇقسات ەتىلگەن كونتسەنتراتسياسى 1,3 ەسە ارتقان ەكەن. ءسال تومەنگى اعىستان الىنعان سىنامادا شەكتى مولشەردەن 1,5 ەسەگە كوپ. سونداي-اق 1,3 ەسەگە مىس كونتسەنتراتسياسىنىڭ جوعارىلاۋى بايقالادى. ەندى تەكسەرۋ ءىس-شارالارى اياقتالعانعا دەيىن ەكولوگيا دەپارتامەنتى وبلىس بويىنشا «قازگيدرومەت» فمدق-پەن بىرلەسىپ, اپتا سايىن ەرتىس وزەنىنىڭ اتالعان اۋماعىندا سۋدىڭ قۇرامىن تەكسەرىپ وتىرماق. سونىمەن قاتار وبلىستىق ترانسپورتتىق پروكۋراتۋراسىنىڭ تالابى بويىنشا «قتج جۇك تاسىمالى» اق «سەمەي بولىمشەسىنە» قاتىستى جوسپاردان تىس ەكولوگيالىق تەكسەرۋ تاعايىندالدى.
قازگيدرومەت ماماندارى دا ماسەلەنى نازارعا الىپ, ءوز مىندەتتەرىنە ساي جۇمىستار جۇرگىزىپ جاتىر. الداعى ۋاقىتتا سۋعا توگىلگەن قوجدى شىعارۋ جۇمىستارى دا جۇرگىزىلەدى. بىراق وقيعا ورىن العان جەرگە تەحنيكانىڭ جەتۋى قيىن. مامانداردىڭ ءوزى ەكى شاقىرىمعا جۋىق جولدى جاياۋ-جالپىلاپ ءجۇرىپ ءوتىپتى.
شىعىس قازاقستان وبلىسى
