ەلەكتروندى بايقاۋ قۇرالى ەڭ الدىمەن جازا وتەۋ شارتتارىن ۇنەمى بۇزاتىندارعا قولدانىلماق.
ەلەكتروندى بىلەزىكتى تاعۋعا ءماجبۇر بولعانداردىڭ ءبىرى – ۆلاديسلاۆ. جىگىت ۇرلىق جاساعانى ءۇشىن 3 جىلعا شارتتى تۇردە باس بوستاندىعىنان ايىرىلعان. سونىڭ ەكى جىلعا جۋىعىن وتەدى. قالعان ءبىر جىلعا ەلەكتروندى براسلەت ونىڭ «سەرىگىنە» اينالماق. پروباتسيا قىزمەتىنىڭ ماماندارى تالاپتى ءجيى بۇزعان ونىڭ اياعىنا بىلەزىكتى سالىپ بەردى.
«كەشكى ساعات 19.00-دەن كەيىن كوشەگە شىعۋعا رۇقسات جوق. مەن ونى ەسكەرمەي دوستارىممەن كەزدەسۋگە باردىم. ەندى جۇرگەن-تۇرعانىم ارنايى قۇرال ارقىلى باقىلاناتىن بولادى. مەن بۇل جاڭاشىلدىققا قارسى ەمەسپىن. سەبەبى تەمىر توردىڭ ار جاعىندا وتىرعاننان گورى بوستاندىقتا براسلەت كيىپ جۇرگەن اناعۇرلىم جاقسى», دەيدى جازاسىن وتەۋشى ۆلاديسلاۆ.
جىل باسىنان سقو بويىنشا 1100 سوتتالعان پروباتسيا قىزمەتىنە ەسەپكە الىندى, ولاردى 70 قىزمەتكەر باقىلايدى. وڭىرگە 144 ەلەكتروندى بايقاۋ قۇرالى ءبولىندى. بۇل براسلەتتەر جازا وتەۋ شارتتارىن ۇنەمى بۇزاتىندارعا 2 ايدان ءبىر جىلعا دەيىن تاعىلماق. ەگەر ەلەكتروندى بايقاۋ قۇرالى دا توقتاۋ سالا الماسا, شارتتى جازا ناقتى باس بوستاندىعىنان ايىرۋعا اۋىستىرىلماق.
«بىلەزىكتىڭ بەلبەۋى وڭايلىقپەن كەسىلمەيدى, ونىڭ ىشىندە تەمىر سىمى بار. قۇرال جەڭىل, اللەرگيا تۋدىرمايدى. سۋ وتپەيدى. قۋاتى 2-5 كۇنگە دەيىن جەتەدى. كەيىن سوتتالعان قۇرالدى ۇنەمى قۋاتتاندىرىپ وتىرۋعا مىندەتتى. بىلەزىكتى تاققاننان كەيىن ول جايىندا اقپارات پلانشەتتە پايدا بولادى. قايدا بارعانىن, جۇرگەنىن ءبارىن GPRS ارقىلى كورىپ وتىرامىز. ەگەر ول بەلگىلى ءبىر رۇقسات ەتىلگەن اۋماقتان شىعاتىن بولسا, ونى ينسپەكتور بىردەن كورەدى», دەيدى سقو بويىنشا قىلمىستىق-اتقارۋ جۇيەسى دەپارتامەنتى پروباتسيا قىزمەتىنىڭ ءبولىم باسشىسى داۋرەن سادۋاقاسوۆ.
بۇگىندە پەتروپاۆلدا 295 سوتتالۋشى پروباتسيا قىزمەتىندە ەسەپتە تۇر. ونىڭ 30-ى تالاپتى ءجيى بۇزاتىندار قاتارىندا. ال ارنايى قۇرال 200 مىڭ تەڭگە شاماسىندا تۇرادى. ەگەر سوتتالۋشىلار ونى زاقىمدايتىن بولسا, شىعىندى قالتاسىنان وتەمەك.
