«اۋىل شارۋاشىلىعى وندىرۋشىلەرىنەن جانە جامبىل وبلىسى اكىمدىگىنەن تۇسكەن امموفوس باعاسىن كوتەرۋ تۋرالى شاعىم نەگىزىندە باسەكەلەستىكتى قورعاۋ جانە دامىتۋ اگەنتتىگى «قازفوسفات» جشس-نا قاتىستى تەرگەپ-تەكسەرۋ جۇرگىزىپ جاتىر», دەلىنگەن حابارلامادا.
ۆەدومستۆو مالىمەتىنشە, امموفوستى باستاپقى ساتۋ نارىعىنداعى باسەكەلەستىك جاعدايىن تالداۋ بارىسىندا «قازفوسفات» جشس ۇستەم جاعدايعا يە ەكەنى انىقتالعان.
«2021 جىلعى قاراشادا امموفوس باعاسى 125 000 تەڭگەدەن 168 750 تەڭگەگە دەيىن ءوستى. جىل باسىمەن سالىستىرعاندا ءوسىم 35 پايىز بولدى. بۇل رەتتە 2022 جىلعى قاڭتاردا باعا 185 625 تەڭگە بولدى. 2021 جىلعى قاڭتارعا قاتىناسى بويىنشا باعانىڭ ءوسۋى - 48,5 پايىز.
سونىمەن قاتار تاۋاردى ءوندىرۋ جانە ساتۋ ءۇشىن قاجەتتى شىعىستاردىڭ وزگەرۋى تاۋاردى ساتۋ باعاسىنىڭ وزگەرۋىنە سايكەس كەلمەيدى. تەرگەپ-تەكسەرۋ بارىسىندا «قازفوسفات» جشس ۇستەم جاعدايدى تەرىس پايدالانا وتىرىپ, امموفوستى مونوپوليالىق جوعارى باعا بويىنشا ساتقانى انىقتالدى, بۇل ءوز كەزەگىندە تۇپكىلىكتى ءونىمنىڭ باعاسىنا, سونداي-اق جالپى ساتىپ الۋ قابىلەتىنە اسەر ەتەدى», دەلىنگەن حابارلامادا.
قازىرگى ۋاقىتتا تەرگەپ-تەكسەرۋ ناتيجەلەرى بويىنشا قورىتىندى جوبا «قازفوسفات» جشس-نە جىبەرىلگەن. زاڭ بويىنشا جاۋاپكەرشىلىك تۋرالى ماسەلە تەرگەپ-تەكسەرۋ قورىتىندىسىنان كەيىن شەشىلەتىنى حابارلاندى.
بۇعان دەيىن تۇركىستان وبلىسىندا فەرمەرلەر مەن باعباندار تىڭايتقىش قىمباتتاعانىنا شاعىمدانعان بولاتىن.
