رەسپۋبليكا بويىنشا ورتا ەسەپپەن حالىقتىڭ 35%-ى سپورتپەن اينالىسۋعا تارتىلعان. ماڭعىستاۋ, اتىراۋ جانە اقمولا وبلىستارىنىڭ كورسەتكىشتەرى جوعارى. رەسپۋبليكالىق ماڭىزى بار قالالاردا سپورتپەن شۇعىلدانۋشىلار نۇر-سۇلتان, الماتى جانە شىمكەنت قالالارىندا از.
«2025 جىلى سپورتپەن شۇعىلدانۋشىلار سانىن 50%-عا دەيىن جەتكىزۋىمىز كەرەك. بۇل كورسەتكىشكە قول جەتكىزۋ سالاۋاتتى ءومىر سالتى مەن سپورتتىڭ پايداسىن ناسيحاتتاۋ, سىرقاتتانۋشىلىقتىڭ الدىن الۋ, سپورتتىق ينفراقۇرىلىمدى كەڭەيتۋ جانە, ارينە, بۇقارالىق سپورت سالاسىن قارجىلاندىرۋدى ۇلعايتۋ بويىنشا ۇلكەن جۇمىستى تالاپ ەتەدى», دەدى ءاليحان سمايىلوۆ ۇكىمەت وتىرىسى بارىسىندا .
ۇكىمەت باسشىسىنىڭ ايتۋىنشا, اتالعان ماقساتتا مەملەكەت باسشىسىنىڭ تاپسىرماسى بويىنشا كاسىبي سپورت تۇرىنەن بۇقارالىق سپورتقا 21 ملرد تەڭگەگە جۋىق قاراجات قايتا باعدارلانعان, ونىڭ 6 ملرد تەڭگەسى مەملەكەتتىك سپورتتىق تاپسىرىستى قارجىلاندىرۋ ءۇشىن پايدالانىلعان.
«مەملەكەتتىك تاپسىرىس مىڭداعان بالالارعا سپورت سەكتسيالارىندا تەگىن اينالىسۋعا مۇمكىندىك بەردى. سەكتسيالارعا بارۋ شىعىستارى بيۋدجەتتەن تولەنەدى. وتكەن جىلى رەسپۋبليكا بويىنشا مۇنداي مۇمكىندىكتى 162 مىڭ بالا الدى. ال بيىلعى قامتۋ 275 مىڭعا دەيىن جەتەدى. مەملەكەتتىك تاپسىرىسپەن قامتۋدىڭ ەڭ جوعارى كورسەتكىشتەرى - الماتى قالاسى مەن الماتى وبلىسىندا. اقتوبە جانە سولتۇستىك قازاقستان وبلىستارى ارتتا قالىپ وتىر. 4,9 ملرد تەڭگە كولەمىندەگى قايتا باعىتتالعان قاراجاتتىڭ ءبىر بولىگى سپورت ينفراقۇرىلىمىن سالۋعا جانە جوندەۋگە باعىتتالدى», دەدى ءاليحان سمايىلوۆ.
سونداي-اق, پرەمەر-مينيستر اتاپ وتكەندەي, وتكەن جىلى رەسپۋبليكا بويىنشا 41 دەنە شىنىقتىرۋ-ساۋىقتىرۋ كەشەنى پايدالانۋعا بەرىلدى, ونىڭ 32-ءسى اۋدان ورتالىقتارى مەن اۋىلداردا اشىلعان. ءاليحان سمايىلوۆ اۋىلداردى سپورت نۇسقاۋشىلارىمەن قامتاماسىز ەتۋ ماسەلەسى شەشىلىپ جاتقانىن ايتتى.
«سپورتپەن شۇعىلداناتىن بالالار سانىنىڭ ارتۋى جالپى ۇلتتىڭ ساۋىعۋىنا, سپورتپەن كاسىبي تۇردە اينالىسقىسى كەلەتىندەردىڭ سانىنىڭ كەڭەيۋىنە, حالىقارالىق ارەنادا ەلىمىزدى داڭقتاۋعا اكەلەدى. بۇقارالىق سپورتتى دامىتۋدىڭ پايىمى, قاعيداتتارى مەن تاسىلدەرى 2025 جىلعا دەيىنگى دەنە شىنىقتىرۋ مەن سپورتتى دامىتۋ تۇجىرىمداماسىندا كورىنىس تابادى», دەپ تولىقتىردى ۇكىمەت باسشىسى.
وسىعان بايلانىستى ءاليحان سمايىلوۆ:
- مادەنيەت جانە سپورت مينيسترلىگى ءبىلىم مينيسترلىگىمەن جانە اكىمدىكتەرمەن بىرلەسىپ, جەرگىلىكتى بيۋدجەتتەن قوسىمشا قاراجات بولە وتىرىپ, بالالاردى تەگىن سپورت سەكتسيالارىمەن قامتۋدى;
- مادەنيەت جانە سپورت مينيسترلىگى ءبىلىم مينيسترلىگىمەن جانە اكىمدىكتەرمەن بىرلەسىپ, وسى جىلدىڭ 1 شىلدەسىنە دەيىن مۇقتاج ەلدى مەكەندەردە سپورتتىق ينفراقۇرىلىم سالۋ جوسپارىن قابىلداۋدى;
- دەنساۋلىق ساقتاۋ مينيسترلىگى ۇلتتىق ەكونوميكا, اقپارات مينيسترلىكتەرىمەن جانە اكىمدىكتەرمەن بىرلەسىپ, سالاۋاتتى ءومىر سالتىن ناسيحاتتاۋ مەن قالىپتاستىرۋ, سىرقاتتانۋشىلىقتىڭ الدىن الۋ جونىندەگى شارالاردى كۇشەيتۋدى تاپسىردى.
