قازىر باتىس قازاقستان وبلىسىندا سۋ تاسقىنى كەزىندە حالىققا كومەك كورسەتۋگە ارنالعان ۆولونتەرلىك شتاب قۇرىلدى. قاراتوبە, جانىبەك, شىڭعىرلاۋ جانە ءبورلى اۋداندارىنىنىڭ ارقايسىندا 30 ادامنان قۇرالعان ۆولونتەرلىك توپتار قىزمەت اتقارۋدا. سونىمەن قاتار ورال قالاسىندا دا 100-دەن استام ەرىكتى كومەك كورسەتۋگە دايىن وتىر. شتاب قازىر حالىقتان كيىم-كەشەك, تەز بۇزىلمايتىن تاعامدار, دارىلىك جانە جەكە گيگيەنالىق زاتتار مەن باسقا دا العاشقى كەرەك زاتتاردى قابىلداپ, زارداپ شەككەندەرگە جەتكىزۋدى ۇيىمداستىرىپ جاتىر. «اقجايىق» جەكە قورىنا ەل-جۇرتتان اقشالاي قارجى دا جينالۋدا.
«AMANAT پارتياسىنىڭ تاراپىنان دەپۋتاتتاردىڭ جانە فيليال قىزمەتكەرلەرىنىڭ كومەگىمەن 4 ءساۋىر كۇنى تاڭعى 9-عا دەيىن 1 199 027 تەڭگە جينالدى» دەپ حابارلادى پارتيا فيليالىنىڭ وكىلى گاۋھار شايحينيازوۆا.
ءساۋىردىڭ 4-ءى كۇنگى تۇسكە دەيىنگى مالىمەت بويىنشا باتىس قازاقستان وبلىسىندا 140 ءۇي, 2 الەۋمەتتىك نىسانعا سۋ كىرىپ, 168 باس مال شىعىن بولعانى حابارلاندى. سۋ باسقان ۇيلەردەن 751 ادام كوشىرىلگەن, ونىڭ 215-ءى – بالالار.
ءدال قازىر 6 اۋداندا سۋ تاسقىنىنىڭ الدىن الۋ ءۇشىن 770 ادام, 100-گە جۋىق تەحنيكا جۇمىلدىرىلعان. بۇلاردىڭ ىشىندە ماڭعىستاۋ وبلىسىنان كەلگەن 43 ادام, اتىراۋ وبلىسىنان كەلگەن 49 قۇتقارۋشى بار.
جانىبەك اۋدانى
3-ءساۋىر كۇنى رەسەي شەكاراسى جاعىنان دالادان كەلگەن قارعىن سۋ جاقسىباي اۋىلىنىڭ 97 ۇيىنە كىرىپ كەتكەن ەدى. قازىر سۋ دەڭگەيى تۇسكەن, بىراق 53 ءۇي ءالى سۋ ىشىندە تۇر. قاۋىپتى جەردەن 639 ادام كوشىرىلگەن. ونىڭ 305-ءى اۋىلداعى ورتا مەكتەپتىڭ ءۇش قاباتتى عيماراتىنا ۋاقىتشا ورنالاستى. ءتىلسىز جاۋدىڭ كەسىرىنەن اۋىلدا 39 سيىر, 68 قوي-ەشكى, 1 ات ولگەن. قازىر حالىققا ماتەريالدىق زارداپ شىعىندارىن قالاي ەسەپتەۋ كەرەكتىگى جونىندە زاڭ تالاپتارى ءتۇسىندىرىلىپ جاتىر.
وسى اۋداننىڭ تالوۆ اۋىلىندا دا 2 ءۇي سۋ ىشىندە قالعان ەدى. مۇندا تۇراتىن 8 ادام دا قاۋىپسىز جەرگە ورنالاستىرىلدى.
جاقسىباي اۋىلىندا تۇراتىن اياعى اۋىر ەكى كەلىنشەك «قازاۆياقۇتقارۋ» مەكەمەسىنىڭ تىكۇشاعىمەن قاۋىپسىز جەرگە كوشىرىلدى.
شىڭعىرلاۋ اۋدانى
شىڭعىرلاۋ وزەنىنىڭ دەڭگەيى 3 ءساۋىر كۇنى قاۋىپتى شەككە دەيىن كوتەرىپى, اقشات اۋىلىنداعى 7 ءۇيدى باسىپ قالۋ قاۋپى تونگەن بولاتىن. جەدەل شارالار ۇيىمداستىرىلىپ, قۇم سالىنعان قاپشىقتارمەن بوگەلىپ, كەزەكشىلىك ۇيىمداستىرىلدى. سۋ اعىنىنا كەدەرگى بولعان مۇز ويىلىپ, اۋىلداعى 50 سيىر, 50 جىلقى, 39 قوي-ەشكى قاۋىپسىز جەرگە ايدالعان.
اۋدان اۋماعىنداعى شىڭعىرلاۋ-شوقتىباي, شىڭعىرلاۋ-تالدىساي دالا جولدارىنىڭ, الماز اۋىلىنا كىرەبەرىس بوگەت-كوپىردىڭ بۇزىلعانىن بۇرىن حابارلاعان ەدىك. بۇل جولداردى قالپىنا كەلتىرۋ تاسقىن قاۋپى سەيىلگەن سوڭ قولعا الىنادى.
الماز اۋىلىندا قۇلاعان قورانىڭ استىندا 15 ۋاق جاندىق (قوي-قوزى) ولگەن. سۋ باسقان تۇرعىن ءۇي جوق.
قاراتوبە اۋدانى
قوسكول اۋىلدىق وكرۋگىنە قاراستى شالعىن اۋىلىندا بولعان تابيعي اپات تۋرالى بۇدان بۇرىن دا بىرنەشە مارتە حابارلادىق. ەرىگەن قار سۋى مەن ءشيلى وزەنى دەڭگەيىنىڭ كوتەرىلۋىنەن اۋىلدا 29 ءۇي, مەكتەپ پەن دارىگەرلىك امبۋلاتوريا سۋعا كەتتى. 45 قوي-ەشكى ءولدى. قازىر سۋ اقىرىن شەگىنىپ كەلەدى. اۋىلدان 96 ادام, سونىڭ ىشىندە 50 بالا ورال قالاسىنا, قوسكول اۋىلىنا كوشىرىلدى.
3 ءساۋىر كۇنى اۋدان ورتالىعى قاراتوبە كەنتىندە دە قالدىعايتى وزەنى كۇرت كوتەرىلىپ, شەتكى ۇيلەردى سۋ باسۋ قاۋپى تونگەن. بۇل جەرگە كەزەكشىلىك ۇيىمداستىرىلىپ, جاعالاۋ 3 مىڭ قاپشىق قۇممەن, توپىراقپەن بەكىتىلدى. وقيعا ورنىندا جەرگىلىكتى توتەنشە جاعداي مەكەمەسىنىڭ قىزمەتكەرلەرى جاعدايدى كۇنى-ءتۇنى باقىلاۋدا ۇستاپ وتىر.
ءبورلى اۋدانى
3 ءساۋىر كۇنى تۇندە كەڭتۇبەك اۋىلدىق وكرۋگىنە قاراستى باقتىارال اۋىلىن شىڭعىرلاۋ وزەنىنىڭ سۋى باسىپ قالا جازداعانىن بۇدان بۇرىن دا حابارلاعان بولاتىنبىز. قاۋىپ تونگەن تۇرعىن ۇيلەردەن 20 ادام قاۋىپسىز جەرگە شىقتى. كەزەكشىلىك ۇيىمداستىرىلىپ, قاۋىپتىڭ بەتى قايتتى. ماسايتوبە اۋىلى ماڭىندا بوگەلگەن مۇز سەڭىن توتەنشە جاعداي قىزمەتكەرلەرى بۇزىپ, ەلدى مەكەنگە تونگەن قاۋىپتى سەيىلتتى.
تاسقالا اۋدانى
تاسقالا اۋدانىندا سۋ باسۋ قاۋپى بار جەرلەر قۇم سالىنعان قاپشىقتارمەن بەكىتىلىپ, سۋ جولدارى قار مەن كولدەنەڭ زاتتاردان تازارتىلىپ جاتىر. جەدەل شتابتىڭ مالىمدەۋىنشە, قازىر 1100 قاپ قۇم قويىلىپ, 2560 تەكشەمەتر سۋ سورىلعان. دەڭگەيى كۇننىن كۇنگە كوتەرىلىپ كەلە جاتقان دەركول وزەنى ۇنەمى باقىلاۋدا.
تەرەكتى اۋدانى
3 ءساۋىر كۇنى كەشكىسىن تەرەكتى اۋدانىندا رەسپۋبليكالىق ماڭىزى بار ورال-ورىنبور اۆتوجولىنىڭ ءبىر بولىگىن ەرىگەن قار سۋى باسىپ كەتتى. «قازاقاۆتوجول» مەكەمەسىنىڭ قىزمەتكەرلەرى كۇشىمەن جول جيەگى ينەرتتى ماتەريالدارمەن, قۇم سالىنعان قاپتارمەن بەكىتىلىپ, جول قوزعالىسنا نۇقسان كەلمەدى. سۋ اعۋى 4 ءساۋىر كۇنى تۇندە توقتادى.
P.S. وڭىردەگى نەگىزگى سۋ قويمالارى, وزەن-كول دەڭگەيى ۇدايى باقىلاۋدا. اسىرەسە تاسقالا مەن بايتەرەك اۋداندارى, ورال قالاسىنىڭ ماڭى ەرەكشە نازاردا. ايتا كەتەيىك, اتالعان سولتۇستىك اۋدانداردىڭ قارى ەندى-ەندى ەري باستادى.
«قازگيدرومەت» مەكەمەسىنىڭ حابارلاۋىنشا, وبلىستىڭ كوپ جەرىندە جاڭبىر جاۋادى. اۋا تەمپەراتۋراسى تۇندە 5-10, كۇندىز 10-15 گرادۋس جىلىلىقتى كورسەتىپ تۇر. كۇن رايىن بولجاۋشىلار 2-6 ءساۋىر ارالىعىندا وزەن-كولدەردىڭ دەڭگەيى كوتەرىلەدى دەپ ەسكەرتىپ وتىر.
باتىس قازاقستان
