ۇيرەتەرى كوپ ۇيىرمەلەردىڭ ءبىرى – VR-كيىز ءۇيى. ەرەكشەلىگى سول, كيىز ۇيدەگى زاماناۋي تەحنولوگيانىڭ كومەگىمەن الەمنىڭ كەز كەلگەن جەرىنە ساياحات جاساۋعا بولادى. كوزىڭىزگە تەتىكتەرى كوپ كوزىلدىرىكتى تاعاسىز دا, ارمانداعان قالاڭىزعا توپ ەتە قالاسىز. ونىڭ ىشىندە وسكەمەن دە بار. ساياحات ونلاين بولعانىمەن, شاھاردى شىنايى كەزىپ جۇرگەندەي كۇيدە بولادى ەكەنسىز. وقىرمانداردىڭ ايتۋىنشا, VR-كيىز ءۇيى اشىلعان ساتتەن باستاپ قىزىققاندار كوپ بولدى. العاشىندا VR كوزىلدىرىگى عانا بولسا, كەيىن كىتاپحاناداعى IT ماماندارى ارنايى باعدارلامامەن ءتۇرلى كورىنىس جاساي باستاعان. كورىنىستەردىڭ كوبى – اڭىز-ەرتەگىلەردەگى كەيىپكەرلەردىڭ بەينەسى.
– ءبىزدىڭ ماقساتىمىز – وقىرمانعا وقىعان كىتاپتارىنداعى كەيىپكەرلەردىڭ بەينەسىن وسى قۇرىلعى ارقىلى كورسەتۋ. وسىلايشا, جاستاردىڭ كىتاپ وقۋعا دەگەن ىنتاسىن وياتقىمىز كەلەدى, – دەيدى كىتاپحانا باسشىسى حابيبا اقجىگىتوۆا.
ءيا, حابيبا مىرزاحانقىزىنىڭ مۇرىندىق بولۋىمەن كيەلى شاڭىراقتا اۋىز تولتىرىپ ايتارلىقتاي جۇمىستار اتقارىلعانىن ەشكىم جوققا شىعارمايدى. ماسەلەن, زاماناۋي تەحنولوگيا كومەگىمەن ورالحان بوكەيدىڭ تۋعان جەرىن جانە جازۋشى شىعارمالارىنداعى كەيىپكەرلەردىڭ وبرازى بەينەلەنىپ, وقىرمان نازارىنا ۇسىنىلدى. يمپروۆيزاتسيا جاسالىپ, ورالحان بوكەي, مۇحتار اۋەزوۆ جانە شەرحان مۇرتازانىڭ ۇستەل باسىندا اڭگىمەلەسىپ وتىرعانى دا بەينەلەندى. سونىمەن قاتار ورالحاننىڭ «كەربۇعى», «قامشىگەر» شىعارمالارىنا يلليۋستراتسيا جاسالدى.
تاعى ءبىر ەرەكشە جاڭالىق, بالالاردى كىتاپ وقۋعا باۋلۋ ءۇشىن مۋلتستۋديا اشىلعان. بۇلدىرشىندەردىڭ كوبى ەرتەگىنى كىتاپتان ەمەس, تەلەديداردان, سمارتفوننان ىزدەيتىنى شىندىق. سوندىقتان دا ورالحان بوكەي كىتاپحاناسىندا مۋلتستۋديا ىسكە قوسىلعان. اتالعان ستۋديا قالاي جۇمىس ىستەيدى دەيسىز عوي. مۇندا بالالار قاعازدان جاسالعان قۋىرشاقتاردى تەحنيكانىڭ كومەگىمەن جانداندىرادى ەكەن. كەيىن ەرتەگى كەيىپكەرلەرىنە دەگەن قىزىعۋشىلىقتارى ويانىپ, كىتاپ وقي باستايدى. كىتاپتاعى كەيىپكەرلەردى عانا ەمەس, بالالار ءوز ويىنداعى دۇنيەلەردى جاساپ, شىعارماشىلىقپەن اينالىسۋلارىنا دا مۇمكىندىكتەرى بار.
ال توردەگى ەرەكشە سەنسورلى ۇستەل تىلدىك دامۋىندا اقاۋلارى بار بالالارعا ارنالعان. كەيبىر بالالاردىڭ ءتىلى كەش شىعىپ, ورتاسىنان شەتتەپ قالىپ جاتادى. وسىنداي ولقىلىقتىڭ الدىن الۋ ءۇشىن ماماندار سەنسورلى ۇستەلدىڭ كومەگىمەن ءبىلىم بەرۋدىڭ جاڭا دەڭگەيىنە كوتەرىلگەن. ەرەكشە ۇستەل بەتىندە بالا سۋرەت سالا وتىرىپ, انىق سويلەۋدى ۇيرەنەدى. مامانداردىڭ سوزىنە سەنسەك, ناتيجەسى جاقسى.
كىتاپحانادا بالالارعا عانا ەمەس, ەرەسەك وقىرماندارعا دا قولايلى جاعداي قاراستىرىلعان. مىسالى, «bokeylibrary.kz» سايتىنا كىرىپ, كىتاپحانادان ىزدەگەن كىتابىڭىزعا, اقپاراتىڭىزعا ونلاين تۇردە قول جەتكىزە الاسىز. ونىڭ ىشىندە bokey.kz ءبولىمىن باسساڭىز, ورالحان بوكەيگە قاتىستى ماتەريالداردى قاشىقتان وقۋعا بولادى. مۇنىمەن قويماي, كىتاپحانا ماماندارى زامان اعىمىنا قاراي bokeylibrary.kz سايتىنىڭ BOKEYMOBILE ءموبيلدى قوسىمشاسىن دا ىسكە قوسىپ قويعان. دەمەك ورالحان بوكەي اتىنداعى كىتاپحانانىڭ قۇندى ماتەريالدارى ءسىزدىڭ قولىڭىزدا. قوسىمشادا كىتاپحاناعا جازىلۋ, كىتاپ برونداۋ, سۇراق-جاۋاپ, كىتاپتار, اۋديوكىتاپتار, ويىندار جانە ۇيىرمەلەر كەستەسى سىندى قىزمەت تۇرلەرى كورسەتىلەدى. بۇل دەگەنىمىز, «تسيفرلى قازاقستان» مەملەكەتتىك باعدارلاماسىنىڭ ايقىن جەمىسى دەر ەدىك.
وسكەمەن
