مينيسترلىكتىڭ ءباسپاسوز قىزمەتى مالىمدەگەندەي, قازىرگى ۋاقىتتا قالىپتاسقان گەوساياسي جاعدايعا بايلانىستى تۋىنداعان كولىك-لوگيستيكالىق داعدارىس اياسىندا بيىل باسقا ەلدەردەگىدەي قازاقستاندا دا وبەكتىلەر قۇرىلىسىنىڭ قىمباتتاۋى جانە قۇرىلىس ماتەريالدارىن جەتكىزۋشىلەردىڭ الىپساتارلىق ارەكەتتەرىنىڭ ءوسۋى وزەكتى ماسەلەگە اينالدى.
وسىعان بايلانىستى ىشكى نارىقتىڭ قۇرىلىس ماتەريالدارىنا دەگەن قاجەتتىلىگىن قاناعاتتاندىرۋ, سونداي-اق يمپورتقا تاۋەلدىلىكتى تومەندەتۋ جانە باعانىڭ اۋىتقۋىن بولدىرماۋ ءۇشىن 2025 جىلعا دەيىن 15,7 مىڭنان استام جاڭا جۇمىس ورىندارىن اشىپ, 157 ينۆەستيتسيالىق جوبانى ىسكە اسىرۋ ۇسىنىلدى. قازىرگى ۋاقىتتا وڭىرلەردەگى اكىمدىكتەرىمەن, دامۋ ينستيتۋتتارىمەن جانە «اتامەكەن» ۇكپ-مەن كەلىسە وتىرىپ قۇرىلىس يندۋسترياسى جوبالارىن 2025 جىلعا دەيىن ەگجەي-تەگجەيلى ىسكە اسىرۋ جونىندەگى جول كارتاسى بەكىتىلدى.
يندۋستريا جانە ينفراقۇرىلىمدىق دامۋ مينيسترلىگى «Samruk-Kazyna Construction» اق-مەن بىرلەسىپ, يمپورتتى الماستىراتىن 35 جوبا ىرىكتەپ الدى.
بۇل جوبالاردى ىسكە اسىرۋ سانتەحكەراميكا, جىلۋ وقشاۋلاعىش ماتەريالدار, بولمەلەر اراسىنداعى ەسىكتەر, دسپ, شىنى, كەراميكالىق پليتكالار, ەدەن جابىندارى جانە باسقا دا قۇرىلىس ماتەريالدارى ساناتىنداعى يمپورت ۇلەسىن تومەندەتۋگە مۇمكىندىك بەرەدى.
سونداي-اق, ۆەدومستۆو بيۋدجەت قاراجاتى ەسەبىنەن سالىنىپ جاتقان وبەكتىلەر قۇرىلىسىنىڭ قىمباتتاۋىنىڭ الدىن الۋ ءۇشىن قادامدار جاساۋدا.
ماسەلەن, قۇرىلىس رەسۋرستارى قۇنىنىڭ ەلەۋلى اۋىتقۋىنا جەدەل دەن قويۋ ماقساتىندا ۆەدومستۆو قۇرىلىس ماتەريالدارىنىڭ وزەكتى سمەتالىق باعالارىنىڭ جيناقتارى شىعارىلۋدا. بۇل بيۋدجەتتىك وبەكتىلەردىڭ اياقتالماعان قۇرىلىس كولەمىنىڭ ۇلعايىپ كەتۋ تاۋەكەلىن تومەندەتۋگە مۇمكىندىك بەرەدى.
ايتا كەتسەك, ەلىمىزدە مەملەكەتتىك ينۆەستيتسيالار ەسەبىنەن سالىنىپ جاتقان 286 نىساننىڭ قۇرىلىسى توقتاتىلعان. 84 جاعداي بويىنشا قۇرىلىس جۇمىستارى جوبالاردىڭ قىمباتتاۋىنا بايلانىستى توقتاعانى انىقتالدى.
قۇرىلىس سالاسىن تۇراقتى مونيتورينگىلەۋ نىسانداردى قارجىلاندىرۋ كەزىندە جەرگىلىكتى اتقارۋشى ورگانداردىڭ جۇيەسىز ءىس-قيمىلى قىمباتتاۋدىڭ بىردەن ءبىر سەبەبى بولىپ تابىلاتىنىن كورسەتەدى. ءبىر نىساندى اياقتاماي, ولار تاعى بىرنەشە جوبانى جۇزەگە اسىرۋعا كىرىسىپ, وسى قاراجات شەگىندە قۇرىلىستىڭ اياقتالۋ مەرزىمىن ۇزارتادى. بۇل مەردىگەرلەردىڭ ءوز مىندەتتەمەلەرىن تولىقتاي ورىنداماي, قۇرىلىس جۇمىستارىنىڭ توقتاۋىنا اكەپ سوعادى. وتكەن جىلى قۇرىلىس رەسۋرستارى قۇنىنىڭ وسۋىنە بايلانىستى وڭىرلەردىڭ اكىمدىكتەرى 641 جوبا بويىنشا قۇرىلىس قۇنىن تۇزەتۋ بويىنشا ءوتىنىش بىلدىرگەن.
وسىعان بايلانىستى قر يدم قارجى مينيسترلىگىنە قارجىلاندىرۋ مەرزىمدەرىن ورىنداۋ بولىگىندە جاۋاپكەرشىلىك شارالارىن قاتاڭداتۋدى, سونداي-اق جوبالاردى تۇزەتۋدى جەڭىلدەتۋ بولىگىندە مەملەكەتتىك اۋديت جۇرگىزۋ مەرزىمدەرىن ناقتىلاۋدى ۇسىندى.
قابىلدانىپ جاتقان شارالار ەلدەگى تۇرعىن ءۇي جانە ونەركاسىپ قۇرىلىسىنىڭ قارقىنىن تومەندەتپەۋگە مۇمكىندىك بەرەدى دەپ كۇتىلۋدە.
