ارنايى قۇرىلعان جەدەل تەرگەۋ توبى بەس ايدان بەرى قىلمىستىق توپتىڭ ۇيىمداستىرۋشىسى مەن مۇشەلەرىنە قاتىستى جەدەل تەكسەرىس جۇرگىزگەن. قر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ مىندەتىن اتقارۋشى اسقار مۇحامەتقاليەۆتىڭ ايتۋىنشا, قىلمىستىق توپتىڭ قىزمەتى ناقتى جولعا قويىلعان.
توپتىڭ ۇيىمداستىرۋشىسى - قىزىلوردا وبلىسىنىڭ تۇرعىنى. ول شىمكەنت-اتىراۋ باعىتىنداعى اۆتوبۋستار ارقىلى ماريحۋانا جەتكىزۋمەن اينالىسقان. توپتىڭ باسقا مۇشەلەرى ونىڭ نۇسقاۋلارىن ورىنداپ, تاۋاردى قارسى الىپ, بەلگىلى ءبىر جەردە ساقتاعان. سودان كەيىن مەكەن جايلارعا تاراتىپ, ەسىرتكىنى ساتۋدان تۇسكەن اقشانى جيناپ, كارتاعا اۋدارىپ وتىرعان.
بۇل ارەكەتتەن تۇسكەن تابىس التى ميلليون تەڭگەدەن اسقان. ال توپ مۇشەلەرى - قىزىلوردا, قاراعاندى جانە اتىراۋ وبلىستارىنىڭ تۋمالارى.
وسى دەرەككە قاتىستى قر قك-ءنىڭ 262-بابى «ۇيىمداسقان توپ, قىلمىستىق ۇيىم قۇرۋ جانە وعان باسشىلىق ەتۋ, سول سياقتى ولارعا قاتىسۋ» بويىنشا سوتالدى تەرگەۋ باستالدى. توپتىڭ ۇيىمداستىرۋشىلارى مەن قاتىسۋشىلارىنىڭ مۇلكى تاركىلەنىپ, 12 جىلعا دەيىن باس بوستاندىعىنان ايىرىلۋى مۇمكىن.
