تۇركيالىق ديپلوماتتىڭ ايتۋىنشا, وسى اپتادا ىستانبۇلدا وتكەن كەلىسسوزدەرىنىڭ قورىتىندىسى بويىنشا د.كۋلەبا جانە س.لاۆروۆ تەلەفون ارقىلى سويلەسكەن. م.چاۆۋشوعلۋ رەسەيلىك ميللياردەر رومان ءابراموۆيچتىڭ ۋكراينا مەن رەسەي باسشىلارى اراسىنداعى بايلانىس ورناتۋدا پايدالى ءرول اتقارعانىن جەتكىزدى.
سونىمەن قاتار تۇركيا سىرتقى ىستەر ءمينيسترى ىستانبۇلدا قول جەتكىزىلگەن ۋاعدالاستىقتار بارىسىندا ايتىلعان مىندەتتەمەلەر ورىندالماي جاتقانىنا نازار اۋداردى. رەسەي تاراپى م.چاۆۋشوعلىنىڭ سوزىنە بايلانىستى پىكىر ءبىلدىرىپ, ماسكەۋدىڭ س.لاۆروۆ پەن د.كۋلەبا كەزدەسۋىنەن باس تارتپايتىنىن ايتقان.
اقش بارلاۋ اگەنتتىكتەرى رەسەي پرەزيدەنتى ۆلاديمير پۋتين شىنايى احۋالدان حابارسىز دەپ ەسەپتەيدى. ولاردىڭ كەلتىرگەن بايانداماسىنا سۇيەنسەك, كرەمل باسشىسىنىڭ اينالاسىنداعىلار وعان نە بولىپ جاتقانى تۋرالى ناقتى جانە تولىق اقپارات بەرمەيتىن كورىنەدى. «پۋتينگە رەسەيلىك اسكەريلەر قاتە اقپارات بەرەتىنى تۋرالى اقپارات قولدا بار. بۇل پۋتين مەن اسكەري باسشىلىق اراسىنداعى شيەلەنىستىڭ جالعاسۋىنا اكەلىپ سوعادى. پۋتينگە كەڭەسشىلەر رەسەي اسكەرىنىڭ ساتسىزدىگى جانە ەل ەكونوميكاسىنىڭ سانكتسيالاردان قانشالىقتى زارداپ شەككەنى تۋرالى قاتە اقپارات بەرىپ وتىر دەپ سانايمىز», دەدى اقۇيدىڭ كوممۋنيكاتسيالار جونىندەگى ديرەكتورى كەيت بەدينگفيلد جۋرناليستەرگە بەرگەن سۇحباتىندا.
ك.بەدينگفيلدتىڭ ايتۋىنشا, د.بايدەن اكىمشىلىگى ۋكراينامەن قارۋلى قاقتىعىستىڭ رەسەيگە قانشالىقتى ستراتەگيالىق زارداپ اكەلگەنىن كورسەتۋ ءۇشىن مۇنداي اقپاراتپەن بولىسۋگە شەشىم قابىلداعان. كەيت بەدينگفيلد اقش بارلاۋ قىزمەتى مالىمەتتەردى قالاي جيناعانى, كىمنەن العانى قۇپيا دەپ مالىمدەدى.
GCHQ ۇلىبريتانيالىق ەلەكتروندى بارلاۋ باسشىسى دجەرەمي فلەمينگتە وسىنداي پىكىردى ۇستانىپ وتىر. ونىڭ ايتۋىنشا, رەسەي پرەزيدەنتى ۆلاديمير پۋتين ۋكرايناعا اسكەر اتتاندىرماس بۇرىن ءوزىنىڭ اسكەرىنىڭ دە, قارسى تاراپتىڭ دا كۇشىن دۇرىس باعالاماعان. ەندى كرەمل باسشىسىنىڭ اينالاسىنداعىلار ناقتى جاعداي تۋرالى ەسەپ بەرۋگە قورقاتىن كورىنەدى. «پۋتين جاعدايدى باعالاۋدا وتە ۇلكەن قاتەلىك جىبەردى. ءبىزدىڭ ويىمىزشا, ءپۋتيننىڭ كەڭەسشىلەرى قازىر وعان شىندىقتى ايتۋدان قورقادى», دەدى د.فلەمينگ.
ۋكراينا پرەزيدەنتى ۆولوديمير زەلەنسكي الەم ەلدەرىنە ارناعان بەينەۇندەۋلەرىن جالعاستىردى. بۇل جولى ۋكراينا باسشىسى نيدەرلاند پارلامەنتىندە ءسوز سويلەپ, قارۋ-جاراق بەرۋدى جانە ەلدى قالپىنا كەلتىرۋگە كومەكتەسۋدى سۇرادى. ۆ.زەلەنسكي رەسەيگە قاتىستى بۇكىل ىسكەرلىك بايلانىس پەن ساۋدا-ساتتىقتى توقتاتۋعا, سانكتسيالاردى قاتاڭداتۋعا شاقىردى.
سونداي-اق ول اۋستراليا پارلامەنتشىلەرى مەن سەناتورلارىنا بەينەۇندەۋ جاريالاپ, ۋكراينا الەمدىك قوعامداستىقتىڭ قولداۋىنا سەنەتىنىن, رەسەيگە قارسى سوعىستا جەڭىلمەيتىنىن مالىمدەدى.
ۋكراينا پرەزيدەنتى اۋستراليالىقتاردان Bushmaster برونەترانسپورتەرلەرىن جىبەرۋدى سۇرادى. ءبىر قىزىعى, ءدال سول كۇنى اۋستراليا رەسەي مەن بەلارۋستەن كەلەتىن كەز كەلگەن تاۋارلارعا قوسىمشا 35 پايىز باج سالىعىن ەنگىزەتىنىن حابارلادى.
ۇلىبريتانيا قورعانىس مينيسترلىگى رەسەي چەرنيگوۆ وبلىسىندا اسكەري بەلسەندىلىكتى ازايتامىز دەپ مالىمدەگەنىنە قاراماستان, بومبالاۋدى جالعاستىرىپ جاتقانىن مالىمدەدى.
كەيبىر بولىمشەلەردى شىعارعانىمەن رەسەيلىك اسكەريلەر كيەۆتىڭ شىعىسى مەن باتىسىنداعى پوزيتسيالارىن ءالى دە ۇستاپ تۇر. ۇلىبريتانيا تاراپى جاقىن كۇندەرى قالانىڭ شەتىندە اۋىر شايقاستار باستالادى دەپ ەسەپتەيدى. رەسەي ارمياسىنىڭ باستى نىساناسىنا اينالعان ماريۋپولدە اۋىر شايقاستار ءجۇرىپ جاتىر. ۋكراين اسكەرى قالا ورتالىعىن ءالى دە باقىلاۋىندا ۇستاپ وتىر.
اقش تاراپى وتكەن اپتادا رەسەي چەرنوبىلدەگى ساربازدارىن اكەتىپ جاتقانىن حابارلاعان. كەيىننەن بۇقارالىق اقپارات قۇرالدارىندا ولاردىڭ ساۋلە اۋرۋىنا شالدىعىپ, اۋرۋحاناعا جاتقىزىلعانى ايتىلدى. بۇل مالىمەتتى ازىرگە ناقتى تەكسەرۋ مۇمكىن ەمەس.
رەيتەر اگەنتتىگىنىڭ تاراتقان مالىمەتتەرىنە قاراعاندا, رەسەيلىك جاۋىنگەرلەر قورعانىس قۇرالدارىنسىز راديواكتيۆتى «قىزىل ورمان» دەپ اتالاتىن جەردەن بروندى كولىكتەرىمەن وتكەن, ءسويتىپ ۋلى شاڭ كوتەرىلگەن.
