بۇل كۇندە تامدى اۋىلىندا 1 547 ادام تۇرادى. 246 ءۇي بار. اۋىل اقساقالى سەيىتحان قويلىباەۆ ءاردايىم جاستاردى بىرلىككە, تاتۋلىققا شاقىرىپ كەلەدى. اۋىل ازاماتتارى دا ءبىر ءۇيدىڭ بالاسىنداي بىرلىكتە عۇمىر كەشىپ وتىر.
تامدى تۇرعىندارى نەگىزىنەن مال جانە ەگىن شارۋاشىلىعىمەن اينالىسادى. سونداي-اق بۇل اۋىلدا 85 شارۋا قوجالىعى مەن 25 جەكە كاسىپكەرلىك نىسانى جۇمىس ىستەيدى. ال اۋىلدىق وكرۋگ اكىمى راۋان اسقاروۆتىڭ ايتۋىنشا, اۋىل تۇرعىندارى بۇگىندە ۇيىمشىلدىقپەن تىرلىك ىستەپ, بەرەكەسىن بىرلىكتەن تاۋىپ وتىر.
«اۋىلدا الەۋمەتتىك از قامتىلعان 31 وتباسى بار. ازاماتتار مۇمكىندىگىنشە مۇقتاج جاندارعا كومەك كورسەتىپ كەلەدى. بۇگىندە بىرلىگىمىزدىڭ ناتيجەسىندە اۋىل ازاماتتارى بىرىگىپ, كەزىندە كوگىلدىر وتىنعا قوسىلا الماي قالعان 6 ۇيگە گاز تارتۋ جۇمىسىن جۇرگىزۋدە. سونىمەن قاتار ءبارى ۇيىمداسىپ «اسارلاتىپ ءۇي سالۋ» جوباسى بويىنشا ءتورت بالاسى بار ءبىر جاس وتباسىنا ءۇي سالىپ بەردى. مۇنداي جۇمىستار الداعى ۋاقىتتاردا دا جالعاسا بەرەدى», دەيدى ول.
تاعى ءبىر قۋانارلىعى, قازىرگى كەزدە جاستار اۋىلدا تۇراقتاپ قالىپ جاتىر. بىرقاتار ازامات قاراتاۋ قالاسىنىڭ ىرگەسىندەگى «تالاسينۆەستكومپاني» كومپانياسىندا جانە «تاراز-جاڭاتاس» باعىتىنداعى تەمىر جولدا جۇمىس ىستەيدى. اۋىلدا بىردە-ءبىر جۇمىسسىز جۇرگەن جاس جوق.
تامدى اۋىلىندا گاز, سۋ ماسەلەلەرى شەشىلگەن. بۇگىندە اۋىل ازاماتتارى تۋعان جەرگە تۋ تىگىپ, جۇمىس اتقارۋدا. 2016 جىلى اۋىلدان شىققان كاسىپكەر جۇماحان تانكەباەۆ اۋىلعا جاڭا مەشىت سالىپ بەرىپتى. ال 2018 جىلى بالالار سپورت الاڭشاسىن پايدالانۋعا بەرگەن. بۇل كۇندە سەيىتحان قويلىباەۆ, قانات قۇرالباەۆ جانە وزگە دە اۋىل اقساقالدارىنىڭ باستاماسىمەن ىشىمدىك ساتۋ مۇلدە توقتاتىلعان. اۋىلدا قازىر ءۇش دۇكەن بولسا, ونىڭ ەشقايسىسىندا دا اراق-شاراپ ساتىلمايدى. جاستار دا يمان جولىنا بەت بۇرىپ, ىشىمدىك اتاۋلىنى پايدالانبايتىن بولعان. الدىڭعى بۋىن اعالاردىڭ سالعان جولىنا تۇسكەن اۋىل جاستارى دا قازىرگى كەزدە ءتارتىپ پەن تاتۋلىقتى قولدايدى. ناتيجەسىندە, اۋىلدا كەيىنگى ءۇش جىلدا ەشقانداي ءتارتىپ بۇزۋشىلىق تىركەلمەگەن. قايتا قولدا بارىن ءبىر-بىرىنە ءبولىپ بەرىپ, بەرەكەلى كۇن كەشىپ جاتقان اۋىل ازاماتتارى الداعى ۋاقىتتا دا تالاي يگى ىستەردى جۇزەگە اسىرماق نيەتتە.
جامبىل وبلىسى
