مەملەكەت باسشىسى الەمدەگى گەوساياسي جاعدايدىڭ قۇبىلمالى بولۋى ءبىزدىڭ ەكونوميكامىزعا ايتارلىقتاي اسەر ەتكەنىن اتاپ ءوتىپ, مەملەكەتتىك ورگانداردىڭ ۇيلەسىمدى ءارى ءتيىمدى جۇمىس ىستەۋى قاجەت ەكەنىن ايتتى.
– جاعداي كۇن سايىن وزگەرۋدە, وتە قۇبىلمالى كەزەڭ. سوندىقتان ءبىز بارلىق سىن-قاتەر مەن مۇمكىندىكتى ناقتى ءارى تەز انىقتاپ, ءار قادامىمىزدى نىق باسۋىمىز كەرەك. قابىلداناتىن شەشىمدەر بارىنشا سالماقتى بولعانى ءجون. بىراق سوزبالاڭعا سالماي, شۇعىل شارالاردى قولعا الۋىمىز كەرەك. قاعازباستىلىققا جول بەرمەۋ قاجەت, – دەدى قاسىم-جومارت توقاەۆ.
جيىن بارىسىندا پرەمەر-مينيستر ءاليحان سمايىلوۆ ەكونوميكانىڭ قازىرگى جاعدايى مەن ونىڭ دامۋىنا قاتىستى بولجامدار تۋرالى باياندادى. ۇلتتىق بانك توراعاسى عالىمجان ءپىرماتوۆ قازىرگى ۋاقىتتا جۇرگىزىلىپ جاتقان اقشا-كرەديت ساياساتى جونىندە ەسەپ بەردى. پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ 2022 جىلعا ارنالعان رەسپۋبليكالىق بيۋدجەتتىڭ ناقتى پارامەترلەرى جايىندا مالىمەت بەردى.
سونىمەن قاتار ءىس-شارادا بيۋدجەت شىعىندارىن وڭتايلاندىرۋ, كوكتەمگى ەگىس ناۋقانىنا دايىندىق بارىسى, ەكسپورت ساياساتىن دامىتۋ, ينۆەستيتسيا تارتۋ جانە كولىك لوگيستيكاسىن جەتىلدىرۋ, سونداي-اق حالىقتىڭ تابىسىن ارتتىرۋ باعدارلاماسىن جۇزەگە اسىرۋ ماسەلەلەرى تالقىلاندى.
كەڭەس قورىتىندىسى بويىنشا مەملەكەت باسشىسى ۇكىمەت پەن پرەزيدەنت اكىمشىلىگىنە ەلىمىزدىڭ الەۋمەتتىك-ەكونوميكالىق دامۋ ماسەلەلەرىنە قاتىستى بىرقاتار تاپسىرما بەردى.
