سايىس Satbayev university-دە وفلاين فورماتتا ءوتتى. جارىسقا قاتىسۋعا ەلىمىزدىڭ بارلىق وڭىرىنەن 107 كوماندا ءوتىنىش بەردى. 230 ستۋدەنتتەن قۇرالعان 72 كوماندا فينالعا جولداما العان. ناتيجەسىندە, 15 ستۋدەنتتەن قۇرالعان 4 كوماندا جەڭىمپاز اتاندى. ولار 3,5 ملن تەڭگەنى ءبولىستى. ماراپاتتاۋ راسىمىنە قاتىسقان ءبىلىم جانە عىلىم ءمينيسترى اسحات ايماعامبەتوۆ قاتىسۋشىلاردىڭ ۇسىنعان جوبالارى وتە قىزىقتى بولعانىن جەتكىزدى.
«قاتىسۋشىلار ءبىلىم بەرۋ سالاسىندا وتە قىزىقتى تسيفرلىق جوبالاردى ۇسىندى. جەڭىمپاز ستۋدەنتتەر اقشالاي سىيلىقتارمەن قوسا, بايقاۋدى وتكىزۋگە قولداۋ بىلدىرگەن Daryn online, BTS Education, EDUS جانە Mail.kz جانە باسقا دا قازاقستاندىق IT-كومپانيالاردا جۇمىسقا ورنالاسۋ مۇمكىندىگىنە يە بولدى. سونىمەن قاتار كەيبىر تسيفرلى شەشىمدەر ءوز ينۆەستورلارىن تاۋىپ ۇلگەردى», دەدى ا.ايماعامبەتوۆ.
مينيسترلىكتىڭ مالىمدەۋىنشە, قازىلار القاسىنىڭ شەشىمىمەن Nazarbayev University جانە Astana IT University ستۋدەنتتەرى جەڭىمپاز اتاندى. ولار ءوزارا 1,5 ملن تەڭگەنى ءبولىستى. ەكىنشى ورىندى نازارباەۆ ۋنيۆەرسيتەتىنىڭ تاعى ءبىر كومانداسى جەڭىپ الدى. ولار 1 ملن تەڭگەنى جەڭىپ الدى. ءۇشىنشى ورىن ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ, Suleyman Demirel University جانە Astana IT University ستۋدەنتتەرىنەن قۇرالعان قوس كومانداعا بۇيىردى. ەكى كوماندانىڭ ارقايسىسى 500 مىڭ تەڭگەدەن سىياقى يەلەندى.
BILIM Hackathon 2022 IT بايقاۋىندا ءۇشىنشى ورىندى يەلەنگەن Suleyman Demirel University ستۋدەنتتەرى جارىسقا مۇمكىندىگى شەكتەۋلى وقۋشىلار مەن ستۋدەنتتەرگە ارنالعان جوبالارىن ۇسىندى. 2-كۋرس ستۋدەنتى قاجىمۇقان رەيمباەۆتىڭ ايتۋىنشا, ولار بۇل يدەيانى 24 ساعاتتا ويلاپ تاپقان.
«جارىستا ۇسىنعان جوبامىز مۇمكىندىگى شەكتەۋلى جاندارعا ارنالعان. مەكتەپ وقۋشىلارى ارنايى قولعاپتى كيىپ, ىم-يشارا ارقىلى ويىن جەتكىزەدى. ءبىز ويلاپ تاپقان قۇرىلعى ولاردىڭ ويىن تۇسىنىكتى تىلگە اينالدىرىپ بەرەدى. تاعى ءبىر يدەيامىز زاعيپ جاندارعا ارنالعان. وقۋشىلار مەن ستۋدەنتتەر ءۇشىن وقۋلىقتاعى ارىپتەردى برايل شريفىنە اينالدىراتىن قۇرىلعى مەن قوسىمشا ويلاپ تاپتىق. بۇل جوبالاردى ويلاپ تابۋ ءۇشىن بىزگە 24 ساعات ۋاقىت بەرىلدى. جارىستا 72 كوماندانىڭ ىشىندە ءىىى ورىن الىپ, 500 مىڭ تەڭگە ۇتىپ الدىق. الداعى ۋاقىتتا جوبالارىمىزدى ىسكە اسىرامىز», دەيدى «اقپاراتتىق جۇيەلەر» ماماندىعىنىڭ ستۋدەنتى.
2022 جىلدىڭ 26-27 ناۋرىزىندا وتكەن cايىستىڭ جەڭىمپازدارىن ءبىلىم جانە عىلىم ءمينيسترى اسحات ايماعامبەتوۆ ماراپاتتادى. بايقاۋ ءبىلىم مەن عىلىم سالاسىندا جاڭا IT جوبالاردى جاساۋعا باستاماشى بولۋ, IT مامانداردى ىنتالاندىرۋ ماقساتىندا ۇيىمداستىرىلدى.
