پرەزيدەنتتىك بيلىكتى كۇشەيتۋ ءۇشىن ءتۇرلى ينستيتۋتتارعا سۇيەنۋ, سونىڭ ىشىندە ءوزى مۇشەسى بولىپ تابىلاتىن پارلامەنتتىك پارتيانىڭ توراعاسى بولۋ بۇگىنگە دەيىن بارلىق بيلىكتى مونوپوليالاندىرۋعا الىپ كەلدى. پرەزيدەنتتىڭ پارتياسى بولعان سوڭ بارلىق بيلىك رەسۋرستارى سول پارتيانىڭ مۇددەسىنە قىزمەت ەتتى. ساياسي باسەكەلەستىك ءىس جۇزىندە وتە تومەن دارەجەدە بولدى. ال مۇندايدىڭ قانداي ناتيجە بەرەرى الدىن الا بەلگىلى ەدى. حالىقتىڭ سايلاۋعا دەگەن, قوعامدىق ءومىردى جاقسارتۋعا دەگەن قۇلشىنىسى مەن بەلسەندىلىگى بارىنشا سالقىندادى. وسى بەيجايلىقتان ارىلۋدىڭ ەڭ باستى جولى – پرەزيدەنتتىڭ پارتيانىڭ توراعاسى بولۋدان باس تارتۋى ەكەنىن قاسىم-جومارت كەمەل ۇلى ءدوپ باسىپ ايتتى.
ساياسي ءومىرىمىزدى جاقسارتۋعا باعىتتالعان ەكىنشى ماسەلە – ماجوريتارلىق جۇيەنىڭ ەنگىزىلۋى. ءبىز ازىرگە, ساياسي پارتيالار ءوزارا اشىق كۇرەس ارقىلى تەك پروپورتسيونالدىق سايلاۋ جۇيەسىمەن سايلانىپ, بيلىككە قول جەتكىزەتىن دەموكراتياسى جوعارى دامىعان باتىس مەملەكەتتەرىندەي بولا المايمىز. وعان قول جەتكىزۋ ءۇشىن ساياسي دامۋدىڭ ءبىراز جولدارىنان ءوتۋىمىز كەرەك. سوندىقتان دا پرەزيدەنتتىڭ پارلامەنت دەپۋتاتتارىنىڭ 30 پايىزى بۇرىنعى ماجوريتارلىق جۇيەمەن سايلانۋىن ەنگىزۋ تۋرالى باستاماسىن وتە دۇرىس دەپ سانايمىن. حالىق بەلسەندىلىگى ارتپاسا شاعىن توپتارمەن مەملەكەتتىڭ ساياسي جۇيەسىنىڭ دامۋى, اشىقتىعى مەن زاڭ ۇستەمدىگىنىڭ ورناۋى مۇمكىن ەمەس. ال بۇلار بولماسا سىبايلاس جەمقورلىق سياقتى ىندەتتىڭ ارتا بەرەرى ءسوزسىز.
سونىمەن قاتار جولداۋدا پرەزيدەنت پارلامەنتتىڭ وكىلەتتىگىن ارتتىرىپ, بيلىكتىڭ ءبىراز تارماعىن بەرۋدى ۇسىندى. بۇل دا قايناۋى جەتكەن ماسەلە. ناقتى بيلىك تەك قانا پرەزيدەنتكە بايلانعان مەملەكەتتە اكىمدەر مەن مينيسترلەر پارلامەنت دەپۋتاتتارىنىڭ ساۋالدارى مەن ونداعى تالاپتاردى جۇرە تىڭداپ, وعان شىعارىپ سالما جاۋاپتار بەرۋگە ابدەن داعدىلانىپ الدى. ەگەر وكىلدى بيلىك ءوز تاراپىنان باستاما كوتەرىپ, پارلامەنت تالاپتارىن ورىندامايتىن جوعارى بيلىك يەلەرىن تىڭداپ قانا قويماي, وندايلاردى ورىندارىنان الۋ, قىزمەتىنەن شەتتەتۋ قۇقىعى بولسا – ماسەلە مۇلدە باسقاشا بولار ەدى. پرەزيدەنت ءوزىنىڭ جولداۋىندا وسى ولقىلىقتىڭ ورنىن تولتىرىپ, پارلامەنتكە قوسىمشا وكىلەتتىك بەرۋ كەرەكتىگىن ايتتى. بۇل پارلامەنتتىڭ بەدەلى مەن ىقپالىن ءىس جۇزىندە ارتتىراتىن شارا بولماق. مۇندايدا مينيسترلەر مەن اكىمدەر وكىلدى بيلىك الدىنداعى ءوز جاۋاپكەرشىلىگىن سەزىنىپ, ەسەپتەرىنە مۇقيات دايىندالاتىن بولادى, دەپۋتاتتاردىڭ ساۋالدارىنا دا بەيجاي قاراماي, ورىندى ۇسىنىستاردىڭ وڭ شەشىلۋىنە جانىن سالار ەدى. ال بۇگىنگە دەيىن ول پارلامەنتتەن كەلگەن ساۋالدى تومەنگە سىرعىتىپ, جالتارما جاۋاپ بەرە سالۋدى عانا بىلەدى.
پرەزيدەنت جەرگىلىكتى وكىلدى ورگانداردىڭ دا وكىلەتتىگىن ارتتىرۋدى كوزدەگەن بىرنەشە وزگەرىس بولاتىنىن ايتتى. وسى كۇنگە دەيىن ءماسليحاتتار اكىمنىڭ قولجاۋلىعى بولىپ كەلگەنى بەلگىلى. ەندى شىن مانىندەگى حالىق وكىلدىلىگىنە اينالسا قۇبا-قۇپ بولار ەدى.
جولداۋدىڭ ونە بويىنان مەملەكەتتىڭ جارقىن بولاشاعىن, ىرگەسىنىڭ نىعايا ءتۇسۋىن كوزدەگەن وسىنداي ورىندى وزگەرىستەر كورىنىپ تۇر. ەندى تەك ولاردىڭ شاشاۋ شىقپاي ورىندالۋىن تىلەيمىز.
ەرىك نۇراقاەۆ,
سولتۇستىك قازاقستان وبلىستىق كاسىپوداقتار ورتالىعىنىڭ توراعاسى
سولتۇستىك قازاقستان وبلىسى
