وتكەن كۇننەن ساباق الۋدى قاجەت دەپ ەسەپتەيتىن مەملەكەت باسشىسى بيىلعى قاڭتاردا قازاقستاننىڭ ىشكى جانە سىرتقى جاۋلارىنىڭ تاۋەلسىزدىگىمىزگە ۇلكەن قاۋىپ-قاتەر توندىرگەنىن اشىق ايتتى. بەيبىت شەرۋگە شىققانداردى پايدالانىپ, نيەتى مەن ماقساتى بولەك ادامدار ەلدە توڭكەرىس جاساۋدى كوزدەدى, بىرنەشە قالادا عيماراتتاردى قيراتىپ, ورتەدى جانە كوپتەگەن ساۋدا ورتالىعىن تونادى. نەبىر ارانداتۋشىلىق ارەكەتتەر جاسادى. الايدا ەلدىگىمىزگە سىزات تۇسكەن جوق. حالقىمىز مىزعىماس بىرلىگى مەن ىنتىماعىن ساقتاپ قالدى.
ق.توقاەۆ بۇل جولداۋدا كەشەندى جاڭعىرتۋ باعدارلاماسىن ۇسىندى. اتا زاڭىمىزعا ەلەۋلى تۇزەتۋلەر ەنگىزىلەتىن بولدى. سونىڭ ىشىندە لاۋازىمدى تۇلعالاردىڭ ءوز قۇزىرەتىن اسىرا پايدالانۋعا جول بەرمەۋ ماقساتىنداعى باستاماسى حالىقتىڭ كوڭىلىنەن شىعىپ وتىر. كونستيتۋتسيانىڭ 40-بابىنىڭ 2-تارماعىندا: «رەسپۋبليكانىڭ پرەزيدەنتى – حالىق پەن مەملەكەتتىك بيلىك بىرلىگىنىڭ, كونستيتۋتسيانىڭ مىزعىماستىعىنىڭ, ادام جانە ازامات قۇقىقتارى مەن بوستاندىقتارىنىڭ نىشانى ءارى كەپىلى», دەپ جازىلعان.
پرەزيدەنت ءوز قىزمەتى كەزىندە تىنىش ءومىردى قامتاماسىز ەتىپ, حالىقتىڭ بىردەي مۇمكىندىككە يە بولۋىنا كەپىلدىك بەرەتىنىن ايتا كەلىپ: «پرەزيدەنتتىڭ جاقىن تۋىستارىنا ساياسي مەملەكەتتىك قىزمەتشى بولۋعا جانە كۆازيمەملەكەتتىك سەكتوردا باسشىلىق لاۋازىمداردى يەلەنۋگە زاڭ جۇزىندە تىيىم سالىنادى», دەدى قاسىم-جومارت توقاەۆ. بۇل بارلىق دەڭگەيدەگى باسشىلارعا ۇلگى بولۋعا ءتيىس.
مەملەكەت باسشىسى ءوزىنىڭ باستامالارى جۇرتشىلىقتىڭ وتىنىشتەرى, سونداي-اق پارلامەنت دەپۋتاتتارى, كونستيتۋتسيالىق كەڭەس, ورتالىق سايلاۋ كوميسسياسى, جوعارعى سوت جانە بەدەلدى ساراپشىلاردىڭ ۇسىنىمدارى نەگىزىندە قالىپتاستىرىلعانىن ەسكەرتىپ ءوتتى. سونىمەن قاتار ۇلتتىق قوعامدىق سەنىم كەڭەسىندە كوكەيكەستى ماسەلەلەر تالقىلانىپ, ورتاق تۇجىرىمدار جاسالعانىن جەتكىزدى. ەندى اتالعان كەڭەستىڭ ورنىنا حالىقتىق نەگىزدە ۇلتتىق قۇرىلتاي قۇرىلاتىن بولدى. ول ەلىمىزدەگى ەڭ وزەكتى ماسەلەلەردى شەشۋدىڭ جولدارىن قاراستىرىپ, ناقتى ۇسىنىستار بەرەتىن بولادى.
پرەزيدەنت كوتەرگەن وكىلدى بيلىك تارماعىن قايتا قۇرۋ دا زامان تالابى. پارلامەنتتىڭ قوس پالاتاسىنىڭ قۇرامى وزگەرەدى. سونىمەن قاتار قوعامداعى ءرولى نىعايا تۇسەدى. جۇرتشىلىقتىڭ بيلىككە دەگەن سەنىمىن نىعايتۋ ماقساتىندا جەرگىلىكتى ءماسليحاتتاردىڭ دا وكىلەتتىگى ارتادى. بۇل وڭىرلەردىڭ ساياسي-ەكونوميكالىق, الەۋمەتتىك دامۋىنا وڭ ىقپال ەتەدى.
«پارتيادا جوق ازاماتتار ماجىلىسكە عانا ەمەس, جەرگىلىكتى وكىلدى ورگاندارعا دا سايلانا المايتىن بولدى. مۇنى اشىق مويىنداۋىمىز كەرەك. سونىڭ سالدارىنان حالىقتىڭ سايلاۋ ناۋقانىنا قىزىعۋشىلىعى كۇرت تومەندەدى», دەپ قوعامداعى ورىن العان كەمشىلىكتەردى انىق كورسەتكەن مەملەكەت باسشىسى سايلاۋ جۇيەسىن جەتىلدىرۋدىڭ جولدارىن اتادى. سايلاۋشىلاردىڭ مۇددەسى ۇلتتىق جانە وڭىرلىك دەڭگەيدە تولىق كورىنىس تابۋى ءۇشىن ءماجىلىستىڭ دەپۋتاتتىق كورپۋسىنىڭ 70 پايىزىن پروپورتسيونالدىق, 30 پايىزىن ماجوريتارلىق تاسىلمەن جاساقتاۋ كەرەكتىگىن العا تارتتى. قاسىم-جومارت كەمەل ۇلىنىڭ بۇل ۇسىنىسى دا قازىر حالىقتان تولىق قولداۋ تاۋىپ وتىر.
بارلىق پارتيانى دامىتۋدى ۇسىندى. بارىنە تەڭ مۇمكىندىك بەرۋ ماقساتىندا ءتيىستى زاڭدارعا تۇزەتۋ ەنگىزىلەدى. وسىعان وراي جاۋاپتى ورگاندارعا ناقتى تاپسىرمالار بەرىلدى.
اباي, ۇلىتاۋ جانە جەتىسۋ دەپ اتالاتىن جاڭا ءۇش وبلىستىڭ قۇرىلاتىنى وتانداستارىمىزعا ەرەكشە قۋانىش سىيلاعان جاڭالىق بولدى. مۇنىڭ ءبارى سول وڭىرلەردى وركەندەتۋ ءۇشىن جاسالىپ وتىرعان قادام. مۇنداي مىسالدى تۇركىستان وبلىسىنىڭ ورتالىعى بولعان تۇركىستان قالاسىنان كورىپ وتىرمىز. سونىمەن قاتار ىشكى كوشى-قون ماسەلەسىن رەتتەۋدى كوزدەيدى.
بۇگىنگى تاڭدا قارجى تۇراقتىلىعىن ساقتاۋدىڭ ماڭىزى زور. وسى رەتتە پرەزيدەنت داعدارىستى بولدىرماۋ ءۇشىن ونىڭ الدىن الاتىن قاجەتتى ءىس-شارالارعا توقتالدى. ۇكىمەتتىڭ بۇل ىستە وتە قىراعىلىق تانىتىپ, كەشەندى جۇمىستاردى جۇزەگە اسىرۋى ءتيىس ەكەنىن ايتتى. ويتكەنى ۇلتتىق ۆاليۋتانىڭ قۇنسىزدانىپ كەتپەۋى جانە ەكونوميكالىق ءوسىمنىڭ ساقتالۋى – باستى مىندەتتەردىڭ ءبىرى.
الداعى ۋاقىتتا ازىق-ت ۇلىك ونىمدەرىنىڭ باعاسى شارىقتاپ كەتسە, ول دا حالىققا اۋىر تيەدى. كوكتەمدە ەگىن ەگۋ ناۋقانى باستالادى. بۇل ءبىزدىڭ قازاقستان ءۇشىن ماڭىزدى كەزەڭ. سولتۇستىك وبلىستاردا, اسىرەسە قوستاناي وڭىرىندە استىقتان مول ءونىم الىپ كەلە جاتقانىمىز بەلگىلى. مەملەكەت باسشىسى كوكتەمگى ەگىن ەگۋ ناۋقانىن ساپالى وتكىزۋگە باسا نازار اۋداردى. ديقان قاۋىمىن قاجەتتى جانار-جاعارمايمەن, تەحنيكامەن, تۇقىم جانە تىڭايتقىشپەن قامتۋ ءىسىن جولعا قويعانىمىز ابزال. ۇكىمەت پەن اكىمدىكتەرگە وسى جۇمىستاردى جۇيەلى جۇرگىزۋدى تاپسىردى. ق.ك.توقاەۆتىڭ «فەرمەرلەر قاۋىمداستىعىمەن بىرلەسىپ, اگروونەركاسىپ كەشەنىن مەملەكەتتىك قولداۋ تاسىلدەرىن قايتا قاراۋ كەرەك», دەگەن ءسوزى شارۋا قوجالىقتارىنا ۇلكەن ءۇمىت سىيلاپ وتىر.
ويتكەنى استىق ءوندىرۋ ءبىر ادامنىڭ نە شارۋا قوجالىعىنىڭ جەكە ءىسى ەمەس. استىق – ەلدىڭ بايلىعى, حالىقتىڭ ىرىزدىعى! قازاقستاندا ەگىن جاقسى شىقسا, حالىق ەشتەڭەدەن تارىقپايتىنى انىق. استىعى مول ەلدە اشتىق بولمايدى!
ءبىزدىڭ پرەزيدەنتىمىز ەل ازاماتتارىنىڭ ەرتەڭ ەمەس, بۇگىن باقىتتى ءومىر سۇرگەنىن قالايتىنىن, ءوزى ءۇشىن ەلدىڭ اماندىعى مەن جەرىمىزدىڭ تۇتاستىعىنان اسقان قۇندىلىق جوق ەكەنىن مالىمدەدى. ءوسىپ-وركەندەگەن جاڭا قازاقستاندى قۇرۋعا كۇش سالىپ جاتقان مەملەكەت باسشىسىنىڭ باستامالارىن تولىق قولدايمىز جانە كەشەندى باعدارلامالاردىڭ تولىق جۇزەگە اسۋى ءۇشىن بارشا قازاقستاندىقتار اتسالىسادى دەگەن سەنىمدەمىن.
توقتارباي قادامباەۆ,
قوعام قايراتكەرى
قوستاناي
