وسكەمەندە, ەرتىستىڭ جاعالاۋىندا تاياقتارىن تىقىلداتىپ ءارلى-بەرلى سابىلىپ جۇرگەن قاريالاردى ءجيى كورەمىز. الايدا بۇل سپورت اۋىلدىق جەر ءۇشىن تاڭسىق. سپورت ەمەس, ەرىككەننىڭ ەرمەگى سياقتاناتىنى راس.
اۋىلدى اينالىپ, سارىمساقتى وزەنىنىڭ بويىمەن قۇلديلاپ كەلە جاتقان سپورتشىلاردىڭ بىرىمەن سويلەسىپ ەدىك, دەنساۋلىعىنىڭ جاقسارعانىن, كۇنى بويى سەرگەك جۇرەتىنىن ايتىپ, اڭگىمەلەسە جونەلدى. ءتىپتى, كۇننىڭ ايازى مەن بورانىنا قاراماستان, وزدەرى بەلگىلەپ قويعان شاقىرىمدى ءجۇرىپ وتەدى ەكەن. ارالارىندا زەينەتكەرلەر عانا ەمەس, جاستارى دا بار.
– «سكانديناۆيالىق سەرۋەننەن» حالىقارالىق جارىستار ءوتىپ تۇرادى. ءبىز جارىسقا قاتىسايىق دەپ ەمەس, شىنىعايىق, شىمىر بولايىق دەپ سەرۋەندەيمىز. تاۋ-تاسقا شىقساق تا, تاياقتى تاستامايمىز. قازىرگى تاڭدا كوپ كەزدەسەتىن حوندروز, وستەحوندروز, سكوليوز سەكىلدى اۋرۋلاردىڭ الدىن الاتىن ءبىر سپورت قايسى دەسە, وسى سەرۋەندى ايتار ەدىم. ويتكەنى ناتيجەسىن از ۋاقىتتىڭ ىشىندە سەزىنە باستادىم, – دەيدى كۇزدەن بەرى سكانديناۆيالىق ادىسپەن سەرۋەندەپ جۇرگەن زارينا ماستيكباەۆا.
كوزگە قاراپايىم كورىنگەنىمەن, پايداسى وراسان بۇل نە دەگەن سپورت دەپ, «سكانديناۆيالىق سەرۋەندەۋ» تۋرالى جازعان دارىگەرلەردىڭ, جاتتىقتىرۋشىلاردىڭ جازبالارىن پاراقتاپ كوردىك. شىنىمەن دە, جاس-كارى دەپ بولمەي اينالىساتىن سپورت سەكىلدى.
«سكانديناۆيالىق سەرۋەندەۋ» – ۇزاق ىرعاقتى جۇكتەمەسى بار اەروبيكا دەپ تۇسىنىك بەرەدى ماماندار. جۇيەلى تۇردە اينالىسسا, سۇيەكتەردى, قان تامىرلارىن, وكپەنى نىعايتادى. سترەستىك جاعدايلارعا جول بەرمەيدى, دەپرەسسيادان ارىلۋعا كومەكتەسەدى. كەيىنگى جىلدارى تانىمال بولىپ كەتكەن بۇل سپورتپەن الەمدە 10 ميلليونداي ادام اينالىسادى. كوپشىلىك قىزىعا باستاعان بۇل سپورتتىڭ تاريحى قالاي دەيمىز عوي. سويتسەك, 1940 جىلدارى فينليانديادا شاڭعى قۇراماسىنىڭ جاتتىقتىرۋشىسى يۋحە ميەتو جاتتىعۋدى ۇزبەۋ ءۇشىن جاز ايلارىندا سپورتشىلاردى تاياقپەن جۇرگىزگەن. ۆەلوسپورتپەن, جۇزۋمەن اينالىسۋعا بولار ەدى, بىراق شاڭعىنىڭ جۇكتەمەسىن «سكانديناۆيالىق سەرۋەندەۋدەن» باسقا سپورت ءتۇرى بەرە المايدى دەسەدى. ءسويتىپ, جاتتىعۋدى ۇزبەگەن فينليانديالىقتار جەڭىس تۇعىرىنان كورىنگەن. ۋاقىت وتە بۇل تاجىريبەنى باسقا دا قۇراما كوماندالار پايدالانا باستاعان. بۇگىندە «سكانديناۆيالىق سەرۋەندەۋ» بۇقارالىق سپورت تۇرىنە اينالىپ كەلەدى.
شىعىس قازاقستان وبلىسى
