قارجى • 29 ناۋرىز، 2022

اۋدارىمنىڭ دەنى دوللارعا تيەسىلى

2022 جىلدىڭ قاڭتارىندا اقشا اۋدارىمى جۇيەسى ارقىلى قازاقستاننان جىبەرىلگەن قارجى كولەمى 45،6 ملرد تەڭگەنى قۇرادى. بۇل – 2021 جىلدىڭ قاڭتارىمەن سالىستىرعاندا 16،3 پايىزعا از. ترانزاكتسيا سانى 150 مىڭنان 100،5 مىڭعا دەيىن ازايعان.

اباي قازبەك ۇلى

قاڭتار ايىندا اۋدارىمداردىڭ باسىم بولىگى، ياعني 82،5 پايىزى دوللارمەن جاسالعان. ءبىر جىل بۇرىن بۇل كورسەتكىش 73،6 پايىزدى قۇراعان ەكەن. ال بەس جىل بۇرىن 61،4 پايىزدى قۇراعان بولاتىن. رۋبلمەن اۋدارىم جاساۋ جىلدان-جىلعا ازايىپ كەلە جاتىر. 2022 جىلدىڭ قاڭتارىندا ءرۋبلدىڭ ۇلەسى 10،8 پايىز بولعان. ۇلتتىق ۆاليۋتامەن اۋدارىمدى جۇزەگە اسىرۋ سوڭعى ءبىر جىلدا 11،9-دەن 5،7 پايىزعا، ال ەۋرومەن قارجى جىبەرۋ 1،2-دەن 1 پايىزعا تومەندەگەن.

اقشا اۋدارىمى جۇيەسى ارقىلى قازاقستاننان جىبەرىلگەن ءبىر اۋدارىمنىڭ ورتاشا چەگى ۇلتتىق ۆاليۋتادا 142،7 مىڭنان 140،6 مىڭعا ازايعان. رەسەي رۋبلىندە – 59،8-دەن 50،9 مىڭعا، ەۋرودا – 1 218-دەن 1 155 ەۋروعا قىسقارۋ بايقالادى. ال دوللاردا – 1 165-تەن 1 355 دوللارعا وسكەن.

بارلىق اۋدارىمنىڭ تەڭ جارتىسىنان استامى ءۇش ەلگە تيەسىلى ەكەن: تۇركيا (10،4 ملرد تەڭگە)، وزبەكستان (9،3 ملرد تەڭگە) جانە قىرعىزستان (8،3 ملرد تەڭگە). سونداي-اق 7،2 ملرد تەڭگە رەسەيگە جىبەرىلگەن، بىراق بۇل سوما بىلتىرعىدان الدەقايدا از جانە ول كەزدە قازاقستاننان اقشا الۋدان رەسەي كوش باستاپ تۇرعان. ال بيىل العاشقى ۇشتىككە دە كىرمەي قالعانىن بايقايمىز.

بۇل رەتتە، قازاقستان رەسپۋبليكاسى قولما-قول شەتەل ۆاليۋتاسىن جانە 10 مىڭ دوللاردان اساتىن شەتەل ۆاليۋتاسىنداعى اقشا قۇرالدارىن، سونداي-اق التىن قۇيمالارىن، ينۆەستيتسيالىق مونەتالاردى ەكسپورتتاۋعا شەكتەۋ ەنگىزگەندىكتەن اۋدارىم تانىمالدىلىعى بۇدان دا ارتا ءتۇسۋى مۇمكىن دەپ بولجايدى ماماندار.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز