كەزەكتەن تىس ءححىى سەزدە پارتيا توراعاسى قاسىم-جومارت توقاەۆ ۇيىم جۇمىسىن قايتا جانداندىرۋدى تاپسىرىپ, پارتيانىڭ قوعامدىق قابىلداۋ بولمەلەرى شاعىمدارمەن عانا ەمەس, ەلدى دامىتۋ بويىنشا ناقتى يدەيالارمەن كەلەتىن ازاماتتار ءۇشىن تارتىمدى ورىنعا اينالۋعا ءتيىس ەكەنىن اتاپ ءوتتى.
AMANAT پارتياسى رەسپۋبليكالىق قوعامدىق قابىلداۋ بولمەسى مەڭگەرۋشىسىنىڭ ورىنباسارى ازامات ءبىرجانوۆتىڭ ايتۋىنشا, كوشپەلى ءموبيلدى توپتاردىڭ ماقساتى – جەرگىلىكتى جەرلەردەگى حالىقتىڭ مۇڭ-مۇقتاجىنا قۇلاق اسىپ, ولاردىڭ وتىنىشتەرىن قابىلداۋ. ء«بىز ەلىمىزدىڭ بارلىق ايماعىن قامتۋدى جوسپارلاپ وتىرمىز, اسىرەسە تۇرعىندارى پارتيانىڭ وبلىستىق فيليالىنا كەلۋگە مۇمكىندىگى بولا بەرمەيتىن شالعاي اۋىلدارعا ەرەكشە نازار اۋدارامىز. مۇنداي ساپارلار ازاماتتاردىڭ وتىنىشتەرىنە دەن قويۋ ءۇشىن عانا ەمەس, سونىمەن قاتار اۋىلدىق جەرلەردەگى جىلدارعا سوزىلىپ كەلە جاتقان پروبلەمالاردىڭ شەشىمىن تابۋعا مۇمكىندىك بەرەدى», دەدى.
ماسەلەن, قىزىلوردا وبلىسى جالاعاش اۋدانىنا قاراستى ەسەت باتىر اۋىلىنىڭ تۇرعىنى ءابدىرايىم سارسەنباەۆ ەلەكترمەن جابدىقتاۋ جەلىلەرىنىڭ توزىعى جەتكەنىن العا تارتتى. «ەلەكتر جەلىلەرىن كۇردەلى جوندەۋدەن وتكىزىپ, جاڭا سىمدار تارتۋ قاجەت. مامانداردىڭ ايتۋىنشا, بىزدەگى ەلەكتر جەلىلەرىنىڭ 75%-نىڭ توزىعى جەتكەن. اۋىل-ايماق دەڭگەيىندە بۇل ماسەلەنىڭ شەشىمى تابىلمادى. ەندى AMANAT پارتياسىنىڭ قولداۋىمەن وسى ماسەلە وڭ شەشىمىن تابادى دەپ ۇمىتتەنەمىز», دەيدى زەينەتكەر.
ال گۇلسىم جاحانوۆا اۋىل كوشەلەرىن جارىقتاندىرۋ ماسەلەسىن كوتەردى. ونىڭ ايتۋىنشا, بۇگىندە اۋىلداعى 13 كوشەنىڭ ۇشەۋىندە عانا جارىق بار. «اۋداندىق بيۋدجەت قاراجاتى ەسەبىنەن كەنتتە 1 ملن تەڭگەگە كوكپاي كوشەسى جارىقتاندىرىلىپ, 1,4 ملن تەڭگەگە اقارىق كوشەسىندەگى جارىقتاندىرۋ جەلىلەرى جاڭارتىلدى. جاقىن ارادا دەمەۋشىلەردىڭ قولداۋىمەن اقارىق كوشەسىندە 25 باعانا, ابىشەۆ كوشەسىندە 20 باعانا ورناتىلادى», دەدى جالاعاش اۋدانىنىڭ اكىمى اسىلبەك شامەنوۆ.
كوشپەلى قابىلداۋ بارىسىندا اماناتتىقتار دەنساۋلىعىنا بايلانىستى ءوزى كەلە الماعان ءى توپتاعى مۇگەدەك جارتاي ەشماحانوۆتىڭ ۇيىنە باردى. «وسىلاي شالعاي اۋىلداردى ارالاپ, تۇرعىندارىنىڭ تالاپ-تىلەكتەرىن تىڭداپ, جاعدايدى ءوز كوزىمەن كورۋگە كەلىپ وتىرعان پارتيا وكىلدەرىنە العىس ايتامىن. مەن سياقتى ۇيگە كىرىپ-شىعۋدىڭ ءوزى مۇڭ بولىپ وتىرعان ادامدار ءۇشىن, مۇنداي كەزدەسۋلەردى مۇمكىندىگىنشە ءجيى ۇيىمداستىرعان ءجون. قىزىمدى جۇمىسقا ورنالاستىرۋعا قاتىستى كومەك سۇرادىم, ماسەلە شەشىلدى. ولار الەۋمەتتىك تۇرعىدا وزىمە دە جان-جاقتى كومەك قولىن سوزىپ كەلەدى», دەدى ول.
ال قازالى اۋدانى, بەكارىستان بي اۋىلىنىڭ تۇرعىندارى قوسىمشا سۋ ۇڭعىمالارىن بۇرعىلاۋ قاجەتتىگىن ايتتى. ايتۋلارىنشا, ولار تىرشىلىك ءنارىن ءالى كۇنگە دەيىن 30-40 جىل بولعان 7-8 سۋ كوزىنەن الىپ كەلەدى.
جالپى, اماناتتىقتار قىزىلوردا وبلىسىنا قاراستى ەسەت باتىر, ىڭكارداريا, قاندوز, جولەك, بەكارىستان بي سياقتى 5 اۋىلعا باردى. تۇرعىنداردى اۋىل ىشىندەگى كوشەلەردى جوندەۋ, جايىلىمدىق جەرلەردى كەڭەيتۋ, اۋىزسۋ جانە سۋارما-
لى سۋ, اۋىل شارۋاشىلىعى تاۋار وندىرۋشىلەرىن نەسيەلەندىرۋ سياقتى ماسەلەلەر تولعاندىرادى.
وسى كۇنى AMANAT ءموبيلدى بريگادالارى پاۆلودار وبلىسىنداعى شالعاي ەلدى مەكەندەردىڭ تۇرعىندارىن دا قابىلدادى. پارتيالىقتار شىدەرتى, تورتقۇدىق, يۆانوۆكا, تەرەڭكول, جاڭا جۇلدىز, الاكول اۋىلدارىندا بولدى. شىدەرتى اۋىلىنىڭ تۇرعىنى مارات ماكەنوۆ وسىنداعى قانىش ساتباەۆ اتىنداعى سۋ ارناسىنىڭ قۇرىلىسىن جاڭالاپ بەرۋگە قاتىستى ءوتىنىش ءبىلدىردى. «سۋ ارناسى 1974 جىلدان بەرى جۇمىس ىستەيدى, وسى ۋاقىت ارالىعىندا قايتا جوندەۋدەن وتپەگەن. تۇرعىنداردى تازا سۋمەن قامتاماسىز ەتۋ ءۇشىن قىزمەتكەرلەر ءوز كۇشتەرىمەن ۇزدىكسىز جۇمىس اتقارىپ كەلەدى. زاماناۋي قۇرىلعىلاردى ورناتۋ ءۇشىن ايتارلىقتاي قاراجات قاجەت. تاعى ءبىر ماسەلە – ارنانىڭ قاۋىپسىزدىگى. ويتكەنى بۇل – ەرەكشە قورعاۋداعى نىسان. ىشكى ىستەر مينيسترلىگىنەن كوميسسيا كەلىپ, قورشاۋدىڭ 2,5 مەتردەن كەم بولماۋىن, سونداي-اق بەكەتتەر تولىعىمەن جارىقتاندىرىلۋى كەرەگىن ايتىپ بىرنەشە رەت ايىپپۇل سالعان. ال ءبىزدىڭ ەسەبىمىز بويىنشا مۇنىڭ بارلىعىنا بيۋدجەتتەن 5 ملرد تەڭگە بولىنۋگە ءتيىس», دەدى مارات ماكەنوۆ.
ايتا كەتسەك, بۇعان دەيىن ءموبيلدى قوعامدىق قابىلداۋلار اقمولا جانە قاراعاندى وبلىستارىنا باردى. سول كەزدە شالعايداعى 10 اۋىلدىڭ 100-گە جۋىق تۇرعىنى تۇيتكىلدى پروبلەمالارىن ورتاعا سالدى. بۇل سۋمەن قامتۋ, ينتەرنەتكە قولجەتىمدىلىكتى قامتاماسىز ەتۋ, جول سالۋ, جاڭا بالاباقشالار مەن مەكتەپتەر اشۋ جانە تاعى باسقا ماسەلەلەر.
ەسكە سالا كەتەيىك, قابىلداۋعا جازىلۋ كەزدەسۋ وتكىزىلەتىن كۇنگە دەيىن كەمىندە 3 كۇنتىزبەلىك كۇن بۇرىن جۇزەگە اسىرىلادى. سونىمەن بىرگە پارتيانىڭ رەسپۋبليكالىق قوعامدىق قابىلداۋ بولمەسىنىڭ بازاسىندا وتباسى, ايەلدەر جانە بالالاردىڭ قۇقىقتارىن قورعاۋ, سونداي-اق تۇرمىستىق زورلىق-زومبىلىققا قارسى ءىس-قيمىل ماسەلەلەرى بويىنشا «111 شۇعىل قىزمەتى» ارنايى بايلانىس ورتالىعى جۇمىس ىستەيدى.
