قارجى • 28 ناۋرىز، 2022

ونلاين تولەم كولەمى ارتتى

قازىر ىشكى نارىقتا قولما-قول تولەم جاساۋ ءۇردىسىنىڭ ازايعانى كادىمگىدەي بايقالادى. كوپشىلىك قىزمەت پەن تاۋار قۇنىن نە كارتامەن، نە سمارتفونمەن تولەۋگە ادەتتەنە باستادى. سوڭعى بەس جىلدا بانك كارتاسى سانىنىڭ 3،5 ەسە كوبەيگەنى دە سوزىمىزگە انىق دالەل.

اباي قازبەك ۇلى

كوللاجدى جاساعان قونىسباي شەجىمباي، «EQ»

2022 جىلدىڭ 1 قاڭتارىنداعى جاعداي بويىنشا اينالىمداعى كارتا سانى 58 ملن-عا جەتكەن، ياعني ءاربىر قازاقستاندىققا ۇشەۋدەن، ال ءاربىر ەكونوميكالىق بەلسەندى ازاماتقا 6 كارتادان تيەسىلى بولماق. 2017 جىلدارى بۇل كورسەتكىش 1 جانە 2،2 كارتا بولعانىن ەسكەرسەك، بەس جىلدا كارتاعا دەگەن سۇرانىس اجەپتەۋىر ارتقانىن اڭعارامىز.

سوڭعى بىرەر جىل كولەمىندە وتاندىق بانك سەكتورىنداعى زاماناۋي قارجىلىق تەحنولوگيالىق ونىمدەر مەن قىزمەتتەردىڭ پايدا بولۋى ىشكى باسەكەنى كۇشەيتتى. سونىمەن بىرگە تۇتىنۋشىلارعا ءبىراز جەڭىلدىك الىپ كەلدى. ەل ىشىندەگى كارتالاردىڭ 32،8 پايىزى جەرگىلىكتى تولەم جۇيەلەرىنە تيەسىلى بولسا، 67،2 پايىزى حالىقارالىق جۇيەلەردىڭ ەنشىسىندە ەكەن. ارينە، حالىقارالىق تولەم جۇيەسىمەن بىرىكتىرىلگەن كارتانىڭ ارتىقشىلىعى مول، ونى وزگە ەلدە دە پايدالانۋعا، حالىقارالىق ماركەتپلەيستەر ارقىلى تاۋارلار مەن قىزمەتتەر ءۇشىن اقى تولەي بەرۋگە بولادى. بۇل رەتتە ونداي حالىقارالىق ماركەتپلەيستەردىڭ قازاقستاندىق نارىقتا دا تانىمال بولا باستاعانىن ايتىپ وتۋگە بولادى. ماسەلەن، AliExpress، Amazon، Wildberries جانە باسقا دا حالىقارالىق پلاتفورمالاردا جاھاندىق تولەم جۇيەلەرىنىڭ كارتالارىمەن ءونىم (قىزمەت) ساتىپ الۋعا مۇمكىندىك مول.

Finprom مالىمەتى بويىنشا، 2021 جىلى قازاقستاندىق بانكتەردىڭ كارتالارى ارقىلى شەتەلدەردە ساۋدا جاساۋ كولەمى 66،3 پايىزعا ۇلعايىپ، 967 ملرد تەڭگەگە جەتكەن. ترانزاكتسيا سانى 61،5-تەن 90،5 ملن-عا وسكەن. بۇل ءوسىم بيىل دا بايقالادى. سونىمەن قاتار قازاقستاننان تىس اۋماقتا كارتالاردان قارجى شەشىپ الۋ كولەمى دە 27،7 پايىزعا ارتىپ، ونىڭ مولشەرى 206،6 ملرد تەڭگەنى قۇراعان. قازىر قازاقستاندىقتار Mastercard، Visa، UnionPay جانە American Express سياقتى حالىقارالىق تولەم جۇيەلەرىنىڭ كارتالارىن بەلسەندى پايدالانادى جانە ولار ۇسىناتىن جەڭىلدىكتەر مەن اكتسيالاردى دا ءتيىمدى پايدالانا باستاعان.

«قازىر قازاقستاندىقتار قولما-قولسىز تولەم جاساۋ ءۇشىن قارجىلىق ينفراقۇرىلىم ۇسىناتىن ءادىس-تاسىلدەردى سەنىمدى قولدانادى. 2021 جىلدىڭ قورىتىندىسى بويىنشا POS-تەرمينالدار ارقىلى ىسكە اسىرىلعان قولما-قولسىز تولەم 487،8 ملرد تەڭگەنى نەمەسە بۇكىل كولەمنىڭ 50،4 پايىزىن قۇرادى. ونلاين-ءتاسىل، ياعني ينتەرنەت نەمەسە ءموبيلدى تەلەفون ارقىلى جاسالاتىن تولەمدەردىڭ ۇلەسى 48،9 پايىزدى، 472،9 ملرد تەڭگەنى قۇرايدى. وسىلايشا، تولەم كارتالارى ەل ىشىندە دە، سىرت مەملەكەتتەردە دە ءامياننىڭ ورنىن تولىققاندى باستى دەۋگە نەگىز بار»، دەپ جازادى Finprom.

رەسەي مەن ۋكراينا اراسىندا تۋىنداعان گەوساياسي احۋالعا بايلانىستى Visa جانە Mastercard حالىقارالىق تولەم جۇيەلەرى رەسەي اۋماعىندا قارجىلىق وپەراتسيالاردى دوعارعاندارىن مالىمدەگەن ەدى. ياعني اتالعان تولەم جۇيەلەرىنىڭ كارتالارىمەن رەسەيلىك دۇكەندەردە تولەم جاساۋعا، بانكوماتتان اقشا الۋعا مۇمكىندىك جوق.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز