ۇلتتىق كىتاپحانادا دەپۋتاتتار, اتا-انالار, قالالىق ءبىلىم باسقارماسىنىڭ ماماندارى, ۇستازدار قاۋىمى سوڭعى جىلداردا قوعامدى ەرەكشە تولعاندىرىپ وتىرعان بالا تاربيەسى, بۋللينگ, وتباسىنداعى زورلىق-زومبىلىق تاقىرىبىن تالقىلاۋ ماقساتىندا دوڭگەلەك ۇستەلدە باس قوستى.
جيىندا «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ قۇرىلتايشىسى نۇركەن اسانوۆ, پارلامەنتى سەناتىنىڭ دەپۋتاتتارى دينار نۇكەتاەۆا جانە دانا نۇرجىگىت, ءماجىلىس دەپۋتاتى يرينا سميرنوۆا, «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ توراعاسى راقىمبەك جولاەۆ, ادام قۇقىقتارى جونىندەگى زاڭگەر, PhD حاليدا اجيگۋلوۆا, تاعى دا باسقا قوعام قايراتكەرلەرى مەن ءبىلىم بەرۋ مەن تاربيە ورتالىقتارىنىڭ ماماندارى وزەكتى تاقىرىپقا وراي وي ءبولىستى.
بىرلەستىك توراعاسى راقىمبەك جولاەۆتىڭ ايتۋىنشا, وڭىرلەردە اتا-انالارمەن تىعىز بايلانىس ورناتۋ ماقساتىندا كوپتەگەن شارالار ۇيىمداستىرىلۋدا. قازىرگى كەزدە 13 مىڭنان استام مۇشەسى بار بىرلەستىك وتباسىنداعى تاربيە, اتا-انا بولۋدىڭ زاماناۋي تالاپتارى, بالامەن ءتىل تابىسۋ, پسيحولوگيالىق كەڭەستەر بەرۋ ارقىلى قوعامداعى بۋللينگ, ءسۋيتسيدتىڭ الدىن الۋ بويىنشا كەشەندى جوبالاردى جۇزەگە اسىرىپ كەلەدى.
